A kon na krin suma na a tiriman fu grontapu

’GADO o trowe a tiriman fu a grontapu disi go na dorosei’, na so Yesus ben taigi sma wan leisi. Bakaten, a taigi den tu taki ’a tiriman fu grontapu no abi krakti na en tapu’ èn taki „Gado krutu a tiriman fu grontapu kaba” (Yohanes 12:31; 14:30; 16:11). Fu suma Yesus ben e taki?

Te wi e luku san Yesus ben taki fu „a tiriman fu a grontapu disi”, dan a de krin taki a no ben e taki fu en Papa, Yehovah Gado. Ma suma na „a tiriman fu a grontapu disi” dan? Fa Gado o ’trowe a tiriman disi go na dorosei’ èn sortu „krutu” a kisi?

„A tiriman fu a grontapu disi” e sori suma a de

Bigi ogriman lobi fu meki bigi fu a makti di den abi, èn na dati Didibri du tu di a suku fu kori Yesus, a Manpikin fu Gado. Baka di Satan sori Yesus „ala den kownukondre” fu grontapu, dan a taigi en a sani disi: „Mi o gi yu ala a makti nanga a glori fu den kownukondre disi, bika den na fu mi èn mi kan gi den na suma mi wani. Fu dati ede, efu yu anbegi mi wán leisi nomo, dan ala den sani disi sa de fu yu.”​—Lukas 4:5-7.

Efu trutru Didibri na a ogri nomo di e pasa na wi lontu, soleki fa son sma e taki, dan fa wi musu frustan a tesi dati? A de so taki wan takru prakseri ben e tesi Yesus noso taki wan strei ben kon de na ini en ati, baka di a ben teki dopu? Efu dati de so, dan fa Bijbel ben kan taki dati „a no ben abi nowan sondu”? (1 Yohanes 3:5) Yesus no ben taki kwetikweti dati Didibri no abi krakti tapu sma, ma na presi fu dati a taki dati Didibri na „a tiriman fu grontapu”, „wan kiriman”, nanga „wan leiman”.​—Yohanes 14:30; 8:44.

Sowan 60 yari baka di Didibri ben tesi Krestes, na apostel Yohanes memre den Kresten taki Didibri abi bigi krakti tapu sma. Yohanes ben taki dati „heri grontapu de na ini a makti fu na ogriwan”. A ben taki tu dati Didibri „e kori sma na heri grontapu” (1 Yohanes 5:19; Openbaring 12:9). Bijbel e sori krin taki wan ogri yeye di wi no man si, na „a tiriman fu grontapu”. Ma o furu krakti a abi tapu libisma?

A tiriman fu grontapu e gi makti na den bakaman fu en

Di na apostel Paulus ben skrifi fu a feti di Kresten musu feti gi a bribi fu den, dan a sori krin suma na den moro bigi feanti fu den. A ben taki: „Wi no e feti nanga libisma, ma nanga den tirimakti, nanga den wan di abi makti, nanga den tiriman fu a dungru grontapu disi, [èn] nanga den ogri yeye na hemel” (Efeisesma 6:12). Fu di wi no e feti nanga libisma ma nanga den ogri yeye na hemel, meki a de krin taki Didibri no de na ogri di e pasa na wi lontu. Sobun, Didibri e gebroiki tra engel di ben opo densrefi teige Gado, fu abi krakti tapu libisma. Den engel disi gowe libi „a tanpresi fu den” na hemel.​—Yudas 6.

A Bijbel buku Danièl di abi profeititori na ini, e tyari kon na krin fa den „tiriman fu a grontapu disi” tiri grontapu sensi owruten. A profeiti Danièl ben e broko en ede srefisrefi nanga den Dyu di ben drai go baka na Yerusalem, baka di den ben komoto na ini katibo na Babilon, na ini 537 bifo Krestes. Fu dati ede, a begi gi den dri wiki langa. Wan engel di Gado  ben seni fu gi a profeiti deki-ati, fruteri en fu san ede a ben teki so langa fosi a doro drape. Na engel ben taki: „A granman fu a kontren fu a kownukondre fu Persia ben e gens mi tutenti na wán dei langa.”​—Danièl 10:2, 13.

Suma ben de a ’granman fu Persia’? A de krin taki na engel no ben e taki fu Kownu Sirus fu Persia, fu di a kownu dati ben lobi Danièl nanga a pipel fu en. Boiti dati, fa wan libisma kownu ben kan kakafutu gi wan yeye dri wiki langa te wán engel nomo ben kiri 185.000 tranga fetiman na ini wán neti? (Yesaya 37:36) Na ogri-ati ’granman fu Persia’ ben kan de soso wan futuboi fu Didibri, noso wan ogri yeye di ben kisi a makti fu tiri a Gran Kownukondre Persia. Moro fara na ini a tori, na engel fu Gado taki dati a ben o abi fu feti baka nanga „a granman fu Persia” èn nanga wan tra makti ogri yeye, „a granman fu Grikikondre”.​—Danièl 10:20.

San disi e sori wi? A de krin taki ’tiriman’ de di wi no man si. Den tiriman dati na den makti ogri yeye di e tiri grontapu makandra nanga Satan Didibri, a fesiman fu den. Ma san den e suku fu du te nanga now?

A tiriman fu grontapu e sori den fasi fu en

Na ini Openbaring, a lasti buku fu Bijbel, na apostel Yohanes e fruteri fa Yesus, di de sosrefi a gran engel Mikael, e wini Didibri nanga den ogri yeye fu en. Boiti dati, a e taki fu den takru bakapisi di sa kon te den fringi den ogri yeye disi go na grontapu. Bijbel e taki: „Helu fu grontapu . . . , bika Didibri saka kon na unu èn a abi bigi atibron fu di a sabi taki en ten syatu.”​—Openbaring 12:9, 12.

Fa Didibri sori taki a abi bigi atibron? Te ogriman e bruya, dan den no abi bisi fu du ala san den man fu kisi san den wani. Na so Didibri nanga den ogri yeye fu en de nomonomo tu fu sorgu taki grontapu nanga den sma na tapu kisi pori makandra nanga den. Fu di Didibri sabi taki en ten syatu, meki a e gebroiki wan prenspari sani fu a grontapu disi fu wiki wan lostu na ini sma fu bai ala sortu sani di den no abi fanowdu srefi. A sani di a e gebroiki na den bigi bisnis. Disi e meki taki sma e kaba den gudu fu grontapu èn den e pori ala sani na den lontu. Te fu kaba libisma no o man libi moro na grontapu.​—Openbaring 11:18; 18:11-17.

Soleki fa wi si, dan sensi di libisma de, Didibri e angri fu kisi moro makti. Wi kan si dati tu te wi e luku fa sani e waka na ini a politiek èn na ini den kerki. A buku Openbaring e teki den politiek makti gersi nanga ogri meti di kisi „bigi makti” fu Didibri. A buku e taki tu dati a syen fasi fa kerki e moksi nanga politiek, na hurudu (Openbaring 13:2; 17:1, 2). Prakseri den sani di sma ondrofeni na ini den hondrohondro yari di pasa. Sma kwinsi trawan, den gebroiki trawan leki srafu, kondre feti nanga makandra, èn sma fu difrenti ras feti nanga makandra. Den sani disi meki taki milyunmilyun sma lasi den libi. Yu denki taki sma kan taki nanga leti taki den ogri-ati sani di pasa na grontapu na sani di libisma gwenti du fu densrefi? Noso den sani disi e pasa fu di ogri yeye di wi no man si e kori libisma?

Bijbel e sori krin suma na a sma di abi krakti tapu den tiriman nanga den tirimakti fu grontapu. Awansi libisma sabi noso awansi den no sabi, den abi den fasi nanga a denki fu a tiriman fu grontapu èn neleki en den de klariklari fu du iniwan sani fu kisi san den wani. Ma o langa libisma o pina na ondro a makti fu Didibri?

Heri esi Didibri no o man du noti moro

A wroko di Krestes du na grontapu na ini a fosi yarihondro sori taki heri esi Didibri nanga den ogri yeye fu en o kisi pori. Di den disipel fu Yesus fruteri en fa den ben puru ogri yeye na sma tapu, dan a taigi den: „Mi si fa  Satan fadon kaba neleki faya di e koti na hemel” (Lukas 10:18). Nanga den wortu dati, Yesus e sori fa a breiti taki a o wini a tiriman fu grontapu te a o feti nanga en te a de baka na hemel leki a Gran engel Mikael (Openbaring 12:7-9). Te wi e ondrosuku Bijbel profeititori finifini, dan wi o si taki a sani disi pasa na hemel na ini 1914, noso syatu baka dati. *

Sensi a yari dati, Didibri sabi taki heri esi a o kisi pori. Aladi ’heri grontapu de na ini a makti fu en’ èn a e du ala san a man fu basi libisma, toku milyunmilyun sma no e gi pasi taki a kori den. Bijbel opo den ai so taki den kon sabi suma na Didibri èn san na den triki fu en (2 Korentesma 2:11). Den wortu di Paulus ben skrifi gi den Kresten brada nanga sisa fu en e gi den howpu. A ben taki: „Ete wan syatu pisi ten, dan a Gado di e gi freide o meki unu masi Satan na ondro un futu.” *​—Romesma 16:20.

Heri esi, Didibri no o man du noti moro! Na ondro a lobi-ati tiri fu Krestes, reti-ati libisma o kenki grontapu, na agersi futubangi fu Gado, kon tron wan paradijs. Ogridu, bita-ati, nanga bigi-ai o kon na wan kaba fu ala ten. Bijbel e taki: „Sma no o memre den fositen sani moro” (Yesaya 65:17). A sa de wan frulekti trutru gi ala sma di e komoto na ondro a makti fu a tiriman fu a grontapu di e du sani kibrikibri!

[Futuwortu]

[Prenspari pisi na tapu bladzijde 9]

Na ondro a lobi-ati tiri fu Krestes, reti-ati libisma o kenki grontapu kon tron wan paradijs