Skip to content

Skip to table of contents

Oinsá mak Ita tenke halo orasaun atu Maromak rona Ita?

Oinsá mak Ita tenke halo orasaun atu Maromak rona Ita?

Jeová mak “Maromak neʼebé rona ba orasaun”. (Salmo 65:2) Ita bele koʼalia ba nia iha tempu no fatin naran deʼit, ho lian, ka koʼalia iha laran deʼit. Maromak Jeová hakarak ita atu bolu nia nuʼudar “Aman”. Nia mak ita-nia Aman neʼebé diʼak liu hotu. (Mateus 6:9) Jeová hanorin ita oinsá atu halo orasaun hodi nia bele rona ita.

HALO ORASAUN BA JEOVÁ LIUHUSI JESUS NIA NARAN

“Se imi husu buat naran deʼit ba Aman, nia sei fó ba imi hodi haʼu-nia naran.”​—João 16:23.

Jesus nia liafuan sira-neʼe hatudu katak Maromak Jeová hakarak ita atu halo orasaun ba nia liuhusi Jesus nia naran, no laʼós liuhusi estátua, santu-santa, anju sira ka beiʼala sira neʼebé mate ona. Bainhira ita reza liuhusi Jesus nia naran, ita hatudu katak ita rekoñese Jesus nia knaar importante. Jesus hatete: “Ema ida labele hakbesik ba Aman se la liu husi haʼu.”​—João 14:6.

KOʼALIA HUSI LARAN

“Fakar sai imi-nia laran iha ninia oin.”​—Salmo 62:8.

Bainhira halo orasaun ba Maromak Jeová, ita tenke koʼalia ba nia hanesan ita koʼalia ba aman neʼebé domin. Duké lee husi livru ruma, ka repete liafuan neʼebé ita dekór, ita tenke koʼalia ba nia husi laran no ho respeitu.

HALO ORASAUN TUIR MAROMAK NIA HAKARAK

“Buat naran deʼit neʼebé ita husu hodi tuir ninia hakarak, nia rona ita.”​—1 João 5:14.

Iha Bíblia, Maromak Jeová esplika saida mak nia sei halo ba ita, no saida mak nia hakarak ita atu halo. Atu Maromak bele simu ita-nia orasaun, ita presiza halo orasaun “hodi tuir ninia hakarak”. Atu halo nuneʼe, ita presiza estuda Bíblia hodi ita bele koñese nia didiʼak. Se ita halo ida-neʼe, Maromak sei kontente ho ita-nia orasaun.

 ITA BELE HALO ORASAUN KONA-BA SAIDA DEʼIT?

Husu buat neʼebé Ita presiza. Ita bele halo orasaun ba Maromak kona-ba ita-nia presiza loroloron nian, hanesan ai-han, roupa no hela-fatin. Ita bele husu matenek atu foti desizaun neʼebé loos, no forsa atu tahan susar ruma. Ita bele husu atu aumenta ita-nia fiar, husu perdua ba ita-nia sala no husu Maromak nia ajuda.​—Lucas 11:3, 4, 13; Tiago 1:5, 17.

Halo orasaun ba ema seluk. Inan-aman sira kontente bainhira haree sira-nia oan sira hadomi malu. Maromak Jeová mós hakarak ninia oan sira iha rai atu hatudu katak sira hadomi malu. Tan neʼe, diʼak atu halo orasaun ba ita-nia kaben, oan, família, no belun sira. Dixípulu Tiago hatete: “Halo orasaun ba malu.”​—Tiago 5:16.

Fó sai agradese. Bíblia koʼalia kona-ba ‘buat diʼak neʼebé Maromak halo’ hodi dehan: “Nia fó udan husi lalehan no fó ai-fuan tuir ninia tempu, hodi fó ai-han barak ba imi no halo nakonu imi-nia laran ho ksolok.” (Apóstolu 14:17) Bainhira ita hanoin kona-ba buat hotu neʼebé Maromak halo ona ba ita, neʼe sei book ita atu fó sai ita-nia agradese ba nia liuhusi orasaun. No klaru katak ita presiza hatudu ita-nia agradese liuhusi halo tuir nia.​—Koloso 3:15.

 PASIÉNSIA NO HALO ORASAUN NAFATIN

Dala ruma, karik ita sente laran-kraik tanba la hetan kedas resposta ba ita-nia orasaun neʼebé ita hatoʼo ho laran. Neʼe hatudu katak Maromak la hanoin ita ka lae? Maromak hanoin ita! Hanoin kona-ba esperiénsia sira tuirmai neʼebé hatudu katak, karik buat neʼebé ita presiza halo mak kontinua deʼit halo orasaun ba Maromak.

Steve, neʼebé temi ona, hatete: “Se karik haʼu la kontinua atu halo orasaun, haʼu lakon esperansa atu bele kontente fali.” Tanbasá mak Steve troka ninia hanoin kona-ba orasaun? Tanba nia komesa estuda Bíblia no aprende katak presiza halo orasaun beibeik. Nia dehan: “Haʼu halo orasaun ba Maromak atu fó agradese tanba nia fó apoiu ba haʼu liuhusi haʼu-nia belun sira. Agora haʼu sente kontente tebes iha haʼu-nia moris.”

Oinsá ho Jenny, neʼebé sente nia la merese atu Maromak rona ba nia? Nia hatete: “Iha tempu neʼebé haʼu sente laran-kraik liu iha haʼu-nia moris, haʼu husu makaʼas ba Maromak atu ajuda haʼu komprende tanbasá haʼu sente la iha folin.” Oinsá mak neʼe ajuda nia? “Koʼalia ba Maromak ajuda haʼu haree haʼu-nia an hanesan nia haree haʼu. Maski haʼu-nia laran duun haʼu beibeik, maibé Maromak la halo hanesan neʼe. Neʼe mós ajuda haʼu atu la rende an.” Saida mak rezultadu? Nia dehan: “Orasaun ajuda haʼu atu haree Jeová nuʼudar Belun, Aman no Maromak neʼebé hadomi no hanoin haʼu. Haʼu fiar nia sei sempre apoia haʼu, naran katak haʼu hakaʼas an halo buat neʼebé nia hakarak.”

Bainhira Isabel haree ninia oan kontente iha ninia moris, maski nia moris mai defisiente, Isabel hatene katak ninia oan mak hanesan resposta ba nia orasaun

Hanoin mós esperiénsia kona-ba Isabel. Bainhira nia sai isin-rua, doutór sira dehan katak ninia oan sei aleijadu. Isabel triste tebes. Ema balu mós dehan diʼak liu nia halo abortu deʼit. Nia dehan: “Haʼu sente haʼu atu mate tanba haʼu-nia laran-susar.” Saida mak nia halo? “Haʼu halo orasaun fila-fila atu husu Maromak nia ajuda.” Ikusmai nia partus oan-mane ida naran Gerard, no nia aleijadu duni. Maski nuneʼe, Isabel sente katak Maromak hatán ninia orasaun. Oinsá? Nia dehan: “Bainhira haʼu haree haʼu-nia oan, neʼebé agora tinan 14, kontente iha ninia moris, maski nia defisiente, haʼu hatene katak nia mak resposta ba haʼu-nia orasaun. Nia mak bensaun boot liu neʼebé Maromak Jeová fó mai haʼu.”

Liafuan husi ema sira-neʼe halo ita hanoin kona-ba ema neʼebé hakerek salmo ida, nia dehan: “Oh Jeová, Ita sei rona ba ema laran-maus sira-nia harohan. Ita sei hametin sira-nia laran no see tilun didiʼak ba sira.” (Salmo 10:17) Neʼe mak razaun diʼak tebes atu la rende an hodi halo orasaun!

Iha Bíblia laran, ita bele lee Jesus nia orasaun barak. Ida neʼebé ema barak hatene mak orasaun neʼebé nia hanorin ba ninia dixípulu sira. Saida mak ita bele aprende husi orasaun neʼe?