Nahum 2:1-13
2 Or u saren kwagh va ityav sha a we* ve.+
Kura ugirgar.
Kura igbenda.
Wa iyol,* taver agbende a ou cii.
2 Gadia Yehova una hide a icivir i Yakob her,Kua icivir i Iserael kpaa,Sha ci u mbatimin akaa va tim ve,+Ve vihi agbaa a ve kera.
3 I nyian ipyerutya i mbaageev nav,Anomaior a na hua akondo a nyian jang.
Myôm ma sha akekeautya na mondo er ka usu nahanSha iyange i i lu wan iyol i utya la,Ushoja kôr awange a sha kon u yunipa mba jingir a mi.
4 Akekeautya nga yevese sha kume sha ugodobi.
Nga yevese kôndon shi senen sha ityembegar.
Ve wanger er ka akagh a usu a yeghen nahan.
Ve mondo er ka inyiar yô.
5 Una yila ukurmbautyaav nav.
Vea lu nôngon gbeev yemen.
Vea torough zan hen kpekpe na;Vea za wa akaa a yisan.
6 A bugh ihinda i uifi,Ya u tor una sough.*
7 I vande kuren kwagh ne kera: I tsen un tembe,I yem a na kera, ikpan i ukase na ngi kinen;Ngi kighir ave sha vanger* eren amo er ka mkungum nahan.
8 Kera cii Ninive+ lu er ka ityungumnger nahan,Kpa hegen ne mba yevese.
Mbagen mba kaan ér: “Tile nen! Tile nen!”
Kpa or môm ngu geman ashe ijime ga.+
9 Ya nen ishar i azurufa, ya nen ishar i zanaria!
Inyaregh nagh* de ishar.
I iv un a akaainjaa atô kposo kposo.
10 Gar cii huan, or kera ngu ker ga, a hingir ice!+
Asema a ve sough sha mcie, anu a ve nga kunden, akooso kpe ve;Ve cii ve hingir sha ishi zunguluu.
11 Ajiir a memen a begha shi nga hana,+ ape agumabegha a ye kwagh laa?
Ape begha ka a due a hemen wan na ve yemenA or u tan ve mciem iyol shio la.
12 Nombegha yange a ande inyam kpishi a haa ônov nav.
A kôr inyam sha ci u ungômbabegha.
A iv ubar nav a inyam,Ajiir a na a memen kpaa a inyam i a ande la.
13 “Nenge! M ngu num a we,” ka kwagh u Yehova u akum a sha a ôr je ne,+“Me nande akekeautya a ou cica cii,+Sanker una tim agumabegha a ou.
Me bee a kwagh u inyam you i yan sha tar kera cica cii,Mayange a kera ungwa imo i mbatyomov ou ga.”+
