Maromak rona ita-nia orasaun ka lae?
Dala ruma Ita hanoin, ‘Maromak rona ba haʼu-nia orasaun ka lae?’ Se nuneʼe, Ita la mesak. Ema barak reza ba Maromak kona-ba sira-nia problema ruma, maibé problema neʼe iha nafatin. Neʼe katak Maromak la rona ita ka lae? Lae. Bíblia dehan katak Maromak rona ita bainhira ita reza tuir dalan neʼebé loos. Mai ita haree saida mak Bíblia hatete kona-ba neʼe.
MAROMAK RONA DUNI.
“Oh Maromak neʼebé rona ba orasaun, ema oioin sei mai hakbesik Ita.”—Salmo 65:2.
Ema balu halo orasaun tanba sira dehan neʼe halo sira sente kmaan, maski sira la fiar katak Maromak rona sira. Maibé orasaun laʼós deʼit buat neʼebé ita halo atu sente diʼak liu hodi bele tahan ita-nia problema sira. Bíblia fó fiar mai ita katak “Jeová * besik ba ema hotu neʼebé bolu nia, ba sira hotu neʼebé bolu nia tuir lia-loos. . . . Nia rona sira-nia halerik atu husu ajuda”.—Salmo 145:18, 19.
Tan neʼe, ita bele fiar metin katak Maromak Jeová rona ba ninia atan sira-nia orasaun. Ho domin, nia hatete: “Imi sei bolu haʼu no hakbesik mai haʼu liuhusi orasaun, no haʼu sei rona imi.”—Jeremias 29:12.
MAROMAK HAKARAK ITA ATU HALO ORASAUN BA NIA.
“Keta kole atu halo orasaun.”—Roma 12:12.
Bíblia dehan mai ita atu “harohan beibeik” no “kontinua halo orasaun iha situasaun hotu”. Neʼe hatudu ho klaru katak Maromak Jeová hakarak ita atu halo orasaun ba nia.—Mateus 26:41; Éfeso 6:18.
Tanbasá mak Maromak hakarak ita atu halo orasaun ba nia? Hanoin toʼok: Aman ida hatene ona saida mak ninia oan presiza, maibé bainhira nia rona ninia oan dehan, “Apá bele ajuda haʼu lai?” neʼe halo aman neʼe kontente tanba hatudu katak oan neʼe fiar ba ninia aman no sente besik ba nia. Hanesan neʼe mós, bainhira ita reza ba Maromak Jeová, ita hatudu katak ita tau fiar ba nia no hakarak sai besik ba nia.—Provérbios 15:8; Tiago 4:8.
MAROMAK HANOIN TEBES ITA.
“Entrega imi-nia laran-susar hotu ba nia, tanba nia hanoin imi.”—1 Pedro 5:7.
Maromak hakarak ita halo orasaun ba nia tanba nia hadomi no hanoin ita. Nia hatene ita-nia susar hotu no buat neʼebé halo ita hanoin barak, no nia hakarak ajuda ita.
Iha Liurai David nia moris tomak, nia sempre halo orasaun ba Maromak Jeová atu husu ajuda, no atu fakar ninia hanoin no sentimentu. (Salmo 23:1-6) Oinsá mak Maromak sente kona-ba David? Maromak hadomi David no rona ba ninia orasaun hotu. (Apóstolu 13:22) Maromak mós rona ba ita-nia orasaun tanba nia hanoin ita.
“HAʼU HADOMI JEOVÁ TANBA NIA RONA HAʼU-NIA LIAN”
Hakerek-naʼin ba salmo ida mak hatete liafuan sira-neʼe iha leten. Nia fiar metin katak Maromak rona ninia orasaun sira, no neʼe ajuda tebes nia. Nia sente besik liu ba Maromak no hetan forsa atu tahan ninia susar sira.—Salmo 116:1-9.
Bainhira ita fiar katak Maromak rona ita-nia orasaun, neʼe sei book ita atu halo orasaun beibeik ba nia. Hanoin kona-ba Pedro, husi España nia esperiénsia. Ninia oan-mane neʼebé tinan 19 mate tanba asidente. Pedro laran dodok tebes no nia fakar sai ninia sentimentu ba Maromak no halo orasaun beibeik atu hetan kmaan no apoiu. Saida mak akontese? Nia dehan: “Maromak Jeová hatán haʼu-nia orasaun liuhusi kmaan no apoiu neʼebé haʼu no haʼu nia feen simu husi maluk fiar-naʼin sira.”
Dala ruma, Maromak hatán ita-nia orasaun liuhusi belun sira neʼebé fó kmaan mai ita
Maski orasaun la halo sira-nia oan moris-hiʼas fali, maibé orasaun ajuda duni Pedro no ninia família iha dalan importante. Ninia feen, María Carmen, hatete: “Orasaun ajuda haʼu tahan haʼu-nia triste. Haʼu hatene katak Maromak Jeová komprende haʼu tanba bainhira haʼu reza ba nia, haʼu sente dame no kalma iha laran.”
Husi buat neʼebé hakerek iha Bíblia no husi ema nia esperiénsia rasik hatudu ho klaru katak Maromak rona duni ba ita-nia orasaun. Maski nuneʼe, Maromak la hatán orasaun hotu. Tanbasá mak Maromak hatán orasaun balu, maibé orasaun seluk Maromak la hatán?
^ par. 5 Jeová mak Maromak nia naran rasik.—Salmo 83:18.
Karik Ita sei gosta
LIVRU HAKLAKEN
7 Maromak rona no hatán ka lae?
PERGUNTA KONA-BA BÍBLIA
Maromak bele ajuda haʼu se haʼu halo orasaun ka lae?
Maromak bele ajuda haʼu se haʼu halo orasaun ka lae?
