Kande wi e firi leki wi no sabi san fu du te wan mati fu wi e pina, fu di a abi wan siki di abi krakti tapu en frustan. Ma wi kan sori en taki wi lobi en te wi e yepi en fu horidoro aladi a abi so wan siki.

„De gaw fu yere.”​—YAKOBUS 1:19.

Wan fu den moro bun fasi fa yu kan yepi yu mati na fu arki te a wani taki. No denki taki yu musu abi wan piki tapu ala sani di a e taki. Meki a si taki yu e arki èn meki a sabi taki yu e firi gi en. Pruberi fu frustan fa a e firi èn no krutu en. Hori na prakseri dati a kan taki sani sondro fu denki di kan hati yu firi, ma bakaten a kan firi sari taki a taigi yu so wan sani.​—Yob 6:2, 3.

„Taki na wan fasi di e trowstu den.” ​—1 TESALONIKASMA 5:14.

Kande yu mati e bruya srefisrefi noso kande a e firi leki a no warti noti. Te yu sori en taki yu lobi en, dan dati kan trowstu en èn gi en deki-ati awinsi yu no sabi precies san yu musu taki.

„Wan trutru mati e sori lobi ala ten.”​—ODO 17:17.

Aksi yu mati efu yu kan yepi en. Na presi fu denki taki yu sabi kaba fa yu musu yepi, dan aksi en san yu kan du. Efu a muilek gi en fu taigi yu san a abi fanowdu, dan aksi en fu du  wan sani makandra, soleki fu go waka pikinso. Noso yu kan aksi fu yepi en bai sani, fu krin en oso, noso fu yepi en nanga wan tra sani.​—Galasiasma 6:2.

„Abi pasensi.”​—1 TESALONIKASMA 5:14.

A no ala ten yu mati o wani taki. Taigi yu mati dati yu o breiti fu arki en te a firi fu taki. Fu di yu mati e siki, meki a kan taki noso du sani son leisi di o hati yu. A kan kenki prakseri wantronso noso a kan mandi. Abi pasensi èn sori lobi te yu e yepi en.​—Odo 18:24.

„Mi e sorgu taki mi de klariklari fu arki te mi mati wani taki fa a e firi. Awinsi mi no man lusu den problema fu en, toku mi e pruberi fu arki san a abi fu taki. Son leisi na wan sma a abi fanowdu nomo fu arki en, dan a e firi bun.”​—Farrah. a A abi wan mati di abi wan siki di e meki taki a e frede èn firi brokosaka dororonomo èn disi e meki taki a no wani nyan.

„Wan fu den mati fu mi abi bun fasi èn a no e krutu mi. A kari mi kon na en oso fu nyan wan switi nyanyan. Di mi ben de na en oso, dan a switifasi fu en ben meki en makelek gi mi fu taki fa mi e firi èn a sani dati gi mi furu deki-ati!”​—Ha-eun. A abi wan siki di e meki taki a e firi brokosaka dororonomo.

„A prenspari fu abi pasensi. Te mi frow e du sani di e meki mi mandi, dan mi e memre misrefi taki a e du so fu di a e siki. Disi e yepi mi fu no atibron nanga en èn fu sori switifasi gi en.”​—Jacob. En frow abi wan siki di e meki taki a e firi brokosaka dororonomo.

„Mi frow du bun furu fu yepi mi. Te mi e firi so bruya taki mi no wani du noti, dan a no e dwengi mi fu du wan sani di mi no wani du. Disi wani taki dati son leisi a no man du wan sani di a ben sa wani du. A no e denki ensrefi nomo èn a e du so furu gi mi. Dati meki mi lobi en trutru.”​—Enrico. A abi wan siki di e meki taki a e frede doronomo.