Yoel 2:1-32
2 “Tôngo korough ken Shion!+
Ngor imo i utya sha icighan uwo wam.
Ior mba ve tem ken tar ne cii ve gbidye akarkase iyol,Sha ci u iyange i Yehova ngi van!+ I̱ zurum je!
2 Ka iyange i imegh, man i wan ime mgbigh mgbigh,+Ka iyange i abeen man angôghime,+Ngi er iwanger i sha use i i lu samber sha iwo nahan.
Ior mba, mba ve ngee iyenge shi ve lu a agee yô;+I gbe je ior mba a lu er ve nahan ga,Shi a tsa kpa ior vea kera lu er ve nahan gaZan zan sha ikyov ikyov cii.
3 Usu ngu hian ken hemen ve,Shi ken ijime ve kpa nomborusu ngu hian.+
Tar u u lu ve ken hemen la ngu er sule u Eden nahan,+Kpa taaikyôngo u kwagh a lu her ga yô gema ngu ve ken ijime,Nahan kwagh môm una fatyô u waren ga.
4 Mluashe ve ngu er mluashe u anyinya nahan,Shi ka ve yevese er anyinya a utya nahan.+
5 Iov ve ngi er iov i akekeautya a a lu tsuen sha ityouv mbi iwoogh yô,+Ngi er iov i zegeusu u a lu hian ayia baver nahan.
Iov ve ngi er iov i ior mba ageev mba ve mough u yemen ityav nahan.+
6 Vea na ishima ia nyian ior.
Ishigh ki hanma or kia tese ér cier nan iyol.
7 Ka ve za sha kume er ka mbautyaav nahan,Ka ve unde kpekpe er ushoja nahan,Hanmô ve ka nan zaan sha gbenda u nan,Shi mba kahan mba undun gbenda ve ga.
8 Mba te ken mbagen ga;Hanmô ve nan ze sha gbenda u nan.
Aluer ikyav mbi tswamev* wua mbagenev kpa,Mbagenev mbara mba hidi ijime ga.
9 Ka ve nyôr ken gar iuu, ve yevese sha kpekpe.
Ka ve unde sha ayou, ve nyôr sha uwindou er ormbaiv nahan.
10 Tar gbidye ikyarkyase iyol sha ishigh vev, shi usha kpa tenger.
Iyange man uwer wa ime,+Shi asan kpa kera wanger ga.
11 Yehova una ôr kwagh genger genger sha ishigh ki ikyumutya na,+ sha ci u ikyumutya na ngee tsung.+
Gadia Aôndo ngu eren kwagh u a kaa la, man un ka u ageegh;Sha ci u iyange i Yehova ka i vesen man i cieryol tsung.+
Ka an nana fatyô u wan ishima a ii?”+
12 Yehova ngu kaan nahan ér: “Hegen je kpa ne fatyô u hiden hen a mo a asema a en cii,+A kwaghyan u hôron+ man mliam man kwelegh.
13 Ande nen asema a en,+ i de lu akondo ga,+Nahan hide nen hen Yehova Aôndo wen,Sha ci u kunya ngu ker un a ior shi zungu mhôônom, vihin ishima fele ga,+ shi a ngee a dooshima kpishi je,+Nahan una kera va a kwaghbo u a we ishima u van a mi la ga.
14 Or fe ga, alaghga Yehova Aôndo wen una hide a hen sha mi, nahan una kera er kwagh u a we ishima la ga+Kpa una gema a na ne iveren,Man nagh ku sha samuyia man nagh ku kwaghman sha ci na.
15 Tôngo korough ken Shion!
Yôô ior ve hôr kwaghyan; shi lôhô ior icighanmkohol u vesen.+
16 Kohol ior shi wanger nongoior.+
Kohol nomso mba been iyol;* man mbayev kua anikyundanev mba man atumba.+
Orkwasehe a due ken iyou na i shin atô la, kwasehe kpa a due shin iyou na.
17 Upristi man mbatomov mba Yehova ve vaaHen atô u varenda man atse a nan nagh+ la ve kaa ér:
‘Kunya u kôr u a ior ou* Yehova;De deen wer i laha ior ou ga,Shi de deen wer akuraior a hemen ve ga.
Aluer kwagh ngu nahan yô, ior vea pine ér, “Aôndo ve ngu hana?”’+
18 Nahan Yehova una tese gbashima sha ci u tar naShi una zungwe ior nav mhôônom.+
19 Yehova una ungwa ior nav, una kaa ér:
‘Me na ne samuyia man wain u he man mkurem,A kuma ne gbing gbing;+Me kera de mer akuraior a laha ne ga.+
20 Me zenda orhyom u ken imbusutarimese la una gba ica a ven;Me zenda un una yem hen tar u u om shi kwaghmôm kpa a lu her ga yô,Una yem a ikyumutya na i i lu un ken hemen la, vegher u zegemnger u sha ityoughkitaregh la,*Man ikyumutya na i i lu un ken ijime la di, ia yem vegher u zegemnger u shin ityôtar* la.
Ikyom na ia huma,Shi ihyuma la ia samber ken tar la cii;+Gadia Aôndo una er akaa a kpilighyol.’
21 We tar, de cie ga.
I saan we iyol shi ember sha ci u Yehova una er akaa a kpilighyol.
22 Ne inyamtoho, de cie nen ga,Sha ci u toho u ken taaikyôngo la ua hide a hôm gese gese,+Shi ikyon ia ume atam;+Kon u tur man kon u wain vea ume atam kpishi kpee je.+
23 Ne ônov mba Shion, i saan ne iyol shi ember nen sha ci u kwagh u Yehova Aôndo+ una er la;Sha ci u una na ne ura u he sha inja vough,Shi una nôô ne ura kpishi,Shi una nôô ne ura u he man ura u fam, er vanden eren nahan.+
24 Avande a gbidyen iyiav aa iv a samuyia poo,Shi wain u he man mkurem vea iv shin ahungwa a shoghor ve la a kua inya.+
25 Shi me hide me na ne kwagh u ikpela i ikyomon, man ikyomon i i lu a mende ingyur ga,Man ikyomon i yan kwagh kpishi, man ikyomon i vihin kwagh ya ken anyom a karen la,Ka ikyumutya i vesen yam i m tindi hen a ven je la.+
26 Ne ya kwagh je ne ide,+Nahan ne wuese iti i Yehova Aôndo wen,+U a er akaa a kpilighyol sha ci wen la;Mayange a kera hee ior av ga.+
27 Nahan ne fa er mo m lu hen atô u Iserael yô+
Shi ne fa er mo m lu Yehova Aôndo wen+—mô ugen a lu ga yô!
Mayange a kera hee ior av ga.
28 A been yô, me haa jijingi wam+ sha hanma injaor cii,Nahan ônov enev mba nomso man mba kasev vea ôr kwaghôron u profeti,Mnyam ma a cie mbabeenyol enev,Shi agumaior a en aa nenge mbampase.+
29 Shi sha ayange la, me haa jijingi wamsha ikpan yam i nomso man i ukase la je kpaa.
30 Shi me er akaa a kpilighyol sha kwavaôndo man shin tar,Awambe man usu vea lu, shi mnyim ma a lu kpishi.+
31 A gema iyange ia hingir ime shi uwer ua hingir awambe+Cii man iyange i vesen man i cieryol i Yehova+ la ia va ye.
32 Nahan hanma or u nan yer sha iti i Yehova yô, a yima nan;+Sha ci u ior mba ve lu sha uwo u Shion man ken Yerusalem la vea war,+ vough er Yehova a kaa nahan,Mbawaren mbara vea lu mba Yehova a yer ve yô.”
