Yu e memre disi ete?
Yu man memre san yu leisi na ini den Waktitoren di kon na doro no so langa pasa? Luku efu yu kan gi piki na tapu den aksi di e kon now:
San wi kan du fu no takitaki sani sondro fu denki?
Wi musu ondrosuku wi ati. Na presi fu denki takru fu wan brada noso sisa, a bun fu luku fu san ede wi e denki takru fu en. A kan taki wi e taki takru fu wan sma, fu di wi wani taki trawan denki taki wi bun moro en. Boiti dati, efu wi e denki takru fu wan brada noso sisa, dan dati kan meki sani moro ogri.—15/8, bladzijde 21.
San a Wèt ben taki fu a fasi fa Gado e denki fu umasma?
Den Israel uma ben de fri fu teki den eigi bosroiti èn den ben kan kisi leri. Sma ben musu sori lespeki gi den èn gi den grani. A Wèt ben sori tu taki den ben kan kisi kibri te sma no ben libi bun nanga den.—1/9, bladzijde 5-7.
San o pasa syatu fosi a dei fu Yehovah kon?
Sma o taki: „Freide de èn ala sani e waka bun!” Den pipel o go feti nanga Babilon a Bigiwan èn den o pori en. Sma o kon feti nanga Gado pipel. A feti Armagedon o bigin èn baka dati den o trowe Satan nanga den ogri yeye fu en go na ini a peti di no abi gron.—15/9, bladzijde 4.
Fu san ede a bun taki wi no sabi o ten a kaba o kon?
Fu di wi no sabi soifri o ten a kaba o kon, meki wi abi na okasi fu sori san de na ini wi ati trutru. Wi abi na okasi tu fu meki Gado en ati prisiri. A o moro makriki gi wi fu dini Gado nanga wi heri ati èn fu no denki wisrefi nomo. Wi o frutrow moro na tapu Gado èn wi o du ala muiti fu du san en Wortu e taki. Boiti dati, wi abi na okasi fu leri wan sani fu den tesi di e miti wi nownowde.—15/9, bladzijde 24 nanga 25.
Fa wi kan gebroiki Genesis 3:19 fu taki nanga wan sma di e bribi na ini wan hel?
A tekst e taki dati di Adam dede, a drai go baka na a gron, a no go na wan hel pe faya de.—1/10, bladzijde 13.
Suma na den „seibi stari” na ini Yesus en reti-anu, di Openbaring 1:16, 20 e taki fu den?
Den stari na den salfu owruman na ini a gemeente, ma den sani di Bijbel e taki fu den abi fu du tu nanga ala owruman na ini den gemeente.—15/10, bladzijde 14.
San wan osofamiri kan du te den abi paiman?
Trowpatna musu meki ten fu taki krin nanga makandra fu den paiman fu den èn den musu du dati sondro fu ati bron. A ben o de wan yepi gi den fu luku omeni moni den e gebroiki. Wan fasi de fa den kan meki moro moni? Noso den kan pruberi fu no gebroiki so furu moni? Den musu bosroiti sortu paiman den o pai fosi. Kande den kan taki nanga den sma di den musu pai. Ma den musu hori na prakseri taki a no ala ten sani o waka soleki fa den wani. Den no musu si moni leki a moro prenspari sani (1 Tim. 6:8).—1/11, bladzijde 19-21.
Soleki fa Yesaya 50:4, 5 e sori, dan fa Yesus ben sori sakafasi?
Den vers disi e taki dati a sma di abi „wan tongo fu den wan di kisi leri” no ben o ’du sani tra fasi leki fa Gado taigi en fu du’. Fu di Yesus ben abi sakafasi, meki a ben luku finifini san en Tata ben e leri en. Yesus ben e angri fu kisi leri fu Yehovah. A ben si tu fa sakafasi meki taki Gado sori sari-ati gi sondu libisma.—15/11, bladzijde 11.
Fa wan stampu fu Estkondre e sori taki Yehovah Kotoigi tan dini Gado fayafaya aladi sma frufolgu den?
Na ini 2007, a postkantoro fu Estkondre tyari wan stampu kon na doro fu memre den sma fu Estkondre di den kiri na a ten di Stalin ben de tiriman. A nomru 382, di de na tapu a stampu, e sori omeni Kotoigi nanga den pikin fu den, sma tyari gowe na den strafuman-kampu te na Rosiakondre na ini a yari 1951.—1/12, bladzijde 27 nanga 28.
