A no de fu taki dati yu e fruwakti taki Gado Wortu, Bijbel, musu de tra fasi leki iniwan tra buku, èn na so a de tu. Milyardmilyard fu a buku disi de fu feni na ini hondrohondro difrenti tongo. Den bun rai na ini Bijbel e yepi wi fu tron moro bun sma.—Leisi 1 Tesalonikasma 2:13; 2 Timoteyus 3:16.

Wi sabi taki Bijbel e komoto fu Gado fu di a e taki soifri san o pasa na ini a ten di e kon. Nowan sma man du a sani dati. Fu eksempre, luku a buku Yesaya. Sma ben feni wan kopi fu a buku dati na ini wan bergi-olo krosibei fu a Redi Se. Na ini a kopi dati di ben meki moro leki wán hondro yari fosi Yesus gebore, a ben skrifi taki noiti moro sma ben o tan na ini Babilon. A fosi leisi di a sani dati kon tru ben de furu yari baka di Yesus ben du a preikiwroko fu en na grontapu.—Leisi Yesaya 13:19, 20; 2 Petrus 1:20, 21.

Bijbel ben skrifi na ini wan pisi ten fu sowan 1600 yari. Sowan 40 man skrifi Bijbel, èn den skrifi fu wán prenspari tori. Ma toku den sani di den skrifi e kruderi nanga makandra. Fa dati kan? Gado ben e sori den san den ben musu skrifi.—Leisi 2 Samuel 23:2.

Son leisi, Gado ben e taki nanga den Bijbel skrifiman nanga yepi fu engel, na ini fisyun, noso na ini dren. Nofo tron, Gado ben e poti a denki fu en na ini a frustan fu a skrifiman èn a ben e gi en na okasi fu gebroiki en eigi wortu fu skrifi a boskopu fu Gado.—Leisi Openbaring 1:1; 21:3-5.