Aerenakaa a Mbaapostoli 2:1-47
2 Ka va lun sha iyange i Iniongo i Pentikôsti yô,+ ve cii ve kohol ijiir i môm shighe u iniongo lu zan hemen la.
2 Ica i gbe ga yô, ihyuran due sha aôndo, er ahumbe a taver ka a toron nahan, va iv ken iyou i ve tema ker la cii.+
3 Maa ve nenge a kwagh* er ka iniomborusu nahan, sen tema sha hanmô ve,
4 nahan ve cii ve iv a icighan jijingi,+ maa ve gba lamen ken ijô kposo kposo, vough er jijingi na ve ian u lamen la.+
5 Hen shighe ne, Mbayuda mbacian Aôndo mba ve due ken hanma tar yô, lu ken Yerusalem.+
6 Nahan zum u ihyuran ne due yô, ikpelaior va kohol her shi kunda ve iyol, sha ci u hanmô ve yô nan ungwa ve lu lamen zwa u nan.
7 Kwagh ne kpiligh ve iyol je gande, ve pine ér: “Nenge ase yô, ior mba ve lu lamen mban ka Mbagalilia,+ shin ka nahan ga?
8 Man tsô er nan ve hanmô wase nan lu ungwan zwa u ityô i nana?*
9 Se, Mbaparta man Mbamede+ man Mbaelam+ kua mba ken Mesopotamia, man Yudia man Kapadoshia man Ponti man mba ken kpentar u Ashia,+
10 man Ferijia man Pamfilia man Igipiti, kua uharegh mba ken Libia, ikyua a Shirene; man mbavannya mba ve dugh ken Roma, mba ve lu Mbayuda man mba ve nyer a nyôr ve la cii,+
11 man Mbakerete kua Mbaarabia kpaa, se ungwa mba ôron akaa a kpilighyol a Aôndo a er yô, ken ijô yase.”
12 Sha kpôô yô, ve cii yange kpiligh ve iyol shi lan ve ishima kpishi, ve gba pinen ayol a ve ér: “Inja i kwagh ne ér nyi?”
13 Kpa mbagenev naha ve tar kaa ér: “Ve ma wain u nyohon* ngee gande.”
14 Kpa Peteru kighir mough sha vea Mbapuekarmôm+ mbara lam a ikpelaior la genger genger, a kaa ér: “Ne ior i Yudia man ne mba ken Yerusalem cii, fa nen kwagh ne shi ver nen ato sha akaa a m lu ôron ne ne zulee.
15 Jighilii yô, ior mban mba hunden msôrom er ne henen nahan ga, gadia hegen ka pepe, er ahwa ataankaranyiin* nahan di tsô.
16 Kpa ka kwagh u yange i ôr sha ikyev i profeti Yoel yô, ér:
17 ‘Aôndo kaa ér, “Ken ayange a masejime yô, me haa jijingi wam* sha hanma injaor cii, nahan ônov enev mba nomso man mba kasev vea ôr kwaghôron u profeti, shi agumaior a en aa nenge mbampase, shi mnyam ma a cie mbabeenyol enev.+
18 Shi me haa jijingi wam* sha ikpan yam i nomso man sha ikpan yam i ukase je kpaa, nahan vea ôr kwaghôron u profeti.+
19 Me er akaa a kpilighyol sha kwavaôndo shi me er uivande shin tar—awambe man usu man mnyim kpishi.
20 A gema iyange ia hingir ime shi uwer ua hingir awambe, cii man iyange i vesen man i kpilighyol i Yehova* la ia va ye.
21 Nahan hanma or u nan yer sha iti i Yehova* yô, a yima nan.”’+
22 “Ne ior i Iserael, ungwa nen kwagh ne: Yesu, Ornasareti la, lu or u Aôndo tese ne un ken igbar sha ityom i ageegh man akaa a kpilighyol kua uivande mba Aôndo lu eren sha ikyev na hen atô wen la,+ vough er ne ayol a en kpa ne fe nahan.
23 Or shon u i na ne un, er Aôndo vande wan ken ishima shi tsengafan kwagh shon ne,+ yange ne mande un sha kon sha ikyev i mbavendanatindi, ne wua un kpaa.+
24 Kpa Aôndo nder un shin ku,+ a sagh un ikyangenev mbi kuugh kera, sha ci u lu u ku ua fatyô u kangen un ga.+
25 Gadia Davidi ôr kwagh na ér: ‘M ver Yehova* sha ishigh yagh gbem, sha ci u ngum ken uwegh ku iyanegh sha u mayange m de tenger ga yô.
26 Sha ityôkyaa ne yô, ishima yam hingir sar sar shi nombor wam ember kpishi. Nahan me lu* a ishimaverenkeghen;
27 sha ci u ú undum* shin Uwar* ga, shi ú de wer u a civir we sha mimi a̱ hôô ga.+
28 U tesem igbenda i uma; u va ivim a msaanyol kpishi sha ishigh you.’+
29 “Anmgbianev, de m ôr ne kwagh u orya Davidi a ishima i gbar gbar; yange kpe, i ii un,+ shi uwar na ngu heen zan zan nyian.
30 Er lu profeti shi fa er Aôndo bum a na ér una ver wan na sha ikyônough nagh ki torough yô,+
31 a tsenganengen er a va nder Kristu shin ku yô, shi a ôr kwagh sha mi ér, i undu un shin Uwar* ga, shi iyol na kpa hôô ga.+
32 Aôndo nder Yesu ne shin ku, man se cii se mba mbashiada sha kwagh ne.+
33 Nahan, er i kôndo a Yesu sha a za tem ken uwegh ku iyanegh ku Aôndo,+ shi Ter a ne un icighan jijingi u yange tôndo zwa a na la yô,+ a haa un sha a vese, man ka kwagh shon vough je ne lu nengen shi ungwan ne.
34 Davidi yange kôndo yem sha ga, kpa un iyol na kaa ér, ‘Yehova* kaa a Terem ér: “Temam ken uwegh ku iyanegh
35 zan zan me kar veren mbahyomov ou ve lu u kpenga* u pendan angahar sha mi.”’*+
36 Sha nahan yô, ya u Iserael cii a fa ér, mimi je Aôndo gema Yesu u yange ne mande un sha kon ne+ hingir Ter+ man Kristu.”
37 Nahan mba ongo kwagh ne yô, ishima za ve iyol. Tsô ve pine Peteru kua mbaapostoli mbagenev mbara cii ér: “Anmgbianev, ka nyi i gbe u se ere?”
38 Peteru kaa a ve ér: “Gema nen asema+ i er hanma wen batisema+ ken iti i Yesu Kristu sha er a de ne asorabo a en,+ nahan ne ngohol iyua i icighan jijingi yô.
39 Gadia i er ityendezwa+ ne a ven kua ônov enev, man ior mba ve lu ken ajiir a icaa, mba Yehova* Aôndo wase una yila ve hen a na cii.”+
40 Shi a ôr ve akaa agen kpishi, a er shiada vighe vighe, lu wan ve kwagh kaan ér: “De nen i yima ne ken kov u ifer ne.”+
41 Nahan i er mba ve ngohol kwaghôron na saan saan la batisema.+ Sha iyange la, ior seer iyenge kuma er 3,000 nahan.+
42 Ve za hemen u veren ishima sha ityesen i mbaapostoli, shi kohol imôngo* yan kwagh+ shi eren msen.+
43 Jighilii yô, mciem hii u gban hanma or iyol, shi mbaapostoli lu eren akaa a kpilighyol kpishi kua uivande.+
44 Mba ve hingir mbananjighjigh la cii ve zua ve lu imôngo, shi ve kohol akaa a ve lu a mi cii sha ci u wasen hanmô ve,
45 ve lu teen akaa a ve,+ karen hanma or ken a ve cii inyaregh sha mbamgbe mba nan vough vough.+
46 Shi ve zaan ken tempel ayange ayange, ve lu a awashima môm, shi ve kohol sha uya kposo kposo, ve yaan kwagh imôngo, shi ve naan mbagenev ken a ve kwaghyan a iember kpishi man a ishima i môm.
47 Ve lu wuese Aôndo, shi doo ior cii a ve. Shi Yehova* lu seer mba i lu yiman ve la sha iyenge ve ayange ayange.+
Ngeren mba shin kpe
^ Zwa Grika, “iniombor.”
^ Shin “zwa u nana?”
^ Shin “wain u he.”
^ Zwa Grika, “er ihwa i sha utar.”
^ Shin “me pande jijingi wam me haa.”
^ Shin “me pande jijingi wam me haa.”
^ Nenge Ngeren u Seer u A5 la.
^ Nenge Ngeren u Seer u A5 la.
^ Nenge Ngeren u Seer u A5 la.
^ Shin “me tema; me mem.”
^ Shin “Hade,” ka uwar u uumace je la. Nenge Ngeren u Pasen Asember.
^ Shin “u undu uma wam.”
^ Shin “Hade,” ka uwar u uumace je la. Nenge Ngeren u Pasen Asember.
^ Nenge Ngeren u Seer u A5 la.
^ Shin “kujila; ayakpa.”
^ Shin “me kar nan we tahav mbu hemban mbahyomov ou.”
^ Nenge Ngeren u Seer u A5 la.
^ Shin “karen ayol a ve akaa a ve lu a mi yô.”
^ Nenge Ngeren u Seer u A5 la.
