Aerenakaa a Mbaapostoli 7:1-60
7 Kpa zegepristi pine ér: “Akaa a i ôr ne ka nahan mimii?”
2 Sefanu gema kaa ér: “Ne anmgbianev man uter, ver nen ato. Aôndo u iengem yange ande hen Ter wase u tamen Aberaham shighe u lu ken Mesopotamia la, cii ve yem twev ken Haran ye.+
3 A kaa a na ér: ‘Mough hen tar wou shi undu ior ou, va ken tar u me tese u la.’+
4 Tsô a mough hen tar u Mbakaldi a za tema twev hen Haran. Ter na va kpen yô,+ a mough her sha iniezwa i Aôndo, a va tema hen tar u ne lu her hegen ne.+
5 Kpa Aôndo lu a̱ na un ma dyako ken ú ve ga, shin an-inya u gbanger kuman u una penda nguhar her tsô kpaa ga; kpa a tôndo zwa ér una na un ú, shi zum u una kera lu ga kpaa, una na ônov nav* ú,+ shin er lu a mar wan ga nahan kpaa.
6 Shi Aôndo kaa a na ér ônov nav vea* za lu ushirmbaiorov ken tar u u lu u ve ga yô, shi ior mba ken tar la vea kôr ve ikpan, vea er ve ican anyom 400.+
7 Aôndo kaa ér, ‘Nahan tar u ua kôr ve ikpan la, me ôr u ijir.+ Shi akaa ne aa karen kera yô, vea due ken u vea va erem icighantom hen ijiir ne.’+
8 “Shi a ya ikyur i icôngo a na,+ nahan va maren Isaka yô,+ a tsôngo un sha iyange i sha anigheni.+ Tsô Isaka mar Yakob,* Yakob di mar mbayaav* mba 12 mbara.
9 Tsô mbayaav mban nyôr u eren Yosev iyuhwe,+ nahan ve tee un ken Igipiti.+ Kpa Aôndo lu a na,+
10 nahan a yima un ken atsan a na cii, shi a na un kwaghfan, shi a na yô, doo Farou, tor u Igipiti a na. Nahan a ver un lu orhemen sha Igipiti kua ya na cii.+
11 Kpa ijen va gba ken Igipiti cii kua ken Kaanan, lu zegecan je, nahan uter asev zua a kwagh môm u vea ya ga.+
12 Kpa Yakob ungwa ér kwaghyan* ngu ken Igipiti, nahan a tindi uter asev ker, sha kwa u hiihii.+
13 Mba va ze sha kwa har yô, Yosev pase iyol na hen anmgbianev nav, nahan Farou hingir u fan tsombor u Yosev.+
14 Tsô Yosev tindi ér i za kaa ter na Yakob kua anmgbianev nav cii ve mough hen ijiir la ve va,+ ve cii ve lu iorov 75.+
15 Nahan Yakob sen shin Igipiti+ za lu zan zan kar kpen,+ kua uter asev mbara.+
16 Yange i tôô ve i va ii hen Shekem ken uwar u Aberaham yam sha inyar* vea ônov mba Hamor, ken Shekem la.+
17 “Er shighe lu kuman u a kure ityendezwa i Aôndo yôô sha ato a Aberaham la yô, iyenge i nongoior la lu vesen seer ken Igipiti,
18 zan zan tor ugen kposo gba va hemen Igipiti, u̱ fa kwagh u Yosev ga yô.+
19 Tor ne er kwagh a ior asev sha ayom, shi kighir uter asev mbara sha ifer ér ve undu anikyundanev vev, sha u ve̱ kpe kera yô.+
20 Hen shighe la, i mar Mose; lu or u doonashe sha ishigh ki Aôndo. Shi i yese un hen ya u ter na iwer itiar.+
21 Kpa yange mba undun* un yô,+ wan u Farou u kwase za tôô un, yese un hingir wan na.+
22 Nahan i tese Mose kwaghfan u Mbaigipiti cii. Jim je yô, lu a tahav sha mkaan kua sha ieren.+
23 “Shighe u lu anyom 40 la, kende un ken ishima* u za sôron* anmgbianev nav, ônov mba Iserael.+
24 Za nengen mba gbe nzughul a ugen ken a ve yô, a ta ikyaa a na, a or iyev sha ci na, a wua Origipiti la.
25 A hen ér anmgbianev nav vea kav er i lu u Aôndo una yima ve sha ikyev na yô, kpa ve kav ga.
26 Kpernan yô, a za ande sha a ve ve lu nôngon num ayol a ve, maa a gba kôron ve num ken bem, kaan ér: ‘Ne nomsombaiorov mban, ne mba anmgbianev, man er nan ne nôngon num ayol a ene?’
27 Kpa u lu nzughul a anmgbian na la daa un kera, kaa ér: ‘Ka an nan ver u orhemen kua orjir sha a vese?
28 U soo u wuan mo er nyen u wua Origipiti la nahana?’
29 Mose ongo nahan yô, a yevese a za lu shiror ken tar u Midian, ape za mar ônov mba nomso uhar la.+
30 “Anyom nga karen 40 yô, ortyom ande hen a na ken taaikyôngo ikyua a Uwo u Senai, ken nomborusu u u lu yeghen ken ageva yô.+
31 Mose nengen a mi yô, kpiligh un iyol. Kpa ngur kporom una nenge tsembelee yô, a ungwa Yehova* ôr kwagh, kaa ér:
32 ‘Mo m ngu Aôndo u uter ou, Aôndo u Aberaham man u Isaka man u Yakob.’+ Tsô ikyarkyase gba gbidyen Mose iyol, a kera cihi a za ikyua her ga.
33 Yehova* kaa a na ér: ‘Tsua akôv* shin angahar a ou kera, sha ci u ijiir i u til her ne ka icighanjiir.
34 M nenge dedoo er i i lu eren ior av mba ve lu ken Igipiti la ican yô, shi m ungwa er ve lu toghor yô,+ nahan m sen mer me va yima ve. Yô, va m tindi u ken Igipiti.’
35 Mose shon u yange ve venda un, ve kaa ér: ‘Ka an nan ver u orhemen man orjir?’+ ne, ka un je Aôndo yange tindi un+ hemen ve shi yima ve sha uwegh ku ortyom u ande hen a na ken ageva la ye.
36 Or ne yange hemen ve due a ve,+ shi er akaa a kpilighyol man uivande ken Igipiti+ man hen Zegemnger u Nyian+ kua ken taaikyôngo anyom 40.+
37 “Ka Mose shon ne yange ôr kwagh ne a ônov mba Iserael ye, ér: ‘Aôndo una tsua or ken anmgbianev enev, nana lu profeti sha ci wen, er mo nahan.’+
38 Ka un shon ne yange va hingir u lun ken taaikyôngo vea nongoior ne kua ortyom+ u ôr kwagh a na+ man uter asev sha Uwo u Senai, shi ngohol icighan-loho u nan uma la va na se ye.+
39 Uter asev yange ve venda u ungwan un, a gba ve kwagh ga,+ shi asema a ve hide yem ken Igipiti,+
40 ve kaa a Aron ér: ‘Er se mbaaôndo mba vea hemen se yô. Gadia Mose shon u a due a vese ken Igipiti ne yô, se fa kwagh u a za er un ga.’+
41 Tsô ve er eev mbu wanbua sha ayange la, shi ve va a iniav mbi nan eev mbu shon, ve er iniongo ve gba ember kwagh u ve er sha ave a ve ne.+
42 Nahan Aôndo gema ijime a ve, de ér ve civir ikyum i akaa a sha,+ vough er i nger ken takeda u Uprofeti nahan, ér: ‘Lu mo ne nam uiyua kua iniav anyom 40 ken taaikyôngo ga, shin lu mo, we ya u Iserael?
43 Kpa lu tenti u Moloko+ kua ishan i aôndo u Rifan ne tôô ye, ieev mbi yange ne er ne lu civir la. Nahan yô, me de a kura ne a yem a ven uikyangen, a kar Babilon a yem ken hemen.’+
44 “Uter asev lu a tenti u shiada ken taaikyôngo, vough er zum u Aôndo lu lamen a Mose ve, na zwa ér a er un a lu er i tese un nahan la.+
45 Nahan uter asev ya dyako na, ve kua Yoshua ve tôô un ve nyôr a mi ken tar u akuraior lu ker,+ a Aôndo zenda a sha ishigh ki uter asev la;+ tenti shon mase lun heen zan zan ar sha ayange a Davidi la.
46 Yange doo Aôndo a na, nahan a pine ian ér ma un maa iyou sha ci u Aôndo u Yakob.+
47 Kpa gema lu Solomon va maa un iyou ye.+
48 Nahan cii kpa, Uhemban Cii la tem ken ayou a i maa sha ave ga,+ vough er uprofeti ve kaa nahan, ér:
49 ‘Sha ka ikyônough ki torough yagh,+ tar gema ka kwagh wam u panden angahar sha mi.+ Yehova* kaa ér, ka nyi iyou je ne maama? Man ka han ijiir yam i memen ia luu?
50 Ka uwegh agh ku er akaa ne cii gaa?’+
51 “Ne ior i taver ityough, tsôngon ishima ga shi kondon ato ne, ka ne shi hendan a icighan jijingi. Er uter enev eren nahan, kape ne kpa ne eren je la.+
52 Ka profeti u han je ve uter enev tôv nan a ican ga?+ Yange ve wua mba ve tsengayôôn mve u un u a lu orperapera,+ u hegen ne hingir mbanengen un mker man mbawuan un la;+
53 ne mba yange ne ngohol Tindi u i na sha ikyev i mbatyomov,+ kpa ne vende u kuran un ne.”
54 Mba ongo akaa ne yô, asema usa ve ker, ve gba kenger un wuan anyi.*
55 Kpa er iv a icighan jijingi yô, a kenger sha, a nenge a iengem i Aôndo man i Yesu, shi Yesu tile ken uwegh ku iyanegh ku Aôndo,+
56 maa a kaa ér: “Nenge! M nenge i bugh usha, man Wan u or+ tile ken uwegh ku iyanegh ku Aôndo.”+
57 Mba ongo nahan yô, ve ngor taver taver shi ve cir ave sha ato, maa ve cii ve usa ve va sha a na.
58 Mba duen a na ken gar mba kenden ken won yô, ve gba tan un awen.+ Mba ve lu eren shiada sha a na la,+ ver akondo a ve a haan iyol hen ikyum i gumor ugen, i yilan un ér Saulu.+
59 Er ve lu tan Sefanu awen la, a zamber ér: “Ter Yesu, ngohol jijingi* wam.”
60 Tsô a gure inya, a ôr taver taver ér: “Yehova,* de ne ve ibo sha isholibo ne ga.”+ Ôron kwagh ne yô, a sule.
Ngeren mba shin kpe
^ Zwa Grika, “vor na.”
^ Zwa Grika, “vor na ua.”
^ Shin a fatyô u kaan ér, “Tsô Isaka kpa er a Yakob nahan.”
^ Shin “uter.”
^ Shin “samuyia.”
^ Zwa Grika, “azurufa.”
^ Shin “mba gbihin.”
^ Shin “a tsua.”
^ Shin “za nengen mlu u.”
^ Nenge Ngeren u Seer u A5 la.
^ Nenge Ngeren u Seer u A5 la.
^ Shin “sanda.”
^ Nenge Ngeren u Seer u A5 la.
^ Sha u tesen ishimavihin.
^ Shin “iôôn i uma.” Nenge Ngeren u Pasen Asember, “Jijingi.”
^ Nenge Ngeren u Seer u A5 la.
