Hali Abahebburaniya 4:1-16
4 Nahabweki, nkooku omurago ogw’okutaaha omu kuhuumura kwe gukyaroho, leka twerinde* habw’okutiina ngu hatabaho n’omu omuli inywe ayagufeerwa.
2 Habwokuba amakuru amarungi gakarangirirwa hali itwe nkooku na bo gaabarangiriirwe, baitu ekigambo eki baahuliire kitabagasire habwokuba batateeranizibwe hamu omu kwikiriza n’abo abaakihuliire.
3 Habwokuba itwe abaine okwikiriza nitutaaha omu kuhuumura nkooku yagambire ati: “Nahabweki, omu kiniga kyange nkarahira nti: ‘Tibalitaaha omu kuhuumura kwange,’” noobu kiraaba ngu akamaliiriza emirimo ye ha kutandika kw’ensi.
4 Habwokuba omu kyahandiikirwe kimu akabazaaho ekiro kya musanju ati: “Ruhanga akahuumura emirimo ye yoona ha kiro ekya musanju,”
5 kandi ayongera agamba ati: “Tibalitaaha omu kuhuumura kwange.”
6 Nahabweki, nkooku abamu bakyaine kukutaahamu, kandi n’abo abaabandize kurangirirwa amakuru amarungi batakutaahemu habw’obujeemu,
7 kandi hanyuma y’okurabaho akasumi akaraihire, akongera yataho ekiro ekindi omu zabbuli ya Daudi naagamba ati: “Kiro Kinu”; nkooku kibaziibweho eruguru, “Kiro kinu obu muraahurra iraka lye, mutagumanganiza emitima yanyu.”
8 Kakuba Yosuha yabatwaire omu kiikaro eky’okuhuumura, Ruhanga tiyaakubalizeeho ekiro ekindi hanyuma.
9 Nahabweki, hakyasigaireho Sabbiiti ey’okuhuumura habw’abantu ba Ruhanga.
10 Habwokuba omuntu ow’ataahire omu kuhuumura kwa Ruhanga, na uwe aba ahuumwire emirimo ye, nkooku Ruhanga yahuumwire emirimo ye.
11 Nahabweki, leka twekambe kutaaha omu kuhuumura oku nukwo hatabaho omuntu weena ayahondera ekyokurorraho eki eky’obujeemu.
12 Habwokuba ekigambo kya Ruhanga kyomeezi, ky’amaani kandi kitoire kukira empirima yoona enyakwine amoogi abiri kandi kicumita nikihikira kimu omunda nikibaganiza obwomeezi n’omwoyo,* engiga n’omusoina, kandi nikisobora kwetegereza ebiteekerezo n’ebigendererwa eby’omutima.
13 Kandi busaho kyahangirwe kyona ekiserekerwe omu maiso ge, baitu byona nibirorwa kurungi, bisuukwirwe omu maiso g’ogu ou tulisoborra ebi twakozere.
14 Nahabweki, nkooku twine nyakatagara omukuru ow’arukukirayo, ayagenzere omu iguru, Yesu Omwana wa Ruhanga, katweyongere kumurangirra omu rwijwire.
15 Habwokuba nyakatagara omukuru ou twine, tali nuwe ogu ow’atasobora kutusaalirirwa omu buceke bwaitu, baitu twine ogu ayalengerwe omu byona nka itwe, baitu taine kibi.
16 Nahabweki, leka tuhikirre ekitebe eky’embabazi enyingi muno* tutarukutiina kubaza, nukwo tusobole kutunga okuganyirwa n’embabazi enyingi muno kutukoonyera omu kasumi akahikire.
Obugambo Obuli Hansi
^ Nkooku kiri, “tube omu kutiina.”
^ Rora, Kusoborra Ebigambo; “Omwoyo.”
^ Rora, Kusoborra Ebigambo; “Embabazi enyingi muno.”
