Skip to content

Skip to table of contents

 CHAANDANO 8

Bwaami bwaLeza Niinzi?

Bwaami bwaLeza Niinzi?

1. Njiili nkombyo izibikene njitutalange-lange?

MAMILIYONI abantu balizi nkombyo izibikene iiyitwa kuti, Taateesu ooli kujulu naa kuti iNkombyo yaMwaami. Jesu wakabelesya nkombyo eeyi kukuyiisya basikwiiya bakwe kukomba. Wakali kukombelaanzi? Alimwi nkaamboonzi inkombyo eeyi niiyandikana loko kuli ndiswe mazuba aano?

2. Nzeezili zintu zitatu Jesu nzyaakatuyiisya kuti tuzikombele?

2 Jesu wakati: “Mbuboobu mbumweelede kukomba: ‘Taatesu ooli kujulu, alilemekwe izina lyako [alisalazigwee]. Abuze Bwami bwako, alucitwe luyando lwako, ansi ano mbubonya mbuli kujulu.’” (Bala Matayo 6:9-13.) Nkaamboonzi Jesu naakatuyiisya kukombela zintu eezi zitatu?—Langa Makani Aakumamanino 20.

3. Niinzi nchituyanda kuziba atalaa Bwaami bwaLeza?

3 Twayiiya kuti Jehova ndezina lyaLeza. Alimwi twaambuula atalaa makanze aLeza ngalaawo atalaa bantu alimwi anyika. Pesi Jesu wakaambaanzi aawo nakati: “Abuze Bwami bwako”? Tuyooyiiya kuti niinzi chitegwa Bwaami bwaLeza, buyoochitaanzi, akuti buyolilemeka biyeni zina lyaLeza.

BWAAMI BWALEZA NIINZI?

4. Bwaami bwaLeza niinzi, alimwi ngwani Mwaami waBwaami oobo?

4 Jehova wakabikka mfulumende yakwe yakujulu akusala Jesu kuti abe Mwaami. IBbayibbele liita mfulumende eeyi kuti Mbwaami bwaLeza. Jesu “Mwami wabami, Mweendelezi wabeendelezi.” (1 Timoteo 6:15)  Jesu ulakonzya kuchita zibotu kwiinda mweendelezi wabantu uuli woonse uutegwa uchita kabotu, alimwi ujisi manguzu miingi loko kwiinda beendelezi boonse bali munyika.

5. Bwaami bwaLeza buyooyendelezya kabuli kuli? Alimwi buyooyendelezyaanzi?

5 Mazuba aali makumi one kuzwa Jesu naakabusigwa, Jesu wakabweeda kujulu. Kuzwaawo, Jehova wakamusala kuba Mwaami waBwaami oobo. (Incito 2:33) Bwaami bwaLeza buyooyendelezya nyika yoonse kabuli kujulu. (Ciyubunuzyo 11:15) Nkikaambo iBbayibbele nchilibwiita kuti “Bwami bwakujulu.”2 Timoteo 4:18.

6, 7. Niinzi chichita kuti Jesu abe mwaami uuli kabotu kwiinda baami boonse bali munyika?

6 IBbayibbele lyaamba kuti Jesu nguumwaami mupati kwiinda boonse nkaambo ‘nguwe alikke uutafwi.’ (1 Timoeo 6:16) Bantu banga baba beendelezi ngabasika mpubanga bazoofwa, pesi Jesu taakwe natazoofwe pe. Zintu zyoonse zibotu Jesu nzyatakatuchitile tazikoyoomana pe.

7 Ibusinsimi bwaBbayibbele bwaamba kuti Jesu uyooba Mwaami uuli kabotu alimwi uulaa luzyalo. “Uyookalwa Muuya wa-Jehova, Muuya wabusongo awakuswiililisya, Muuya walulayo awanguzu, Muuya waluzibo awakulemeka Jehova. Uyookondwa kulemeka Jehova. Takooyoobeteka kukuyeeya zintu ziboneka kumeso buyo, nikuba kukosola makani cakuzuminina majwi ngaamvwa kumatwi buyo. Uyoobeteka bacete cakululama, akukosweda batengwana banyika makani aaelede.” (Isaya 11:2-4) Tuyandi na kuti mwaami wenu kali boobo?

8. Tuzi biyeni kuti Jesu takoyooyendelezya kali aalikke?

8 Leza wakasala bamwi bantu kuti bakalele aJesu  mumfulumende yakujulu. Muchikozyano, mwaapostolo Paulo wakabuzya Timoteo kuti: “Kuti twakakatila tuyooendelezya awe.” (2 Timoteo 2:12) Mbangani batakalele kabali baami antoomwe aJesu?

9. Mbangani batakalele aJesu? Alimwi Leza wakatalika lili kubasala?

9 Mbuli mbutwakayiiya kuzwa muchaandano 7, mwaapostolo Johane wakapegwa chitondeezyo aawo naakabona Jesu kali Mwaami kujulu abamwi baami bali 144 000. Mbaani bategwa bali 144 000? Johane upandulula kuti: “Bakalijisi izina lyakwe azina lyawisi lilembedwe ankumu zyabo.” Alimwi wakayungizya kati: “Mbimbabo batobela Mwanambelele koonse nkwaya. Mbimbabo bakasaanguna kunununwa akati kabantu.” (Bala Ciyubunuzyo 14:1, 4.) Bali 144 000 maKristu basyomeka bakasalwaa Leza kuti ‘bakeendelezye aansi’ antoomwe aJesu. Ikuti bafwa, ngababusigwa kutegwa bakapone kujulu. (Ciyubunuzyo 5:10) Kuzwa muchiindi chabaapostolo, Jehova uchisala maKristu basyomeka kutegwa bakabe kabunga kabaami bali 144 000.

10. Nkaamboonzi niluli luyando lwaJehova kuti Jesu abali 144 000 bakeendelezye bantu?

10 Jehova ulaandaaba loko andiswe zyakuti wakachita bubambe bwakuti bantu bakakonzye kweendelezya aJesu. Jesu uyooba mweendelezi mubotu nkaambo ulikuzi kuba kwesu. Wakapona mbuli muntu alimwi wakaswaanana abuyumu-yumu. Paulo wakaamba kuti Jesu ulatufwida luzyalo, “uutakonzya kutweetelela mukulengauka kwesu,” alimwi “uwakasunkwa mbubonya mbuli ndiswe.” (BaHebrayo 4:15; 5:8) Bali 144 000 abalabo balikuzi kupona mbuli bantu. Abalabo bakalwana akutamaninina amachise mbuli ndiswe. Munzila eeyo, tulakonzya kubaa choonzyo  chakuti Jesu abali 144 000 bayoomvwisisisya nzila njitulimvwaayo amapenzi ngituswaana.

BWAAMI BWALEZA BUYOOCHITAANZI?

11. Nkaamboonzi Jesu naakayiisya basikwiiya bakwe kukombela kuyanda kwaLeza kuti kuchitike kujulu?

11 Jesu wakayiisya basikwiiya bakwe kuti bakombele kuyanda kwaLeza kuti kuchitike kujulu. Nkaamboonzi? Muchandano 3 twakayiiya kuti Saatani Diabolosi wakapapila Jehova, mpawo Jehova wakazumizya Saatani abangelo batasyomeki naa kuti madimoni kuti bakkale kujulu kwakayindi kaniini kuzwa chiindi naakapapila. Teeboonse pe bangelo bakali kuchita kuyanda kwaLeza kujulu. Muchandano 10, tuyooyiiya zyiingi atala aSaatani amadimoni aakwe.

12. Nziizili zintu zibili zyakacitika zyaambidwe muli Ciyubunuzyo 12:10?

12 Nikuba boobo, iBbayibbele lipandulula kuti Jesu naakaba Mwaami waBwaami bwaLeza, wakali kuyoolwanaa Saatani. (Bala Ciyubunuzyo 12:7-10.) Ivesi 10 ipandulula zintu zibili zyakachitika. Bwaami bwaLeza bwakatalika kweendelezyegwaa Jesu Kristu kali Mwaami, alimwi Saatani wakatandwa kujulu akuwalilwaansi. Mbuli mbututakayiiye, eezi zyakachitika kale.

13. Niinzi chakachitika kujulu aawo Saatani naakaandwa?

13 IBbayibbele lipandulula kubotelwa kwakajanwa abangelo basyomeka chiindi Saatani amadimoni aakwe nibakaandwa kujulu. Tubala kuti: “Amusekelele nomajulu, anywebo nomukala mulingao!” (Ciyubunuzyo 12:12) Lino kuli luumuno alujatano kujulu nkaambo boonse bachita kuyanda kwaLeza.

Kuzwa chiindi Saatani amadimoni aakwe nibakaawaalwa ansi kuzwa kujulu, kwakaba mapenzi miingi loko munyika. Mapenzi aaya ayoomana lino-lino

14. Niinzi chiliikuchitika anyika akaambo kakwandwa kwaSaatani kujulu?

14 Pesi buumi munyika bulisiyene akujulu. Bantu  bachitikilwaa zintu zibi nkaambo ‘Diabolosi wamuselukila,’ “abukali bupati, nkaambo ulizi kuti ciindi ncajisi nciniini buyo.” (Ciyubunuzyo 12:12) Saatani unyemede loko akaambo kakwaandwa kujulu, ulizi kuti muchiindi chiniini uyoonyonyoonwa. Ulachita kufumbwa nzyakonzya kuti achite zibi amapenzi munyika yoonse.

15. Leza ulaamakanzeenzi atala anyika?

15 Nikuba boobo makanze aaLeza atala anyika taanachincha pe. Uchiyanda kuti bantu bamaninide bakapone akutamani munyika yaparadayizi. (Intembauzyo 37:29) Aboobo, Bwaami bwaLeza buyoozichita biyeni eezi?

16, 17. Lugwalo lwaDaniele 2:44 lutubuzyaanzi atala aBwaami bwaLeza?

16 Businsimi bujanika muli Daniele 2:44 bwaamba kuti: “Lino mumazuba aabaami abo, Leza wakujulu uyoobusya bwami butakooyoonyonyoonwa abuniini mane kutamani, anguzu zyabo tazikooyoosiilwa bambi. Obo bwami buyoopwayaula akumanisya maami aya oonse, alimwi bwalo buyooyima nji kukabe kutamani.” Businsimi oobu butuyiisyaanzi atala aBwaami bwaLeza?

17 Chakusaanguna, butubuzya kuti Bwaami bwaLeza buyootalika kulela “kumazuba aabaami abo.” Eezi zyaamba kuti mfulumende zimwi zichinooliwo aanyika aawo Bwaami bwaakutalika kulela. Chabili, butubuzya kuti Bwaami bwaLeza buyookkala lyoonse tabukoyoopegwa imwi mfulumende. Chatatu, kuyooba nkondo aakati kaBwaami bwaLeza amfulumende zyanyika. Bwaami bwaLeza buyoozunda alimwi bukabe mfulumende ayilikke iyooyendelezya nyika. Mpawo bantu  bayooyendelezegwaa mfulumende iili kabotu njibatanabaa buunsi babaayo pe.

18. Litegwani zina lyankondo yamamanino iyooba aakati kaBwaami bwaLeza amfulumende zyanyika?

18 Bwaami bwaLeza buyooyilela biyeni nyika yoonse mbiizulwa? Kayitana saanguna nkondo yamamanino iitegwa Armagedoni, madimoni ayooyena ‘bami boonse banyika, kuti akababungike kunkondo yabuzuba bupati bwa-Leza Singuzuzyoonse.’ Nisimpe, mfulumende zyabantu ziyoolwanaa Bwaami bwaLeza.Ciyubunuzyo 16:14, 16; langa Makani Aakumamanino 10.

19, 20. Nkaamboonzi nituyanda kuti Bwaami bwaLeza buzoolele nyika yoonse?

19 Nkaamboonzi nituyanda Bwaami bwaLeza? Kuli twaambo tutatu. Kakusaanguna, tuli basizibi, aboobo tulachiswa akufwa. Pesi iBbayibbele lyaamba kuti mubulelo bwaBwaami bwaLeza, tuyoopona kukabe kutamani. Lugwalo lwaJohane 3:16 lwaamba kuti: “Nkaambo obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi butamani.”

20 Kaambo kabili katondeezya nchitubuyandila Bwaami bwaLeza nkakuti, tuzyungulukidwe aabantu babi. Biingi balabeja, balabbida alimwi tabalilemeki pe. Swebo lwesu tatukonzyi pe kubagwisya, pesi Leza uzoobagwisya. Bantu bayendelela kunembo kabachita zibi bayoonyonyoonwa ankondo yaArmagedoni. (Bala Intembauzyo 37:10.) Kaambo katatu nchitubuyandila Bwaami bwaLeza nkakuti, mfulumende zyabantu tazikwe nguzu, zilaalunya, naa kutalulamisya. Tazikwe chiyandisyo chakugwasya bantu kuti baswiilile Leza. IBbayibbele lyaamba kuti “muntu naendelezya muntunyina kukumubisizya.”Mukambausi 8:9.

21. Bwaami buyoochita biyeni kuti kuyanda kwaLeza kukachitwe aanyika?

 21 Yaakwiinda nkondo yaArmagedoni, Bwaami bwaLeza buyoolanga-langa akubona kuti kuyanda kwaLeza kwachitwaa nyika. Muchikozyano, buyoogwisya Saatani amadimoni aakwe. (Ciyubunuzyo 20:1-3) Taakwe nikuyooba muntu uuchiswa nikuba kufwa. Akaambo kachinunuzyo, bantu boonse basyomeka bayoopona akutamani muparadayizi. (Ciyubunuzyo 22:1-3) Bwaami buyoosalazya zina lyaLeza. Zyaambaanzi eezi? Zyaamba kuti mfulumende yaLeza yaakulela nyika, bantu boonse bayoolemeka zina lyaJehova.—Langa Makani Aakumamanino 21.

NDIILILI JESU NAAKABA MWAAMI?

22. Tuzi biyeni kuti Jesu taakaba Mwaami aawo naakali aanyika nikuba chiindi naakabusigwa?

22 Jesu wakayiisya basikwiiya bakwe kukomba: “Abuze Bwami bwako.” Aboobo zyakali aantanganana kuti mfulumende yaLeza yakali kuzoosika kumazuba aali kunembo. Chakusaanguna Jehova wakali kuzoobikka mfulumende yakwe akubikka Jesu kuba Mwaami wayo. Jesu naakabweeda kujulu wakaba Mwaami na mpawo-mpawo? Peepe, wakeelede kuti alindile saansi. Chimwi  chiindi Jesu naakabusigwa, Petro a Paulo bakabikka aantanganana aawo nibakabelesya businsimi bujanika muli Intembauzyo 110:1 bwaambuula atala aJesu. Mubusinsimi oobu Jehova wakati: “Kala kujanza lyangu lyalulyo mane nkacite basinkondonyoko babe citandabalilo camatende aako.” (Incito 2:32-35; BaHebrayo 10:12, 13) Jesu wakeelede kumulindila chiindi chilamfu biyeni Jehova kuti amubikke kuba Mwaami?

Bwaami bwaLeza buyoobona kuti kuyanda kwaLeza kwachitwa aansi aano

23. (a) Ndiilili Jesu naakatalika kulela kali Mwaami wamfulumende yaLeza? (b) Muchaandano chitobela tuyooyiiyaanzi?

23 Kwaaminyaka miingi 1914 katanasika, kabunga kamaKristu bakamvwisisya kuti wakali munyaka uyandikana mubusinsimi bwaBbayibbele. Izyakachitika zyaNyika kuzwa mu 1914 zyakatondeezya kuti zyakali zyachoonzyo. Mumunyaka ooyo, Jesu wakatalika kulela kali Mwaami. (Intembauzyo 110:2) Kuzwaawo, Saatani wakawalilwa aansi ano munyika, alimwi lino “ulizi kuti ciindi ncajisi nciniini buyo.” (Ciyubunuzyo 12:12) Muchaandano chitobela, tulabona zimwi zintu zitondeezya kuti tupona muchiindi eecho. Alubo tuyooyiiya kuti lino-lino Bwaami bwaLeza buyobona kuti kuyanda kwaLeza kwachitwa munyika.—Langa Makani Aakumamanino 22.