Sefania 1:1-18
1 Kwaghôron u Yehova u va hen Sefania* wan u Kushi wan u Gedalia wan u Amaria wan u Hesekia, sha ayange a Yoshia+ wan u Amon+ tor u Yuda la:
2 Yehova ngu kaan ér,+ “Me kar a hanma kwagh cii sha tar kera vindi vindi.”
3 “Me kar a or kua zendenya kera.
Me bee a inyon i purugh sha kwavaôndo man ishu i shin zegemnger,+Shi me kar a kwagh u nan gbeev mbu nôngon*+ kera a mbaaferev imôngo;Shi me kar a or sha tar kera,” ka kwagh u Yehova a ôr je la.
4 “Me naregh uwegh agh u tsahan YudaKua mba ve tem ken Yerusalem cii.
Shi me ese hanma ivurugh ki Baal ki ki shi her* cii hen ijiir ne kera,+Kua ati a upristi mba mbaaôndo mba akuraior agen, a upristi mbagen imôngo,+
5 Man mba ka ve gure sha toryoughough ve civir akaa a sha* la,+Kua mba ka ve gure ve bum a Yehova+Shi ve bumun a Malkam+ kpaa la;
6 Man mba ve gem ijime a Yehova ve de u dondon un la,+Kua mba ve de u keren Yehova shin pinen un kwagh la.”+
7 Huan ving sha ishigh ki Yehova Ter u Hemban Cii, sha ci u iyange i Yehova zurum.+
Yehova ngu a nagh ku a we iyol u nan yô; a tsegha mba a lehe ve la.
8 “Sha iyange i mo Yehova me lu nan nagh la, me tsaha mbahemenevKua ônov mba tor,+ man mba ve huan akondo a akuraior agen la cii.
9 Sha iyange la me tsaha hanma or u nan unden sha tsembe cii,*Ve mba ve iv iyou i orvesen ve a ipila man icugh la.”
10 Yehova shi kaa ér, “Sha iyange la, vaa ua kaa hen Hundagar u Ishu,+Mliam ma a ger hen Veghergar u sha Uhar la.+
Man ihyuran i vesen ia kaa sha agungu.
11 Gber nen kwelegh, ne mba ne tem hen Maketeshi la,*Sha ci u mbakasuav cii i bee a ve kera;*Mba ve karen myohom ma azurufa cii i tim ve kera.
12 Sha shighe la me kpe iyol me yenge Yerusalem a amenger,Me tsaha ior mba ve hee iyol inya la,* mba ve kaan ken ishima ve ér,‘Yehova una er kwagh u dedoo ga, kwagh u bo kpaa una er ga la.’+
13 A ya ishar sha inyaregh vev, uya vev vea hingir ice.+
Vea maa uya, kpa vea tema ker ga;Vea er ishule i wain kpa vea ma wain u i ga.+
14 Iyange i vesen i Yehova ngi ikyua ikyua!+
I zurum man ngi van fefa je!*+
Ihyuran i iyange i Yehova la cieryol.+
Hen shighe la orutya nana vaa tsung.+
15 Iyange la ka iyange i iyughugh,+Ka iyange i mnyoon u ken ishima man i ishimavihin,+Ka iyange i ijeverahumbe man i mtim,Ka iyange i imegh i wan ime mgbigh mgbigh,+Ka iyange i abeen wan ime man i angôghime,+
16 Ka iyange i tôngon korough man i geren amo a utya+Shi tan num sha agar a i maa a i kase yô, kua sha ayou a taven a sha zongo.+
17 Me va a ican sha uumace.
Vea lu zenden er ka mbaapirashe nahan,+Sha ci u ka mo Yehova je ve erem kwaghbo ye.+
Awambe a ve aa haa inya er ka ihyundu yô,Inyam ve ia* haa inya er ka akôngo nahan.+
18 Azurufa ve shin zanaria ve una fatyô u yiman ve sha iyange i iyugh i Yehova la ga;+Gadia iyugh na i i lu er ka usu nahan la, ia na tar ua hia kera,+Sha ci u una tim mba ve tem sha tar cii, man a lu mtim u cieryol je.”+
Ngeren mba shin kpe
^ Inja na yô ér, “Yehova Koso (Ngu Yehova a Inja).”
^ Ikyav tese ér ka akaa a a gbe a zough a akombo a civir la.
^ Shin “avindigh a Baal a a shi her.”
^ Shin “akum a sha.”
^ A̱ shi nan kpa ka tsembe u unden zan sha ikyônough ki torough.
^ Zwa Heberu, “i cir ve zwa.”
^ Alaghga lu ijiir igen hen Yerusalem i i lu ikyua a Hundagar u Ishu la yô.
^ Shin “mba ve kôrough er ka akase a wain a shin ityôshegh nahan la.”
^ Shin “ngi van torough torough.”
^ Zwa Heberu, “myam vem ma a.”
