Sefania 3:1-20
3 Kwagh a tser gar u hemban ato man u hôngorough u a kighir ior ne!+
2 A ungwa imo i or môm ga;+ a lumun tsaha ga.+
A suur sha Yehova ga;+ a kporom ikyua a Aôndo na kpaa ga.+
3 Mbahemenev nav ka ubegha mba tan kume.+
Mbaajiriv nav kpaa ka ugbaseela mba yaren ikyôr tugh;Kuhe u a ngegher tsô kpaa mba undun her ér sev mbu av ga.
4 Uprofeti nav cihi kwagh, ka ior mba lun a mimi iyol ga.+
Upristi nav ka ve hôngor a icighankwagh;+Shi ve per tindi.+
5 Yehova ka u perapera, ngu hen atô na;+ eren kwaghbo ga.
Hanma sev ka a pase ve ajiraôron a na,+Bundu ga er sev nahan.
Kpa or u eren perapera ga nan fe kunya ga.+
6 “M tim akuraior kera; ayou a ve a taven a sha zongo hingir ice.
M vihi ugodobi vev, or môm kera lu karen sha mi ga.
Agar a ve hingir alôgh, ma or u teman ker kera shi ga, or môm tsô kpaa ga.+
7 Nahan m kaa mer, ‘U ciam shi u lumun tsaha*+ wam kpee je,’Sha er a vihi ijiir na* i teman ga yô.+
Me tsaha un sha ci u akaa ne cii keng je.
Kpa hemba maan ve iyol a aeren a ve a dang cii.+
8 Yehova kaa ér, ‘Nahan veren nen ashe a mo,*+Zan zan iyange i me mough sha me ya ishar* la,Gadia awashima wam* yô, ka u kohol akuraior man ityartor imôngo,Sha er me haa iyugh yam cii sha a ve yô, ishimavihin yam i tsung la.+
Gadia iyugh yam i i lu er ka usu nahan la, ia na tar cii ua hia kera.+
9 Gadia hen shighe la me gema zwa u ior cii ua hingir zwa u wang,Sha er ve cii vea yilan sha iti i Yehova,Shi vea civir un ken mzough* yô.’+
10 Mbacivir mo, ior av mba i sambe ve la, vea vam a nagh,Hii hen haregh u uifi mba Etiopia la je.+
11 Sha iyange la, u ya kunya sha ci u akaa a u lu eren sha u hemban mo ato la ga,+Sha ci u hen shighe la me kar a mba kenden a iyol sha hen atô wou kera;Nahan mayange u kera gengese iyol sha icighanwo wam ga.+
12 Me de mbahiden a iyol ijime man mbagban ijime vea shi hen atô wou her,+Vea suur sha iti i Yehova.
13 Mbaiserael mba ve shi her la+ vea er kwagh u perapera;+Vea er aie ga, a zua a nombor u icughugh ken zwa ve ga;Vea ya kwagh vea yav inya, or môm nana ta ve mciem iyol ga.”+
14 Ngor sha iember we wankwase u Shion!
Ger amo a mhembe, we Iserael!+
I saan we iyol shi ember a ishima you cii, we wankwase u Yerusalem!+
15 Ka u Yehova a kera tsaha u ga.+
A zenda orhyom wou kera.+
Yehova, Tor u Iserael, ngu hen atô wou.+
U kera cia kwaghtseren ga.+
16 Sha iyange la a kaa a Yerusalem ér:
“De cie ga, we Shion.+
Ave a de kpen we ga.
17 Yehova Aôndo wou ngu hen atô wou.+
Una yima u, gadia Un ka u ageegh je.
Una ember sha kwagh wou tsung je.+
Una huan ving* sha ci u dooshima na la.
Una ember sha kwagh wou a atsam zwa.
18 Me kohol mba ve lu zungwen sha ci u ve va uiniongo ou ga la;+Yange ve lu ken a we ga sha ci u ihyeen i ve ya sha kwagh na la.+
19 Nenge! Hen shighe la, mba ve kighir we la cii me penda ve vanger;+Me yima orkeer,+Me kohol mba i sambe ve la.+
Me gema ve vea hingir kwagh u wuese man u duen itiKen ityar i ve ye kunya ker la cii.
20 Sha shighe la me hide a ven,Zum u me kohol ne imôngo la.
Gadia me gema ne ne hingir kwagh u duen iti, man u ior mba sha tar cii vea wuese,+Hen zum u me hide me kohol ior ou mba i yem a ve uikyangen la sha ashe a ou la,” ka kwagh u Yehova a ôr je la.+
