Nahum 1:1-15
1 Mkaanem ma yôôn kwaghtseren sha Ninive.+ Ngun ka takeda u mpase u sha mnenge u Nahum* or u ken Elkoshi.
2 Yehova ka Aôndo u a soon ér i civir un tseegh+ shi a oron iyev yô;Yehova oron iyev shi ngu a kegh iyol u tesen ishimavihin na.+
Yehova ngu a or iyev sha mbahyomov nav,A ver iyugh ngi sha ci u mba ve ker un ihyom la.
3 Yehova vihin ishima fele ga+ shi ngu a tahav kpishi,+Kpa mayange Yehova una de tsahan mba i gbe u a tsaha ve la ga.+
Gbenda na ngu ken hiar man ijeverahumbe,Abeen ka ihyundu i shin angahar a na.+
4 Ka a zôhô a zegemnger,+ shi a uma un kera;Ka a er uifi cii ve uma.+
Bashan man Karmel ka ve use,+Uikparen mba Lebanon kpa ka ve use.
5 Iwo ka i gbidye akarkase iyol sha kwagh na,Agungu kpa ka a sough kera.+
Tar ua hingir kera ke kera sha ishigh nagh,Kua inya man mba ve tem sha i cii.+
6 Ka an nana fatyô u hendan kwagh a iyugh na?+
Man ka an nana fatyô u tilen sha shighe u ishima i vihi un, i lu yeghen a yegh laa?+
Una haa iyugh na er ka usu nahan,Avande kpa aa pav sha kwagh na.
7 Yehova doo,+ ngu ijiir i yeren sha iyange i ican.+
We ikyo sha kwagh u* mba ve yeren hen a na la.+
8 Una va a mngerem kpishi ma a va kua ijiir na* eleghee,Shi ime ia zenda mbahyomov nav ijime.
9 Ka nyi i bo ne wa ken ishima u eren Yehova?
Una tim kwagh gburu gburu.
Ican ia kera hide a tser ior sha kwa har ga.+
10 Ve wa ve peregh er ka usaa nahan,Shi mba er ka mba ve lu hunden msôrom yô;Kpa vea hia kera er ayia a uman nahan.
11 Or u henen kwagh u ifer sha iyol i Yehova nana due ken a we,Nana duen a mhen u ibume.
12 Yehova ngu kaan ér:
“Ve lu a agee kpishi shi ve ngee,Nahan kpa a gber ve a ta inya vea kar* kera.
M er u* ican, kpa me kera er u ican ga.
13 Hegen me kever igbur na sha mon wou kera,+Shi me tôndo ikyangenev you kera.
14 Mo Yehova m na zwa sha kwagh wou* mer,‘Iti you ia kera za hemen gbem ga.
Me bee a ieev you mbi gban a gba man mbi keren a ker la ken iyou i* mbaaôndo ou kera.
Me time u uwar, gadia u ngu kwagh u ndôhôrshima.’
15 Nenge! Angahar a or u van a loho u dedoo nga sha iwo,Or u yôôn bem.+
Er uiniongo ou,+ we Yuda, kure uiceghzwa ou,Gadia gbilinor la una kera kar hen a we mayange ga.
A tim un kera gburu gburu.”
