Skip to content

Skip to table of contents

 CHAANDANO 5

Chinunuzyo—Chipo Chipati Chizwa Kuli Leza

Chinunuzyo—Chipo Chipati Chizwa Kuli Leza

1, 2. (a) Niinzi chitondeezya kuti chipo chilayandikana kulinduwe? (b) Nkaamboonzi chinunuzyo nichili chipo chipati chizwa kuli Leza?

NCHIPOONZI chiyandikana nchwaakatambula? Chipo tacheelede kuba chidula kuti chihyandikane kulinduwe. Ikuti chipo kachikubotezya naa kuti kochiyanda nga watondeezya kulumba.

2 Muli zyoonse zipo Leza nzyaakatupa, kuli chipo choomwe nchituyandisisya kwiinda zimwi zipo. Nchipo chipati nchakapa bantu. Mbuli mbutuloyiiya muchaandano eechi, Jehova wakatuma Mwanaakwe, Jesu Kristu, kuti tupone kukabe kutamani. (Bala Matayo 20:28.) Kwiinda mukututumina mwanaakwe Jesu Kristu aanyika, Jehova wakatondeezya kuti ulatuyanda.

CHINUNUZYO NIINZI?

3. Nkaamboonzi bantu nibafwa?

3 Chinunuzyo ninzila yaJehova yakwaangununa bantu kuzwa muchibi amulufu. (BaEfeso 1:7) Kuti tumvwisisisye kaambo chinunuzyo nichiyandikana, tweelede kuziba zyakachitika mumunda waEdeni kwaminyaka miingi yakiinda. Bazyali besu bakusaanguna, Adamu aEva, bakabiisya. Akaambo kakubisya kwabo, bakazoofwa. Tulafwa nkaambo kakuti twakakona chibi kuzwa kuli Adamu aEva.—Langa Makani Aakumamanino 9.

4. Adamu wakalini alimwi niinzi nchaakali aacho?

4 Aawo Jehova naakalenga mwaalumi wakusaanguna, Adamu, Wakamupa chintu chiyandikana loko.  Wakapa Adamu buumi bumaninide. Wakalaa mizeezo amubili uumaninide. Taakwe naakali kuzoochiswa, kuchembaala, alimwi akufwa. Akaambo kakuti Jehova nguwe wakamulenga, Leza wakali mbuli wisi. (Luka 3:38) Chiindi choonse Jehova wakali kwaambuulaa Adamu. Chaantanganana, Jehova wakaambila Adamu nchaakali kulangila kuzwa kuli nguwe. Alimwi wakapa Adamu mulimu wakuchita uubotezya.Matalikilo 1:28-30; 2:16, 17.

5. Zyaambaanzi kuti Adamu wakalengwa “mucinkonzya ca-Leza”?

5 Adamu wakalengwa “mucinkonzya ca-Leza.” (Matalikilo 1:27) Jehova wakamupa bube buli mbuli Bwakwe, buswaanizya luyando, busongo, kululamisya, anguzu. Wakapa Adamu cheelelo chakusala. Adamu taakali lobbooti pe. Leza wakamulenga kali acheelelo chakukonzya kusala kuchita chibotu naa chibi. Kaansinga Adamu wakasala kuswiilila Leza, wakali kuzoobaa buumi butamani muParadayizi.

6. Adamu wakasweekelwaanzi chiindi naakataswiilila Leza? Eezi zitujatikizya biyeni?

6 Adamu naakataswiilila Leza wakatongelwa lufu, ooku kwakali kusubulwa kupati. Wakasweekelwa abweenzinyina buli kabotu aJehova, buumi bumaninide, amuunzi uuli Paradayizi. (Matalikilo 3:17-19) Adamu aEva bakasala kutaswiilila Leza, akaambo kaako bulangilizi bwakamana. Akaambo kazintu Adamu nzyaakachita, “mbuboobu cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya oobo lufu mbulwakazida bantu boonse, nkaambo kakuti boonse babisya.” (BaRoma 5:12) Adamu naakabisya, ‘wakalisambala’ kubikkilizya andiswe mubuzike bwachibi alufu. (BaRoma 7:14) Iswe tulaabo na bulangilizi? Nisimpe, tulaabo.

7, 8. Chinunuzyo niinzi?

 7 Chinunuzyo niinzi? Inkani yachinunuzyo iswaanizya zintu zibili. Chakusaanguna, chinunuzyo nimbadalo yakwaangununa muntu naa kubbadalila kuboozya chimwi chintu. Chabili, chinunuzyo muulo weendelana, naa muulo wachimwi chintu.

8 Taakwe muntu wakali kukonzya kubbadala kubisya kupati Adamu nkwaakachita, kwakatweetela lufu. Pesi Jehova wakatujulila nzila yakutwaangununa kuchibi alufu. Lino atwiiye nzila chinunuzyo mbuchibeleka akuti chitugwasya biyeni.

JEHOVA MBAAKATUPA CHINUNUZYO

9. Chinunuzyo nga chilabbadalwa biyeni?

9 Aakati kesu taakwe muntu uukonzya kubbadala chinunuzyo chabuumi bumaninide Adamu nchaakasweekelwa. Nkaamboonzi? Nkaambo kakuti toonse tatumaninide pe. (Intembauzyo 49:7, 8) Chinunuzyo chakali kuyandikana kubbadalwa bwakali buumi bwamuntu uumaninide. Nchichicho nchichitegwa ‘ncinunuzyo ceelene.’ (1 Timoteo 2:6) Chinunuzyo chakali kweendelana abuumi bumaninide Adamu mbwaakasweekelwa.

10. Jehova wakatupa biyeni chinunuzyo?

10 Jehova wakatupa biyeni chinunuzyo? Jehova wakatuma Mwanaakwe uyandikana loko aanyika. Mwana ooyu, Jesu, wakali chilenge chakwe chakutaanguna. (1 Johane 4:9, 10) Jesu wakali yandide kusiya Wisi ankwaakali kukkala kujulu. (BaFilipi 2:7) Jehova wakalonzya buumi bwaJesu kuzwa kujulu akumutola aanyika, alimwi Jesu wakazyalwa kali muntu uumaninide, uutakwe chibi.Luka 1:35.

Jehova wakatupa Mwanaakwe uyandikana loko kuti abe chinunuzyo chasu

11. Muntu omwe nga ulaba biyeni chinunuzyo chabantu boonse?

11 Muntu wakutaanguna, Adamu, wakasowa buumi bumaninide bwabantu boonse chiindi naakataswiilila  Jehova. Zilachita na kuti umwi muntu agwisye kufwa kuli mubana baAdamu boonse? Nisimpe. (Bala BaRoma 5:19.) Jesu, uutakwe nakabisya wakapa buumi bwakwe bumaninide kabuli chinunuzyo. (1 BaKorinto 15:45) Buumi bwakwe bumaninide bwakali kuzoobelesegwa kukugusya lufu kubana baAdamu boonse.1 BaKorinto 15:21, 22.

12. Nkaamboonzi Jesu nakeelede kupenzegwa oobu?

12 IBbayibbele lipandulula nzila Jesu njakamvwaayo katanafwa. Wakavwipuulwa chalunya, wakagankaminwa achisamu chakupenzegwa, alimwi wakalisimya-simya kukufwa lufu luchisa. (Johane 19:1, 16-18, 30) Nkaamboonzi Jesu nakeelede kupenzegwa oobu? Nkaambo Saatani wakaamba kuti taakwe muntu uukonzya kukkala kasyomekede kuli Leza pe kuti wasunkwa changuzu. Jesu wakatondeezya kuti muntu uumaninide ulakonzya kukkala kasyomekede kuli Leza, nikuba kuti waswananaa mapenzi mapati biyeni. Yeeyela kuti Jehova wakabotelwa biyeni azeezyo zyakachitwaa Jesu!Tusimpi 27:11; langa Makani Aakumamanino 15.

13. Chinunuzyo chakabbadalwa biyeni?

13 Chinunuzyo chakabbadalwa biyeni? Jesu wakapa Wisi muulo weendelana abuumi bwakwe. Mumunyaka wa33, muNisani 14 mukkalenda lyachiJuda. Jehova wakazumizya basinkondonyina kuti bajaye Jesu. (BaHebrayo 10:10) Nikwakayinda mazuba aatatu, Jehova wakabusya Jesu, kutali amubili wanyama pesi amubili wamuuya. Chiindi, Jesu naakabweeda kujulu kuli Wisi, wakapa buumi bwakwe bumaninide kuli Jehova kuti bube chinunuzyo. (BaHebrayo 9:24) Mbukunga chinunuzyo chakabbadalwa, tulaa choolwe chakwaangununwa kuchibi alufu.Bala BaRoma 3:23, 24

 MBUNGA ULAGWASIGWA ACHINUNUZYO

14, 15. Tweelede kuchitaanzi kuti zibi zyesu zilekelelwe?

14 Twakagwasigwa kale kuzwa kuchipo chaLeza chipati. Atubone kuti tugwasigwa biyeni lino akuti tuyoogwasigwa biyeni mumazuba aali kunembo.

15 Zibi zyesu zilalekelelwa. Nziyumu kuchita kabotu chiindi choonse. Chimwi chiindi Tulabisya; tulasowa mulomo naa kuchita zintu zitali kabotu. (BaKolose 1:13, 14) Ngatulalekelelwa biyeni? Tweelede kweempwa kuzintu zibi nzitwakabisya alimwi akukumbila Jehova kuti atulekelele. Kuti twachita oobo tulakonzya kubaa choonzyo kuti zibi zyesu zyalekelelwa.1 Johane 1:8, 9.

16. Tweelede kuchitaanzi kuti tube amanjezezya mabotu?

16 Tulakonzya kubaa manjezezya alikabotu. Kuti moyo wesu watubuzya kuti twabisya, nga tulimvwa katulaa mulandu, naa kulimvwa katutachigwasyi pe. Pesi tatweelede kulengwaana pe. Ikuti twakombelezya kuti Jehova atulekelele, tulakonzya kuba achoonzyo chakuti uyootuswiilila alimwi uyootulekelela. (BaHebrayo 9:13, 14) Jehova uyanda kuti twaambuule anguwe atala amapenzi alimwi akubula nguzu kwesu. (BaHebrayo 4:14-16) Mukuchitoobo, tujana mpindu yakubaa luumuno aLeza.

17. Nzilongezyoonzi zijanikaa kaambo kakuti Jesu wakatufwida?

17 Tulaa bulangilizi bwakupona kukabe kutamani. “Nkaambo cakuvola cazibi ndufu, pele caabilo ca-Leza mbuumi butamani bwamuli-Kristo Jesu Mwami wesu.” (BaRoma 6:23) Akaambo kakuti Jesu wakatufwida, tulaa choolwe chakupona kutamani katubotelwa abuumi bubotu bumaninide. (Ciyubunuzyo 21:3, 4) Niinzi nzitweelede kuchita kutegwa tukajane zilongezyo eezyo?

 UYOOCHITAMBULA NA CHINUNUZYO?

18. Tuzi biyeni kuti Jehova ulatuyanda?

18 Yeeya nzila moyo wako mbuubotelwa chiindi umwi muntu nakupa chipo chibotu. Chinunuzyo nchipo chiyandikana loko kwiinda zyoonse, aboobo tweelede kulumba Jehova akaambo kachipo chachinunuzyo. Lugwalo lwaJohane 3:16 lutwaambila kuti “Obuya Leza mbwaakayandisya nyika, wakapa Mwanaakwe simuzyalwa alike.” Nisimpe, Jehova ulatuyanda toonse zyakuti wakatupa Mwaanakwe uyandikana, Jesu. Alimwi tulizi kuti Jesu alakwe ulatuyanda, nkaambo wakali lipedelede kutufwida. (Johane 15:13) Chipo chachinunuzyo cheelede kukutondeezya kuti Jehova aJesu balakuyanda.BaGalatiya 2:20.

Mbutuyabwiiya atala aJehova, tuyooba beenzinyina alimwi kumuyanda kwesu kuyoosima

19, 20. (a) Nga ulachita biyeni kuti ube mweenzinyina waJehova? (b) Kujana watondeezya biyeni kuti ulachitambula chinunuzyo chaJesu chakulipeda?

19 Lino wayiiya atala aluyando lupati Leza ndwalaalo, pesi nga ulachita biyeni kuti ube mweenzinyina waJehova? Tachili chuuba-uba pe kuyanda umwi muntu ngutazi. Lugwalo lwaJohane 17:3 lwaamba kuti tulakonzya kumuziba Jehova. Nuya buchita oobo, kumuyandisya kwako kuyoosima, uyooyanda kumubotezya, alimwi uyooba mweenzinyina. Aboobo yinkilila kunembo kuliikwiiya atala aJehova kwiinda mukubala Bbayibbele.1 Johane 5:3.

20 Tambula chinunuzyo chaJesu chakulipeda. IBbayibbele lyaamba kuti “oyo uusyoma Mwana nguuli abuumi ubutamani.” (Johane 3:36) Zyaambaanzi kutondeezya lusyomo? Zyaamba kuchita eezyo Jesu nzyaakatuyiisya kuti katuzichita. (Johane 13:15) Tatukonzyi kwaambaa mulomo kuti tusyoma muli Jesu. Kuti tuchitambule chinunuzyo, tweelede kuchita chimwi chintu cheendelana  alusyomo lwesu. Aali Jakobo 2:26, tubala kuti: “Lusyomo lwaanzeene amilimo lulifwide mbubonya.”

21, 22. (a) Nkaamboonzi nitweelede kujanika kuKwiibuluka kufwa kwaKristu munyaka amunyaka? (b) Tuyooyiiyaanzi muzyaandano 6 a 7?

21 Janika kuchiibalusyo chalufu lwaJesu. Magolezya Jesu katanafwa, wakatuyiisya kuti tweelede kuyeeya lufu lwakwe. Tulakuchita kuyeeya ooku munyaka amunyaka, alimwi tukwiita kuti Nkwiibuluka naa kuti “Mulalilo wa-Mwami.” (1 BaKorinto 11:20; Matayo 26:26-28) Jesu uyanda kuti tuyeeye kuti wakapa buumi bwakwe bumaninide kabuli chinunuzyo. Wakaamba kuti: “Amukacite obo kuti mukandiyeeye.” (Bala Luka 22:19.) Chiindi nujanika kuchiibalusyo, anga utondeezya kuti ulachiyeeya chinunuzyo aluyando lupati Jehova aJesu ndubaalalo kuli ndiswe.—Langa Makani Aakumamanino 16.

22 Chinunuzyo nchipo chipati kuzipo zyoonse nzitukonzya kujana. (2 BaKorinto 9:14, 15) Chipo eechi chiyandikana chiyoogwasya mamiliyoni aabantu nikuba bawumi abafwide. Muzyaandano 6 a 7 tuyooyiiya mbukukonzeka.