Skip to content

Skip to table of contents

 CHAANDANO 17

Nkombyo Nchilongezyo

Nkombyo Nchilongezyo

“Iwakalenga julu anyika” ulayanda kumvwa nkombyo zyesu.Intembauzyo 115:15

1, 2. Nkaamboonzi nuyeeya kuti nkombyo nchipo chiyandikana, alimwi nkamboonzi nikuyandikana kuti tuzibe Bbayibbele nziliyisya atalaa nkombyo?

IKUTI nyika twiiyezyanisyaa julu azili mumo, nkantu kaniini loko. Ikuti Jehova walanga aansi, bantu bali muzisi zyoonse baboneka mbuli dosi lyamaanzi mukati kamugomo. (Intembauzyo 115:15; Isaya 40:15) Nikuba kuti tuboneka katuli tuniini kuti tweezyanisigwaa julu, ibbuku lyaIntembauzyo 145:18, 19 lyaamba kuti: ‘Jehova uli kufwaafwi kuliboonse bamwiita, boonse bamwiita calusinizyo. Aabo bamuyoowa ulabapa nzyobayanda, ulaswiilila cililo cabo, akubafutula.’ Nchilongezyo chigambya biyeni nchitulaacho! Jehova, Mulengi singuzuzyoonse, uyanda kubaafwiifwi andiswe alimwi uyanda kuswiilila nkombyo zyesu. Nichoonzyo, kukomba nchilongezyo, alimwi nchipo chiyandikana loko eecho Jehova nchaakapa umwi awumwi wesu.

2 Pesi Jehova ulatuswiilila ikuti twakomba munzila njayanda. Nga tulazichita biyeni? Atubone Bbayibbele nzilyaamba atalaa nkombyo.

NKAAMBOONZI NITUKOMBA KULI JEHOVA?

3. Nkaamboonzi nuwelede kukomba kuli Jehova?

3 Jehova uyanda kuti ukombe naa kwaambuulaawe. Tuzizi biyeni eezyo? Bala lugwalo lwaBaFilipi 4:6, 7. Yeeya atala akutambwa ooku kwaluyando. Mweendelezi wajulu azili mumo ulakuyandisya alimwi uyanda kuti kumubuzya zili mumoyo wako alimwi amapenzi aako.

4. Kukomba chiindi choonse kuli Jehova kubusimya biyeni bweenzuma bwako anguwe?

4 Inkombyo itugwasya kuti tubaa bweenzuma buli  aafwiifwi aJehova. Ikuti bantu bamvwanana kabaambuuzyania chiindi choonse atala ambubayeeya, ambubalimvwa, bweenzinyina bwabo bulayendelela kunembo kusima akukomena. Kulakozyania akukomba kuli Jehova. Kwiinda muBbayibbele, wakakubuzya mizeezo yakwe ambwalimvwa atala anduwe, alimwi wakakubuzya zintu nzyayoochita kunembo. Ulakonzya kwaabilana anguwe kuzwaansi aamoyo nzila njulimvwaayo kuti kwaambuulaawe chiindi choonse. Mbuyabuchita eezi, bweenzuma bwako aJehova buyoosima loko.Jakobo 4:8.

NIINZI NCHITWEELEDE KUCHITA KUTI TUMVWIGWE ALEZA?

5. Tuzi biyeni kuti Jehova taziswiilili pe nkombyo zyoonse?

5 Jehova ulaziswiilila na nkombyo zyoonse? Peepe, taziswiilili pe. Muchiindi chamusinsimi Isaya, Jehova wakabuzya maIsrayeli kuti: “Nekuba kuti mwakomba zikombyo zinji nsikoyooswiilila, nkaambo maanza aanu alizwide bulowa.” (Isaya 1:15) Aboobo ikuti teetwachenjela, tuyoochita  zintu zitwaanzyania aJehova, zitape kuti awunduluzye nkombyo zyesu.

6. Nkaamboonzi kubaa lusyomo nikuyandikana? Tutondeezya biyeni kuti tulaa lusyomo?

6 Ikuti katuyanda kuti Jehova kaswiilila nkombyo zyesu, tweelede kubaa lusyomo muli nguwe. (Marko 11:24) Mwaapostolo Paulo wakapandulula kuti: “Pele kuti kakwiina lusyomo tacikonzeki kukonda Leza, nkaambo woonse muntu uusweena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.” (BaHebrayo 11:6) Pesi tazimanini aakwaamba kuti tulaa lusyomo. Tweelede kulutondeezya aantanganana lusyomo lwesu kwiinda mukuswiilila Jehova mazuba oonse.Bala Jakobo 2:26.

7. (a) Nkaamboonzi nitweelede kulichesya akulemeka chiindi nitukomba kuli Jehova? (b) Nga tulatondeezya biyeni kuti tulaachoonzyo chiindi nitukomba?

7 Tweelede kulichesya akulemeka chiindi nitukomba kuli Jehova. Nkaamboonzi? Kaansinga kwali kuti nkuyaakwaambuula kumwaami naa kumweendelezi wanyika, twali kunoochita oobo munzila yakulemeka. Jehova nguLeza Singuzuzyoonse, aboobo tatweelede kutondeezya bulemu akulichesya kwiindilide na chiindi nitwaambuulaawe? (Matalikilo 17:1; Intembauzyo 138:6) Alubo tweelede kubaa choonzyo chiindi nitukomba kuli Jehova zizwa mumyoyo yesu, alimwi tatweelede kunooyindulula-yindula mabala ngitwaambide kale.Matayo 6:7, 8.

8. Chiindi nitukombela chimwi chintu, niinzi nchitweelede kuchita?

8 Chamamanino, chiindi nitukombela atala achimwi chintu, tweelede kuchita kufumbwa nchitukonzya kutegwa tubelekele eecho nchitwakombela. Muchikozyano, ikuti twakombela nzituyanda zyabuzuba abuzuba kuli Jehova, tatweelede kukkala biyo pe katulindila kuti Jehova atupe zyoonse kakuli tulakonzya kuzibelekela kuti tuzijane. Pesi tweelede kubeleka changuzu alimwi katuzumina kufumbwa  mulimu ikuti katukonzya kuuchita. (Matayo 6:11; 2 BaTesalonika 3:10) Ikuti twakombela kuti Jehova atugwasye kuleka kuchita chimwi chintu chibi, tweelede kutantamuka bukkale boonse bukonzya kutusunka. (BaKolose 3:5) Kwalino atulange-lange imwi mibuzyo izibidwe kubuzigwa atala ankombyo.

MIBUZYO IZIBIDWE KUBUZIGWA IILI ATALA ANKOMBYO

9. Tweelede kukomba kulini? Lugwalo lwaJohane 14:6 lutwiisyaanzi atala ankombyo?

9 Tweelede kukomba kulini? Jesu wakayiisya basikwiiya bakwe kukomba kuli “Taateesu ooli kujulu.” (Matayo 6:9) Alimwi waakamba kuti: “Ndime nzila, ndime bwini, ndime buumi. Takukwe uuza kuli-Taata, pele muli ndime.” (Johane 14:6) Nkukwaamba kuti tweelede kukomba kuli Jehova kwiinda muli Jesu. Chaambaanzi kukomba kwiinda muli Jesu? Kuti Jehova atambule nkombyo zyesu, tweelede kulemeka mulimu uyandikana ooyo Jehova ngwaakapa Jesu. Mbuli mbutwakayiiya, Jesu wakaza munyika kuzootufutula kuzwa muchibi amulufu. (Johane 3:16; BaRoma 5:12) Jehova wakasala Jesu kuti abe Mupayizi Mupati aMubetesi.Johane 5:22; BaHebrayo 6:20.

Ulakonzya kukomba kufumbwa chiindi

10. Kuli chiimo cheelede kutobelezegwa na chiindi nitukomba? Pandulula.

10 Kuli chiimo cheelede kutobelezegwa na chiindi nitukomba? Peepe, Jehova tatukumbili kuti tufugame, tukkale aansi, naa kuti twiimikile chiindi nitukomba. IBbayibbele lituyiisya kuti tulakonzya kwaambuula aJehova kufumbwa muchiimo chitondeezya bulemu. (1 Makani 17:16; Nehemiya 8:6; Daniele 6:10; Marko 11:25) Chintu chiyandikana kuli Jehova, teechiimo cheelede kutobelezegwa pe, pesi nkwaambuulaawe katubombede mumoyo. Tulakonzya kukombela ajulu naa katuumwine kufumbwa mputubede alimwi kufumbwa chiindi sikati amansiku. Chiindi  nitukomba kuli Jehova, tulachoonzyo chakuti ulakonzya kutumvwa nikuba kuti twakombela mumoyo.Nehemiya 2:1-6.

11. Nzezili zimwi zintu nzitukonzya kubuzya Jehova?

11 Niinzi nchitunga tulakombela? Tulakonzya kukombela zintu nzituyanda zitambulika kuli Jehova. IBbayibbele lyaamba kuti: “Na twakumbila kufumbwa cintu cili buti mbuli makanze aakwe, ulatumvwa.” (1 Johane 5:14) Zilachita na kukombela zintu nzituyanda? Iiyi. Kukomba kuli Jehova kweelede kuba mbuli kwaambuula amweenzinyokwe nguyandisya. Tulakonzya kumubuzya Jehova kufumbwa nzituyeeya azili mumyoyo yesu. (Intembauzyo 62:8) Tulakonzya kukombela kuti atupe muuya wakwe uusalala kutegwa utugwasye kuchita zili kabotu. (Luka 11:13) Alubo tulakonzya kukumbila Jehova kuti atupe busongo kutegwa tukonzye kusala kabotu, alimwi tulakonzya kukombela kuti atupe nguzu zyakuliyumya mubuyumu-yumu. (Jakobo 1:5) Tweelede kukumbila Jehova kuti atulekelele zibi zyesu. (BaEfeso 1:3, 7) Tweelede kukombela bamwi kuswaanizya mpuli zyesu, bakwesu abachizi bamumbungano.Incito 12:5; BaKolose 4:12.

12. Niinzi nzitweelede kubikka mubusena bwakusaanguna munkombyo zyesu?

12 Niinzi nzitweelede kubikka mubusena bwakusaanguna munkombyo zyesu? NguJehova amakanze aakwe. Tweelede kumulumba zizwaansi aamoyo akaambo kazintu zibotu nzyaakatuchitila. (1 Makani 29:10-13) Eezi tulizizi nkaambo Jesu wakayiisya basikwiiya bakwe mbukukombwa naakali aanyika. (Bala Matayo 6:9-13.) Wakaamba kuti bakeelede kusaanguna kukombela zina lyaLeza kuti lisalazigwe, alimwi lyakeelede kubonwa kalisalala. Mpawo Jesu wakatondeezya kuti tweelede kukombela Bwaami bwaLeza kuti buboole akuti kuyanda kwaJehova kuchitwe munyika yoonse. Jesu wakaamba kuti tweelede kukombela nzintu ziyandikana saansi mpawo nitutakumbile  zintu nzituyanda. Ikuti twabikka Jehova akuyanda kwakwe mubusena bwakusaanguna munkombyo zyesu, tunooli katutondeezya zintu ziyandikana loko mubuumi.

13. Inkombyo zyesu zyeelede kulampa biyeni?

13 Inkombyo zyesu zyeelede kulampa biyeni? IBbayibbele talitubuzyi pe. Inkombyo zyesu zilakonzya kuba zilamfu naa zifwiifwi alimwi ziyaa bukkale bwaziimo. Muchikozyano, tulakonzya kukomba nkombyo mfwiifwi katutanalya, pesi tulakonzya kukomba nkombyo ndafu chiindi  nitubuzya Jehova atala ambutulimvwa naa kumulumba. (1 Samuele 1:12, 15) Tatuyandi pe kuba mbuli bantu bamuchiindi chaJesu bakali kukomba nkombyo ndamfu akaambo kakuyanda kubonwaa bamwi. (Luka 20:46, 47) Jehova tabotezegwi ankombyo zili boobo. Chiyandikana kapati kuli Jehova nchakuti tukombe zizwa mumoyo wesu.

14. Tweelede kukomba tungane, alimwi eezi zituyiisyaanzi atala aJehova?

14 Tweelede kukomba tungane? Jehova ututamba kuti twaambuulaawe chiindi choonse. IBbayibbele litubuzya kuti tweelede ‘kuzumanana kukomba,’ “akujatisya kukomba,” alimwi ‘akukomba cakutaleka.’ (Matayo 26:41; BaRoma 12:12; 1 BaTesalonika 5:17) Jehova ulilibambilide kutuswiilila chiindi choonse. Tulakonzya kumulumba mazuba oonse akaambo kaluyando abuuya bwakwe. Tulakonzya  kumukumbila kuti atuzulwide, atusimye, alimwi atuumbulizye. Ikuti katulumba chachoonzyo chilongezyo nchitujisi chakukomba kuli Jehova, tuyoobelesya chiindi chiingi chakwaambuulaawe.

15. Nkaamboonzi nitweeelede kwaamba kuti “ameni” nitwamana kukomba?

15 Nkaamboonzi nitweelede kwaamba kuti “ameni” nitwamana kukomba? Ibbala lyakuti “ameni” lyaamba kuti “nichoonzyo” naa kuti “akube boobo.” Ninzila yakutondeezya kuti nzitwaamba munkombyo zyesu, tuli aachoonzyo anzizyo. (Intembauzyo 41:13) IBbayibbele lituyiisya kuti kuli kabotu kwaamba kuti “ameni,” kakutakwe kuti twaambila mujulu naa kuti twaambila mumoyo, kumamanino aankombyo yabantu biingi kutondeezya kuti tulazizumina zyaambwa.1 Makani 16:36; 1 BaKorinto 14:16.

LEZA MBASANDULA NKOMBYO ZYESU

16. Jehova ulazisandula na choonzyo nkombyo zyesu? Pandulula.

16 Jehova ulazisandula na choonzyo nkombyo zyesu? Nisimpe, ulazisandula. IBbayibbele limwaamba kuti ‘Uuswiilila zikombyo.’ (Intembauzyo 65:2) Jehova ulaswiilila alimwi ulazisandula nkombyo zyachoonzyo zyamamiliyoni aabantu, alimwi uzichita munzila zisiyene-siyene.

17. Jehova ubabelesya biyeni bangelo ababelesi bakwe aanyika kutegwa asandule nkombyo zyesu?

17 Jehova ubelesya bangelo abantu bakwe aanyika kutegwa asandule nkombyo zyesu. (BaHebrayo 1:13, 14) Kuli zikozyano zyiingi zyabantu bakakombela kuti bagwasigwe kumvwisisisya Bbayibbele alimwi teekwakaba chiindi pe mpawo bakaswayigwa aBakamboni baJehova. IBbayibbele lilatutondeezya kuti bangelo abalabo balijatikizidwe mukwaambilizya “makani mabotu” munyika yoonse. (Bala Ciyubunuzyo 14:6.) Alubo, bwiingi bwesu twakaakombela mapenzi aatugeme naa nzituyanda kuli Jehova,  mpawo twakajana lugwasyo ndutwakali kuyanda kuzwa kumukwesu naa kumuchizi muKristu.Tusimpi 12:25; Jakobo 2:16.

Jehova ulakonzya kusandula nkombyo zyesu kwiinda mulugwasyo ndutujana kuli bamwi bachiKristu

18. Jehova uwubelesya biyeni muuya wakwe uusalala alimwi aBbayibbele kuti asandule nkombyo zyesu?

18 Jehova ubelesya muuya wakwe uusalala kutegwa asandule nkombyo zyesu. Ikuti twakombela kugwasigwa kulwana penzi, ulakonzya kubelesya muuya wakwe uusalala kuti utuzulwide akuti utusimye. (2 BaKorinto 4:7) Alubo Jehova ubelesya Bbayibbele kusandula nkombyo zyesu alimwi akutugwasya kuti tusale chabusongo. Chiindi nitubala Bbayibbele, tulakonzya kujana magwalo aatugwasya. Alubo Jehova ulakonzya kusungwaazya umwi kuti asandule nzituyanda kumvwa kumiswaangano, naa kuti mwaalu wamumbungano ulakonzya kutubuzya amwi makani aagwasya aazwa muBbayibbele.BaGalatiya 6:1.

19. Nkaamboonzi nikunga kulakonzya kubonekaanga Jehova tanazisandula pe nkombyo zyesu?

19 Pesi chimwi chiindi ulakonzya kugamba kuti, ‘Nkaamboonzi Jehova natazisanduli chakufwambaana nkombyo zyangu?’ Yeeya kuti, nguuzi chiindi akuti uzisandula biyeni nkombyo zyesu. Ulizizi nzituyanda. Tulakonzya kweendelela kunembo kunookomba zitondeezya kuti tuli aachoonzyo anzitulii kumubuzya alimwi akumutondeezya kuti tuli aalusyomo muli nguwe. (Luka 11:5-10) Chimwi chiindi Jehova usandula nkombyo zyesu munzila njitutayeeyeli pe. Muchikozyano, tulakonzya kukomba atala abukkale buyumu, pesi muchiindi chakuti agwisye penzi eelyo, ulakonzya kutupa nguzu zyakuti tuliyumye mupenzi eelyo.Bala BaFilipi 4:13.

20. Nkaamboonzi nitweelede kukomba kuli Jehova chiindi choonse?

20 Nchilongezyo chipati biyeni chigambya nchitulaacho chakukomba kuli Jehova! Tulakonzya kubaa choonzyo chakuti unootuswiilila. (Intembauzyo 145:18) Ikuti twiinkilila kunembo kukomba kuli Jehova kazizwaansi aamoyo, bweenzuma bwesu anguwe buyoosima loko.