Aver yem sha atineakaa

Aver yem sha itinekwagh i vesen i sha uhar

Mbashiada mba Yehova

Tiv

Zegebabilon Ka Nyi?

Zegebabilon Ka Nyi?

Mlumun u Bibilo i ne yô

Zegebabilon u i pase kwagh na ken takerada u Mpase la ka ukwaghaôndo mba aiegh mba sha tar cii, mba Aôndo a vende ve la; ka ve i zom ve i yer nahan ye. * (Mpase 14:8; 17:5; 18:21) Shin er ukwaghaôndo mbara ve kaha sha igbenda kposo kposo nahan kpa, ve cii mba a igbenda i ve urugh ior sha u ve de civir Yehova, Aôndo u mimi la ga yô.—Duteronomi 4:35.

Akaa a aa wase u u fan Zegebabilon yô

  1. Zegebabilon tile sha ityough ki kwagh. Bibilo yila un ér “kwase” man shi “zegeidyakwase” u iti na i lu “kwaghmyer” yô. Iti na shon ér: “ZEGEBABILON.” (Mpase 17:1, 3, 5) I nger takerada u Mpase la sha akav, nahan se fatyô u kaan ser Zegebabilon tile sha ityough ki kwagh, ka kwase kpôô kpôô ga. (Mpase 1:1) Shi i kaa ér, a ‘tema sha mngerem ma kpishim,’ ka “iniongo i ior man akumaior man akuraior man ijô” je la. (Mpase 17:1, 15) Kwase kpôô kpôô nana fatyô u eren kwagh ne ga.

  2. Zegebabilon tile sha ityough ki mzough ugen sha tar cii. I yila un ér “zegegar u a lu a tahav sha utor mba shin tar yô.” (Mpase 17:18) Sha nahan yô, ngu sha tar cii shi ngu a tahav sha u.

  3. Zegebabilon ka mzough u kwaghaôndo, ka u mbapatii shin mbakpengav ga. Babilon u tsuaa la lu zegegar u i eren kwaghaôndo her kpoghuloo, shi i fa un sha “akaasôron” kua “ahir” a eren yô. (Yesaia 47:1, 12, 13; Yeremia 50:1, 2, 38) Jighilii yô, lu kwaghaôndo u aiegh u hendan a Yehova, Aôndo u mimi la je i eren hen gar la ye. (Genese 10:8, 9; 11:2-4, 8) Utor mba Babilon yange ve kende a ayol a ve sha je ve nenge ér ve hemba Yehova shi mcivir na gba kwagh ga. (Yesaia 14:4, 13, 14; Daniel 5:2-4, 23) Kape Zegebabilon kpa i fe un sha kwagh u “ahir” a eren je la. Kwagh ne tese ér Zegebabilon ka mzough u kwaghaôndo.—Mpase 18:23.

    Zegebabilon a fatyô u lun mzough u mbapatii ga sha ci u “utor mba shin tar” vea vaa, vea zungwe zum u a tim un yô. (Mpase 17:1, 2; 18:9) Shi ngu mzough u mbakpengav ga sha ci u Bibilo tese ér ngu kposo a “mbakasuav mba shin tar.”—Mpase 18:11, 15.

  4. Iwen i Tor Nabonidu, tor u Babilon, i i lu a ikyav i mbaaôndo utar sha mi yô, ka aôndo u Sin man Ishtar man Shamash

    Iti i Zegebabilon la kuma sha aeren a kwaghaôndo u aiegh vough. Kwaghaôndo u aiegh tesen ior er vea kporom hen Yehova, Aôndo u mimi la ga, ngu a gema a hemen ve u civir mbaaôndo mbagenev. Bibilo kaa ér nahan la ka u “eren idya sha u dondon mbaaôndo” mbagenev. (Levitiku 20:6; Ekesodu 34:15, 16) Atesen agen, er ityesen i Triniti man ityesen i i kaa ér or ka nana kpe yô, uma u nan a due a za lu ape gen la nahan, kua ieren i civir Aôndo a ieev la cii, hii ken Babilon u tsuaa la je, a lu samber sha ukwaghaôndo mbaaiev ye. Ukwaghaôndo mban ka ve civir Aôndo shi ve tesen ér tar kpa doo ve ishima. Bibilo yila jighjigh u nan u mimi ga ne ér idya i ken jijingi.—Yakobu 4:4.

    Inyaregh ki kwaghaôndo u aiegh a lu a mi kpishi shi a te ihyagh a mi la zua sha Zegebabilon u Bibilo i er kwagh na ér a “haa akondo a nyian dindee man a nyian bong iyol” shi a haa “zenaria iyol wue wue man shi awen a injaa man utagbede kpaa” la. (Mpase 17:4) Ka Zegebabilon a ve a “AKAA A NDÔHÔR ISHIMA A SHIN TAR” shin atesen man aeren a a vihin Aôndo iti la cii ye. (Mpase 17:5) Mba ve lu ken kwaghaôndo u aiegh ve lu suen Zegebabilon la ka “iniongo i ior man akumaior man akuraior man ijô.”—Mpase 17:15.

Zegebabilon ngu ityough sha ku u “uicighanmbaiorov man mba i wua ve shin tar cii la.” (Mpase 18:24) Sha ayange a tsuaa la je, kwaghaôndo u aiegh hii u tuur ior ken ityô ér ve nôngo ityav, shi a na ieren i tan ubom wuan ior la ngi seer a seer. Heela tseegh ga, a tese ior mimi sha kwagh u Yehova, Aôndo u lun a dooshima la ga. (1 Yohane 4:8) Kwagh ne na yô, iwoo-or ngee kpishi. Ka sha ityôkyaa ne i gbe hange hange u mba ve soo u eren ishima i Aôndo la cii vea due ken kwaghaôndo u aiegh kera, vea lu kposo ye.—Mpase 18:4; 2 Mbakorinte 6:14-17.

^ par. 3 Nenge ngeren u a lu a itinekwagh ér, “Me Er Nan Ve Me Fa Kwaghaôndo u Mimi?” la.