Aerenakaa a Mbaapostoli 13:1-52
13 Nahan uprofeti kua mbatesen mbagenev lu ken tiônnongo* u ken Antiôki la,+ ve yô, lu Banaba man Shimeon u i yilan un ér Il-or* la, man Lushôôsu or u ken Shirene, man Manaen u yange za makeranta imôngo vea Herode u hemen haregh shon la, kua Saulu.
2 Zum u ve lu civir Yehova* shi hôron kwaghyan yô, icighan jijingi kaa ér: “Verem nen Banaba man Saulu+ ve er tom u m tsough ve mer ve er yô.”+
3 Nahan mba hôron kwaghyan shi mba eren msen mba been kera yô, ve penda ve ave iyol, maa ve na ve gbenda.
4 Tsô nomsombaiorov mba icighan jijingi tindi ve ne sen shin Selushia, ve za mough her ve nyôr tso ve yem ken Shiperu.
5 Mba za nyer ken Salami yô, ve gba yôôn loho u Aôndo ken ushinagoge mba Mbayuda. Yohane kpa lu vea ve, ve lu eren ve tom.*+
6 Ve zende sha ajiir a ken icile la cii, zan zan ve za ar hen Pafo. Tsô ve zua a Oryuda ugen, i yilan un ér Bar-Yesu, lu orakombo man profeti u aiegh.
7 Lu vea gomna Serjiu Paulu, u lu orfankwagh la imôngo. Serjiu Paulu yila Banaba man Saulu ve va hen a na, sha ci u sar un tsung u ungwan loho u Aôndo.
8 Kpa or shon u i yilan un ér Elima (inja na yô ér orakombo) la, gba hendan a ve, nôngon ér gomna a de ne jighjigh ga.
9 Tsô er Saulu u i yilan un ér Paulu kpaa la iv a icighan jijingi yô, a bon ashe sha a na
10 a kaa ér: “Kpash! We or u u iv a hanma inja i anyighe man hanma inja ifer ne; we wan u Diabolo,+ we orhyom u hanma kwagh u perapera ne, ú de u nzughul a igbenda i Yehova* i i lu jighilii la ga ka nyi?
11 Yô nenge! Yehova* una tsaha u, u pir ashe, u kera nenge a iwanger i iyange ga shighe a kar.” Her ave ave je er un ken ashe cing, maa ime wa un, a gba peven keren or u nana kôr un sha uwe nana yem a na yô.
12 Er gomna nenge kwagh u er ne yô, a na jighjigh, sha ci u kpiligh un iyol a ityesen i Yehova.*
13 Tsô Paulu kua mba ve lu vea na la nyôr tso hen Pafo, ve va hen Perga, ken Pamfilia. Kpa Yohane+ undu ve her, hide ken Yerusalem.+
14 Nahan kpa, ve mough hen Perga ve va ken Antiôki, ken Pisidia. Ve za nyôr ken shinagoge+ sha Iyange i Memen, ve tema inya.
15 Mba ôron Tindi man Uprofeti* ken igbar kera cii yô,+ mbahemenev mba shinagoge la tindi ér i kaa ve ér: “Anmgbianev, nea lu a ma kwagh u ne ôr sha u taver ior asema yô, ôr nen.”
16 Nahan Paulu mough tile sha, kure ve uwegh, maa kaa ér:
“Ne ior i Iserael kua ne mbagenev mba ne cie Aôndo yô, kegh nen ato.
17 Aôndo u Mbaiserael mban yange tsua uter asev, shi kende a ior mban sha shighe u ve lu ushirmbaiorov ken tar u Igipiti la, shi va due a ve ken u kera sha uwegh ku ageegh.+
18 Nahan a wa ishima a ve ken taaikyôngo zan zan kuma er anyom 40 nahan.+
19 Timin akuraior ataankarahar ken tar u Kaanan kera yô, a gema tar ve a na uter asev dyako.+
20 Kwagh ne cii er ken atô u anyom a kuman er 450 nahan.
“Ka been kera yô, a na ve mbaajiriv zan zan va ar sha Samuel, u lu profeti la.+
21 Kpa shighe karen yô, ve sôn tor,+ nahan Aôndo na ve Saulu, wan u Kishi, or u ken ipyaven u Benyamin,+ tema tor sha a ve anyom 40.
22 Va dughun un tor kera yô, a tsua Davidi ér a lu tor ve;+ a er shiada sha kwagh na, a kaa ér: ‘M zua a Davidi wan u Yese,+ or u sha ishima yam vough;+ una er akaa a a sarem la cii.’
23 Aôndo va tsua oryiman Yesu ken ônov mba* or ne, na Iserael, er vande tôndon zwa nahan.+
24 Cii man un shon la a̱ va yô, Yohane vande pasen ior i Iserael cii ér gba u vea er batisema sha u tesen ikyav ér ve gema asema.+
25 Kpa er va zurum u Yohane una kure tom na la, lu ôron ér: ‘Ne nenge ner m ngu ana? Ka mo un ne ga. Kpa nenge! Orgen ngu van mo ken ijime. M kuma u saghen un ikyor i akôvough* shin angahar ga.’+
26 “Anmgbianev, ne ônov mba Aberaham kua mbagenev ken a ven mba ve cie Aôndo la, i tindi a loho u myom ne hen a vese.+
27 Gadia ior mba ken Yerusalem kua mbahemenev vev fa un shon ne ga, kpa zum u ve lu ôron un ijir la, ve kure akaaôron a Uprofeti,+ a ka i ôron genger genger sha hanma Iyange i Memen la.
28 Er ve zua a ityôkyaa i wuan un ga nahan kpa,+ ve sendegh ér Pilatu a wua un.+
29 Yange mba eren akaa a i nger sha kwagh na la cica cii yô, ve hungwa a na sha kon kera, ve za ii un ken uwar.+
30 Kpa Aôndo nder un shin ku,+
31 nahan a ande hen mba ve mough ken Galilia vea na ve yem sha Yerusalem la, ken atô u ayange imôngo. Mban mba eren un shiada hen ior hegen.+
32 “Nahan se mba yôôn loho u dedoo u sha kwagh u ityendezwa i yange i er a uter la hen a ven.
33 Aôndo er hanma kwagh u yange tôndo zwa la a vese, se ônov vev, sha u nderen Yesu shin ku,+ vough er i nger ken pasalami u sha uhar la nahan, ér: ‘U ngu wan wam; nyian ne m hingir teru.’+
34 Shi er mimi je A nder un shin ku, i lu u mayange una kera hide a lu a iyol i hôôn ga la kpa, A ôr kwagh la nahan, ér: ‘Me na ne averen a yange m tôndo zwa a Davidi sha erdoo wam la, ityendezwa ne ka i mimi.’*+
35 Shi i ôr ken pasalami ugen kpaa ér: ‘Ú de wer u a civir we sha mimi la a̱ hôô ga.’+
36 Nahan kpa Davidi yange er ishima i Aôndo sha ayange a a lu uma la, va kpe, i ii un a uter nav imôngo, shi hôô.+
37 Kpa un u Aôndo nder un shin ku la yô, yange hôô ga.+
38 “Sha nahan yô, anmgbianev, fa nen ner ka un shon ne je i lu yôôn hen a ven ér mba den ior asorabo ken iti na ye.+
39 Shi akaa a i fetyô u nan ne ishô sha mi ken Tindi u Mose ga la cii,+ hanma or u nan ne un shon ne jighjigh yô, ka i na nan ishô.+
40 Yô, wa nen ikyo sha er kwagh u i ôr ken Uprofeti la una er ne ga yô, ér:
41 ‘Gema nenge nen, ne mbanahantar, i kpiligh ne iyol shi tim nen, gadia m ngu eren tom sha ayange a en, ka tom u mayange je ne na jighjigh a u ga yô, shin aluer ma or pase ne u vighe vighe je kpaa.’”+
42 Tsô mba ngur duen yô, ve zamber a ve ér ve va lam sha akaa ne sha Iyange i Memen i dondon la.
43 Mba dugh mkombo ken shinagoge kera yô, Mbayuda kpishi kua mba ve nyôr ve a nyôr, ve lu civir Aôndo la, dondo Paulu kua Banaba ijime, nahan Paulu man Banaba lam a ve, taver ve ishima ér ve za hemen u lun ken erdoo u hemban u Aôndo la.+
44 Shi mba va nyer sha Iyange i Memen yô, ior mba ken gar la zua, hanma or nôngo u van, sha u va ungwan kwaghôron u Yehova.*
45 Mbayuda mba nengen a ikpelaior la yô, ve mough a iyuhwe ken ishima poo, ve gba nyiman shi lahan akaa a Paulu lu ôron la.+
46 Tsô Paulu man Banaba ôr a ve gbar gbar ér: “Yange gba u a vande pasen loho u Aôndo hen a ven keng.+ Kpa er ne lu vendan u shi ne ayol a en ne lu tesen ner ne kuma u zuan a uma u tsôron ga yô, nenge! ka u se yem hen akuraior agen je ne.+
47 Gadia Yehova* ôr a vese ken mkaanem man nahan ér: ‘M tsua u mer lu iwanger i akuraior, sha er u za a myom sha akighir a tar yô.’”+
48 Ior mba ken akuraior mba ongo kwagh ne yô, ve gba ember shi wuese kwaghôron u Yehova,* shi mba ve lu a ishima i mimi i zuan a uma u tsôron la cii na jighjigh.
49 Heela tseegh ga, i lu samber a loho u Yehova* ken tar la cii.
50 Kpa Mbayuda tor kasev mba duen ati mba ve cian Aôndo la asema, kua ior mba tagher tagher mba ken gar la, nahan ve tôv Paulu man Banaba a ican;+ ve zenda ve ve due hen haregh ve kera.
51 Nahan ve kure ihyundu i shin angahar a ve, sha u i lu shiada hen a ve, maa ve yem ken Ikonium.+
52 Kpa mbahenen mbara iv a icighan jijingi man iember her.+
Ngeren mba shin kpe
^ Zwa Grika, “Naija.”
^ Nenge Ngeren u Pasen Asember, “Nongo; Tiônnongo.”
^ Nenge Ngeren u Seer u A5 la.
^ Shin “lu wasen ve.”
^ Nenge Ngeren u Seer u A5 la.
^ Nenge Ngeren u Seer u A5 la.
^ Nenge Ngeren u Seer u A5 la.
^ “Tindi kua Uprofeti” ka Ruamabera u ken Zwa Heberu la jimin cii.
^ Zwa Grika, “vor u.”
^ Shin “sanda.”
^ Shin “ia kure keng a bunde ga.”
^ Nenge Ngeren u Seer u A5 la.
^ Nenge Ngeren u Seer u A5 la.
^ Nenge Ngeren u Seer u A5 la.
^ Nenge Ngeren u Seer u A5 la.
