Skip to content

Maromak bele ajuda haʼu se haʼu halo orasaun ka lae?

Maromak bele ajuda haʼu se haʼu halo orasaun ka lae?

Bíblia nia resposta

Sin, Maromak ajuda ema neʼebé ho laran husu ba Nia tuir buat neʼebé Nia hakarak. Maski Ita nunka halo orasaun, maibé Ita bele hetan laran-manas husi ezemplu sira iha Bíblia kona-ba ema neʼebé halo orasaun ba Maromak hodi dehan: “Ajuda haʼu”. Porezemplu:

  • “Ajuda haʼu, oh Jeová, haʼu-nia Maromak; salva haʼu ho Ita-nia domin neʼebé laran-metin.”—Salmo 109:26.

  • “Haʼu kbiit-laek no kiak . . . Ita mak haʼu-nia ajuda-naʼin no haʼu-nia salvadór.”—Salmo 40:17.

Klaru katak, ema neʼebé hakerek liafuan sira-neʼe iha fiar neʼebé metin ba Maromak. Tuir loloos, Maromak rona ba ema hotu neʼebé hakbesik ba nia ho haraik an, hanesan sira neʼebé “laran-kanek” ka “laran-triste”.​—Salmo 34:18.

Tan neʼe, keta hanoin katak Maromak dook husi ita no la hanoin kona-ba ita-nia problema sira. Bíblia hatete: “Maski Jeová hela iha fatin neʼebé aas, nia haree ema haraik an, maibé nia hatene ema loko an husi dook deʼit.” (Salmo 138:6) Tuir loloos, Jesus mós hatete ba ninia dixípulu sira: “Fuuk-lahan iha imi-nia ulun mós nia sura hotu.” (Mateus 10:30) Maromak hatene didiʼak ita duké ita rasik. Tan neʼe, nia sei rona duni ba ita kuandu ita halo orasaun hodi husu ninia ajuda iha ita-nia susar laran.​—1 Pedro 5:7.