Yoel 1:1-20
1 Ka kwagh u Yehova ôr a Yoel* wan u Petuel je ne:
2 “Ungwa nen kwagh ne, ne mbatamen,Shi kegh nen ato, ne mba ne tem ken tar ne cii.
I lu nahan imbakwagh ne i er sha ayange a enShin sha ayange a uter enev vee?+
3 Ôr nen ônov enev mba nomso kwagh ne,Ônov enev mba nomso ve gema ve ôr ônov vev mba nomso,Ônov vev mba nomso di ve gema ve ôr kov ugen la.
4 Kwagh u yange ikyomon i vihin kwagh ya shi la, ikpela i ikyomon va ya;+Man kwagh u ikpela i ikyomon ya shi la, ikyomon i i lu a mende ingyur ga la va ya;Gema kwagh u ikyomon i i lu a mende ingyur ga ya shi la, ikyomon i yan kwagh kpishi la va ya kera.+
5 Nder nen, ne mba hunden msôrom,+ vaa nen!
Gber nen kwelegh, ne mba man wain cii,Sha ci u i dugh ne wain u nyohon sha zwa kera.+
6 Gadia ikyurior igen nyôr ken tar wam, ngi a agee shi i gande u ôron iyenge.+
Ngi a anyi a begha,+ shi azegher a i kpa ka a begha.
7 I̱ vihim kon u wain, shi i̱ gema kon u tur wam hingir ikpughurI̱ bugh ikyon ne avuu cica cii i̱ haa keraShi i̱ bugh avuu a agbaa a i cii hingir pupuu pung.
8 Gber nen kwelegh er iniunkwase i i hoo akondo a zungwen*Sha ci u nom u i u uye la nahan.
9 Nagh ku sha samuyia+ man nagh ku kwaghman+ bee hen iyou i Yehova;Upristi man mbatomov mba Yehova mba zungwen.
10 I vihi sule kera, inya kpa ngi zungwen;+Sha ci u i vihi samuyia kera, wain u he uma kera, shi mkurem kpa bee.+
11 Kunda mbasulev iyol, mbasôron ikyon i wain kpa gber kwelegh,Sha ci u alakema man barli;Gadia iyiav mbi i sondo la cii saa ishe.
12 Kon u wain uma kera,Shi kon u tur kpa use.
Kon u pomegraneti man ivile man kon u apu,Ikyon i ken sule cii uma kera;+Nahan kera saan ior iyol ga.
13 Haa nen akondo a zungwen* iyol, zungwe nen ne upristi;Gber nen kwelegh, ne mbaeren tom sha atse a nan nagh.+
Nyôr za yav nen a akondo a zungwen* iyol, ne mbatomov mba Aôndo wam;Sha ci u nagh ku samuyia+ man nagh ku kwaghman+ kera mba hen ya u Aôndo wen ga.
14 Yôô ior ve hôr kwaghyan; shi lôhô ior icighanmkohol u vesen.+
Kohol mbatamen imôngo, kua ior mba ken tar ne cii,Hen ya u Yehova Aôndo wen,+ za vaa nen a Yehova a wase ne.
15 Uwu, iyange la ia cieryol!
Gadia iyange i Yehova zurum,+Shi sha iyange la, Uhembanagee Cii una va a mtim!
16 I ngohol kwaghyan kera sha ashe a ase gaa?
Shi msaanyol man iember kpa kera mba ken ya u Aôndo wase ga.
17 Ve sagher inya a ushebul vev.
Ve nenge ishamakaa ve zulugh.
Ayou a koson iyiav nga gbilin, i hembe iuna sha ci u samuyia uma kera.
18 Uzendenya je kpa mba kinen!
Akumabua nga zenden gengee sha ci u ve zua a toho u yan ga!
Shi akumayôngo nga yan ican.
19 Yehova, ka we me yila ye;+Sha ci u usu hia toho u ken taaikyôngo cii,Shi nomborusu hia ikyon i ken sule cii.
20 Inyamkyume je kpa ngi keren we tsung,Sha ci u ukungwambamngerev uma keraShi usu hia toho u ken taaikyôngo cii.”
