Samuwele Wa Vumbirhi 21:1-22
21 Ku ve ni ndlala+ emasikwini ya Davhida ku ringana malembe manharhu hi ku landzelelana, hiloko Davhida a vutisa Yehovha, kutani Yehovha a ku: “Ku ni nandzu wa ngati eka Sawulo ni le ka ndyangu wakwe, hikuva u dlaye Vagibiyoni.”+
2 Hiloko hosi yi vitana Vagibiyoni+ yi vulavula na vona. (Vagibiyoni a va nga ri Vaisrayele kambe a va ri Vaamori+ lava saleke naswona Vaisrayele a va hlambanyile leswaku a va nge va dlayi,+ kambe Sawulo a a lava ku va dlaya hikwalaho ka leswi a a rhandza vanhu va Israyele ni va Yuda.)
3 Davhida a vutisa Vagibiyoni a ku: “Mi lava ndzi mi endlela yini, xana ndzi nga mi rihela hi yini leswaku mi katekisa ndzhaka ya Yehovha?”
4 Vagibiyoni va ku eka yena: “A hi lavi silivhere kumbe nsuku+ hikwalaho ka swilo leswi Sawulo ni ndyangu wakwe va hi endleke swona; naswona a hi na mfanelo yo dlaya munhu eIsrayele.” Kutani Davhida a ku: “Xin’wana ni xin’wana lexi mi nga ta xi vula ndzi ta mi endlela xona.”
5 Hiloko va byela hosi va ku: “Munhu loyi a ringeteke ku hi herisa a tlhela a boha kungu ra ku hi lovisa leswaku hi nga tshami laha hi lavaka kona etikweni ra Israyele,+
6 a va hi nyike vana vakwe va nkombo. Hi ta hayeka mitsumbu ya vona*+ emahlweni ka Yehovha eGibiya+ wa Sawulo, muhlawuriwa wa Yehovha.”+ Kutani hosi yi ku: “Ndzi ta mi nyiketa vona.”
7 Kambe hosi yi n’wi twela vusiwana Mefiboxete+ n’wana wa Yonathani, n’wana wa Sawulo, hikwalaho ka xihlambanyo lexi endliweke emahlweni ka Yehovha exikarhi ka Davhida na Yonathani,+ n’wana wa Sawulo.
8 Hiloko hosi yi teka Arimoni na Mefiboxete, vana vambirhi va majaha va Risipa,+ n’wana wa Aya wa nhwanyana, lava a va tswaleleke Sawulo ni vana va ntlhanu va majaha va Mikala*+ n’wana Sawulo, lava a nga va tswalela Adriyele+ n’wana wa Barizilayi wa le Mehola.*
9 Kutani a va nyiketa Vagibiyoni, vona va hayeka mitsumbu ya vona entshaveni emahlweni ka Yehovha.+ Vana lava nkombo va fe swin’we; va dlayiwe emasikwini yo sungula ya ntshovelo, eku sunguleni ka ntshovelo wa maxalana.
10 Hiloko Risipa+ n’wana wa Aya wa nhwanyana a teka lapi ro khwaxa a ri andlala ehenhla ka ribye, ku sukela loko ku sunguriwa ntshovelo ku fikela loko mpfula yi nela mitsumbu yoleyo; a nga swi pfumelelanga swinyenyana leswaku swi phatsama ehenhla ka yona ninhlikanhi kumbe swivandzana leswaku swi tshinelela eka yona nivusiku.
11 Davhida a byeriwa leswi endliweke hi nsati lontsongo wa Sawulo, ku nga Risipa n’wana wa Aya.
12 Hiloko Davhida a famba a ya teka marhambu ya Sawulo ni marhambu ya Yonathani n’wana wakwe eka varhangeri va muti wa Yabexe-giliyadi,+ lava a va ma yive erivaleni leri nga exikarhi ka muti wa Beta-xani, laha Vafilista a va va hayeke kona hi siku leri va dlayeke Sawulo ha rona eGilbowa.+
13 U vuye ni marhambu ya Sawulo ni marhambu ya Yonathani n’wana wakwe ku suka kwalaho, va tlhele va hlengeleta ni marhambu ya vavanuna lava dlayiweke.+
14 Kutani va lahla marhambu ya Sawulo ni ya Yonathani n’wana wakwe etikweni ra Benjamini eZela,+ esirheni ra Kixi+ tata wakwe. Loko se va endle hinkwaswo leswi hosi yi va leriseke swona, Xikwembu xi yingisa swikombelo swa vona mayelana ni tiko.+
15 Kutani ku tlhela ku tlhekeka nyimpi exikarhi ka Vafilista ni Vaisrayele.+ Hiloko Davhida ni malandza yakwe va rhelela va ya lwa ni Vafilista, kambe Davhida a karhala.
16 Ixibi-benobo ntukulu wa Varefayimi,+ loyi tlhari rakwe ra koporo a ri tika kwalomu ka mune wa tikhilogiramu*+ naswona a a hlome hi banga lerintshwa, a a lava ku dlaya Davhida.
17 Hi ku tsopeta ka tihlo, Abixayi+ n’wana wa Seruya a n’wi pfuna+ a tlhava Mufilista a n’wi dlaya. Hiloko masocha ya Davhida ma n’wi hlambanyela, ma ku: “U nga ha fambi na hina enyimpini!+ U nga tshuki u tima rivoni ra Israyele!”+
18 Endzhaku ka sweswo, ku tlhela ku tlhekeka nyimpi nakambe ni Vafilista+ eGobo. Hi nkarhi wolowo Sibekayi+ wa le Huxa u dlaye Safu loyi a a ri ntukulu wa Varefayimi.+
19 Nyimpi yi tlhekeka nakambe ni Vafilista+ eGobo, kutani Elihanani n’wana wa Yare-oregimi wa le Betlehema a dlaya Goliyadi wa le Gati, loyi tlhari rakwe a ri ri ni mbhinyi lowu ringanaka ni mhandzi ya muluki wa malapi.+
20 Nakambe ku tlhekeka nyimpi eGati, laha a ku ri ni wanuna loyi a a ri xihontlovila, a a ri ni tintiho ta tsevu evokweni ha rin’we ni swikunwana swa tsevu enengeni ha wun’we, hinkwaswo a swi ri 24; na yena a a ri ntukulu wa Varefayimi.+
21 A a tshamela ku tlhontlha Vaisrayele.+ Hiloko Yonathani n’wana wa Ximeyi+ buti wa Davhida, a n’wi dlaya.
22 Vanhu lava va mune a va ri vatukulu va Varefayimi eGati, va dlayiwe hi Davhida ni malandza yakwe.+
Tinhlamuselo ta le hansi
^ Hi Xiheveru, “hi ta va veka erivaleni,” hileswaku va tshoviwe mavoko ni milenge.
^ Kumbexana “Meraba.”
^ Swi tikomba ku vuriwa Avele-mehola.
^ Kwalomu ka 3,42 wa tikhilogiramu. Vona Xiengetelo B14.
