Leisiman e aksi

A de so trutru taki na dri koniman ben go luku a beibi Yesus?

Na heri grontapu, den tori fu Kresneti e taki fu dri kownu, noso koniman di tyari diri kado gi a beibi Yesus. A tori disi tru? A e kruderi nanga san pasa trutru? Meki wi go luku a tori disi.

Den Evangelietori fu Mateyus nanga Lukas, e taki fa sani waka baka makandra na a ten di Yesus gebore. Den tori disi e sori taki na soso den skapuman di ben de na ini den wei na ini a kontren drape, ben go luku Yesus di a gebore. Den kownu noso koniman, soleki fa sma e kari den, no ben de kownu èn Bijbel no e taki omeni fu den ben de. Den man disi trutru ben de lukuman di e ondrosuku den stari fu sabi san o pasa na ini a ten di e kon. Den lukuman no go luku Yesus di a ben de wan beibi di ben didon na ini wan baki pe meti e nyan, ma den doro na ten di Yesus ben de wan yongu pikin di ben e tan na ini wan oso. Yesus ben kan dede srefi fu di den man disi ben kon drape!

Meki wi go luku finifini now san a Bijbel skrifiman Lukas skrifi fu a ten di Yesus gebore. Drape a e taki: „Yu ben abi skapuman di ben e tan na ini den wei fu hori wakti gi den skapu fu den te neti . . . Ne wantronso na engel fu Yehovah ben tanapu nanga den, èn . . . na engel taigi den: ’Unu sa feni wan beibi di domru na ini pisipisi krosi èn a didon na ini wan baki pe meti e nyan na ini.’ . . . Baka dati den go esi-esi èn den feni Maria nanga Yosef, nanga a beibi di ben didon na ini a baki pe meti e nyan na ini.”—Lukas 2:8-16.

Na soso Yosef, Maria, nanga den skapuman ben de drape di a beibi Yesus ben didon na ini a nyanyan baki fu den meti. Na Evangelietori fu Lukas no e taki dati tra sma ben de drape.

Meki wi go luku now san skrifi na ini Mateyus 2:1-11 na ini Da Bijbel na ini Sranantongo: „Now da tem di da mama foe Jezus ben meki Hem na ini Betlehem foe Juda, na ini dem dei foe kownoe Herodes, loekoe, som koniman ben komopo foe da oost kom na Jerusalem . . . En di dem ben kom na ini da oso, dem ben si da jongoe pikin nanga Maria, Hem mama.”

Luku taki a tekst e taki fu „som koniman”, ma a no e taki fu „dri koniman”. Boiti dati, den man disi ben komoto fu na owstu sei èn den go fosi na Yerusalem, ma den no go na Betlehem, a foto pe Yesus gebore. Di den doro Betlehem te fu kaba, dan Yesus ben de wan „jongoe pikin”. A no ben de wan beibi moro di ben de na wan presi pe meti e tan, ma a ben de na ini wan oso.

Boiti dati, aladi Da Bijbel e kari den man disi „koniman,” tra Bijbelvertaling e kari den „lukuman”. Wan buku e taki dati a wortu „koniman” komoto fu „wan Griki wortu di abi fu du nanga den priester fu Persia di ben sabi luku den stari fu man koti luku” (A Handbook on the Gospel of Matthew). Wan wortubuku e taki dati a wortu wani taki „towfruman, sma di ben taki dati den abi krakti fu du wondru, noso bonuman” (The Expanded Vine’s Expository Dictionary of New Testament Words).

Aladi furu sma na ini a ten disi e go na lukuman nanga bonuman, toku Bijbel e warskow wi gi den sani disi (Yesaya 47:13-15). Den sani disi abi fu du nanga afkodrei, èn Yehovah Gado e tegu gi den sani disi (Deuteronomium 18:10-12). Dati meki nowan engel fu Gado taigi den lukuman taki Yesus gebore. Ma Gado ben warskow den man disi na ini wan dren fu no go baka na a ogri Kownu Herodes, di ben suku fu kiri Yesus. Na so „den teki wan tra pasi fu drai go baka na a kondre fu den”.—Mateyus 2:11-16.

Tru Kresten ben o fruteri wan tori fu a ten di Yesus gebore, aladi son sani na ini a tori dati no tru? Nôno, kwetikweti.