Yona 4:1-11
4 Kpa kwagh ne doo Yona ga cii, shi ishima vihi un ker tsung.
2 Nahan a er msen hen Yehova a kaa ér: “Kpei, Yehova, ka kwagh u yange m lu ôron shighe u m lu ken tar wam ne gaa? Ka nahan ve yange m lu yevese yemen Tarshishi+ sha hiihii la ye; sha ci u m fa u ngu Aôndo u kunya u ker u a ior yô, u zungu mhôônom shi u vihin ishima fele ga, u ngu a dooshima kpishi;+ ka u gema awashima wou, u kera va a kwaghbo u u kaa wer u va a mi la ga.
3 Hegen yô, Yehova, wea lumun yô, tôô uma wam kera, gadia guda ma m kpe a u m lu uma her.”+
4 Tsô Yehova pine ér: “Ishima vihi u yum nahan, ka sha inja je kpa?”
5 Tsô Yona due ken gar la yem za tema vegher u sha ityoughkitaregh ki gar shon. A za er an-ate her sha ci na, a tema ker sha er una nenge kwagh u una er gar la yô.+
6 Maa Yehova Aôndo er ijôndough mende cir antyumbe u Yona tema ker la, sha u a gba un mure shi i yôhôr un iyol yô. Nahan doo Yona tsung er ijôndough kira gba un mure yô.
7 Kpa kpernan pepe pepe yô, Aôndo u mimi tindi ivungu va nyôr ya ijôndough kira, nahan ki use.
8 Iyange va hiin u duen yô, Aôndo shi tindi a ahumbe a tseen a sha ityoughkitaregh, nahan iyange ta Yona sha ityo je, lu nôngon u humen. Lu tômon ér ma un kpe, lu kaan ér, “Guda ma m kpe, a u m lu uma her.”+
9 Tsô Aôndo pine Yona ér: “Ishima vihi u sha kwagh u ijôndough kin yum nahan, ka sha inja je kpa?”+
Nahan Yona kaa ér: “Ishima vihim ka sha inja, i vihim je nyôr ken ku.”
10 Kpa Yehova kaa ér: “We yô, kunya kôr u a ijôndough ki u er tom sha mi ga, shi i lu we u ne ki mende kpaa ga; ki ki mende tugh môm shi ki kpe tugh mbugen la.
11 Nahan kpa mo yô, kunya u de kôron mo a Ninive, zegegar+ u ior ve lu ker i hembe 120,000, mba ve fe mkposo u kwagh u dedoo a kwagh u bo tsô kpaa ga,* kua uzendenya vev mba ve lu kpishi la ga yee?”+
Ngeren mba shin kpe
^ Shin “mba ve fe mkposo u uwegh vev ku iyanegh a ku imesegh ga.”
