Ala sma kan firi warti

„Wi musu seti wan nyun grontapu, iya, wan grontapu di bun omeni tron moro a wan disi, èn pe ala sma e meki trawan firi taki den warti.”—HARRY TRUMAN, A PRESIDENTI FU AMERKANKONDRE, NA INI SAN FRANCISCO, KALIFORNIA, NA AMERKANKONDRE, 25 APRIL 1945.

NELEKI furu tra sma na ini den yari baka a di fu Tu Grontapufeti, Presidenti Truman ben e bribi taki libisma ben kan teki leri fu den sani di pasa na ini a historia. Na so fasi den ben o man seti „wan nyun grontapu” pe ala sma e firi taki den warti. A de wan sari sani taki a sani dati no pasa. Na ini a ten disi, difrenti sani e meki taki sma no e firi warti. Dati e kon fu di a rutu fu a problema a no libisma srefi, ma na a moro bigi feanti fu libisma.

A rutu fu a problema

Bijbel e taki dati a feanti disi na Satan Didibri. Sensi a bigin fu a libisma historia, na ogri yeye disi krutu Gado fu di a ben feni taki Gado no abi a reti fu tiri. Den sani di Satan taigi Eva na ini a dyari fu Eden ben tyari kon na krin taki a abi leki marki fu kori libisma so taki den no sa dini a Mekiman fu den moro (Genesis 3:1-5). Prakseri den takru bakapisi di Adam nanga Eva kisi di den arki Didibri! Di den trangayesi a wet fu Gado di ben taki dati den no mag nyan fu a froktu, dan wantewante den „go kibri gi Yehovah Gado”. Fu san ede den ben du dati? Adam ben taki: „Mi kon frede fu di mi ben de nanga sososkin. Dati meki mi go kibri” (Genesis 3:8-10). A banti di Adam ben abi nanga en hemel Tata ben kon de tra fasi, èn a bigin si ensrefi heri tra fasi tu. A ben e syen èn a no ben e firi bun moro te Yehovah ben e taki nanga en.

Fu san ede Didibri ben wani Adam fu lasi  lespeki gi ensrefi? We, Gado meki libisma leki wan prenki fu ensrefi, èn Satan lobi fu si te sma e tyari densrefi na wan fasi di no e sori a glori fu Gado (Genesis 1:27; Romesma 3:23). A sani disi e yepi wi fu frustan fu san ede sma du so furu sani fu wisiwasi trawan. Satan di de „a gado fu a grontapu sistema disi”, meki sma tyari densrefi na a fasi disi ’na ini a ten di a wan libisma tiri a trawan na wan fasi di e tyari takru bakapisi gi en’ (2 Korentesma 4:4; Preikiman 8:9; 1 Yohanes 5:19). Ma a sani disi wani taki dati libisma no sa warti noiti?

Yehovah e sori libisma taki den warti

Prakseri baka fa sani ben de na ini a dyari fu Eden, bifo Adam nanga Eva sondu. Den ben abi bogobogo nyanyan, den ben abi wroko di ben e gi den prisiri, èn den nanga den bakapikin fu den ben o man abi wan gosontu libi fu têgo (Genesis 1:28). Ala sani na ini a libi fu den ben sori krin taki Gado lobi libisma èn taki den warti na ini en ai.

A de so taki libisma no ben warti moro na ini Yehovah ai di Adam nanga Eva sondu? Nôno. Yehovah ben e hori na prakseri taki den ben e syen now, fu di den ben de nanga sososkin. Na wan lobi-ati fasi, Gado ’teki metibuba èn a meki langa krosi’ gi den fu weri, na presi fu den figabon wiwiri di den ben nai na makandra fu tapu den skin (Genesis 3:7, 21). Na presi taki Gado libi den meki den firi syen, A handri nanga den na wan fasi di meki den firi warti.

Nofo tron, sma e kwinsi pikin-nengre di no abi papa nanga mama, sosrefi uma di lasi den masra na ini dede, nanga trakondre sma. Ma na ini a ten fu den Israelsma, Yehovah ben e sori sari-ati gi den sortu sma disi (Psalm 72:13). Fu eksempre, te den Israelsma ben e koti a nyanyan di den prani èn te den ben e piki den froktu fu den olèifbon nanga den droifibon, dan den no ben musu go baka fu go teki san ben tan abra na ini a gron, noso na den bon. Na presi fu dati, Gado ben komanderi den taki den sani di ben tan abra, ben ’musu tan gi a doroseisma di e tan na ini a kondre fu den, gi a boi di no abi papa, èn gi na uma di lasi en masra na ini dede’ (Deuteronomium 24:19-21). Te sma ben e hori densrefi na den wet disi, dan trawan no ben abi fu go begi sma sani, èn srefi den moro pôtisma ben e feni wan lespeki wroko.

Yesus ben sori trawan taki den warti

Di Gado Manpikin, Yesus Krestes, ben de na grontapu, dan a ben wani sori trawan taki den warti. Fu eksempre, di a ben de na ini Galilea, dan wan man di ben abi gwasi na en heri skin, kon na en. A Wet di Gado ben gi Moses, ben taki dati wan gwasiman ben musu luku bun taki a no gi trawan a siki fu en, èn fu dati ede a ben musu bari: „Mi no krin, mi no krin! (Lefitikus 13:45) Ma di a man kon krosibei fu Yesus, a no bari fu warskow en. Na presi fu dati, a fadon na gron èn a begi Yesus: „Masra, efu yu  wani nomo, yu kan meki mi kon krin” (Lukas 5:12). San Yesus du? Yesus no kosi a man fu di a ben pasa a Wet, a no du leki a no si a man, èn a no wai pasi gi en tu. Na presi fu dati, a fasi a man fu sori en taki a warti, èn a taki: „Mi wani. Kon krin.”—Lukas 5:13.

Na tra okasi, Yesus sori taki a kan meki sma kon betre sondro fu fasi den, èn son leisi a ben de farawe fu den sma dati srefi. Ma di Yesus ben musu meki a gwasiman kon betre baka, dan a bosroiti fu fasi a man disi (Mateyus 15:21-28; Markus 10:51, 52; Lukas 7:1-10). Fu di a man ben „abi gwasi na en heri skin”, meki a no de fu taki dati nowan sma ben fasi en wan heri pisi ten. A ben musu fu de wan trowstu gi en di a firi taki wan sma fasi en! Ala san a man ben wani, na fu kon betre fu a gwasi fu en. Ma a fasi fa Yesus meki a man kon betre baka ben yepi a man na wan tra fasi tu, iya, a meki a man firi warti baka. Yu abi sma na ini a ten disi di e meki muiti fu sori trawan taki den warti? Efu dati de so, dan fa den e sori dati?

Wan gronprakseri di e gi sma deki-ati fu meki trawan firi warti

Yesus ben taki wan sani di furu sma e si leki a moro pôpi rai di a gi fu sori sma fa den musu handri nanga trawan. A ben taki: „Ala sani di unu wani meki sma du gi unu, na dati un musu du gi den tu” (Mateyus 7:12). A tumusi prenspari gronprakseri disi e gi sma deki-ati fu lespeki trawan, bika den ben o wani taki trawan lespeki den tu.

Soleki fa a historia e sori, dan a no makriki gi libisma fu fiti a rai disi, nôno, nofo tron sma e handri kontrari fu dati. Wan man di wi sa kari Harold, e taki: „Fu taki en leti, fosi mi ben lobi fu wisiwasi trawan. Mi no ben abi fu taki furu fu meki sma atibron, fu meki den firi syen, èn fu meki den krei srefi.” Ma wan sani pasa di  meki taki Harold kenki a fasi fa a ben e handri nanga trawan. „Wan tu Kotoigi fu Yehovah bigin kon na mi. Te mi e prakseri fa mi ben de, dan mi e syen fu wan tu fu den sani di mi taigi den, èn fu a fasi fa mi ben e handri nanga den son leisi. Ma toku den tan kon na mi, èn safrisafri den tru tori fu Bijbel bigin naki mi ati, èn disi meki taki mi kenki den fasi fu mi.” Tide na a dei, Harold e dini leki wan owruman na ini a Kresten gemeente.

Harold na wan krinkrin buweisi taki ’a wortu fu Gado de libilibi, taki a abi krakti, èn taki a srapu moro iniwan feti-owru di e koti na tu sei; a e koti go so dipi taki a e prati sili nanga yeye srefi, èn a e prati bonyo nanga a bonyo-fatu fu makandra; èn a man si krin san na ati e denki èn san a abi na prakseri’ (Hebrewsma 4:12). Gado Wortu man naki wan sma ati, èn a man kenki a fasi fa a sma e denki èn fa a e tyari ensrefi. A moro prenspari fasi fa wi kan meki sma firi taki den warti, na te wi e du ala san wi man fu yepi den, na presi fu hati den firi fu den. Iya, wi musu abi a tranga winsi fu gi grani na sma, na presi fu wisiwasi den.—Tori fu den Apostel 20:35; Romesma 12:10.

Libisma sa firi warti baka

Yehovah Kotoigi wani sori sma tu taki den warti, èn fu dati ede den e taki nanga trawan fu a tumusi moi howpu di Bijbel e gi (Tori fu den Apostel 5:42). A moro moi fasi fa wi kan lespeki trawan èn fa wi kan meki den firi taki den warti, na te wi e fruteri den a ’bun nyunsu fu wan moro bun sani’ (Yesaya 52:7). A bun nyunsu disi sa yepi den fu kon tron wan „nyun sma di e kisi nyun fasi”, èn na so den no sa abi a „takru lostu” moro fu wisiwasi trawan (Kolosesma 3:5-10). Boiti dati, den sa kon sabi tu taki Yehovah abi na prakseri fu tyari wan kaba kon na den situwâsi nanga den denki di e meki sma firi leki den no warti. A sa puru sosrefi a Sma di e meki taki den sani disi e pasa, namku Satan Didibri (Danièl 2:44; Mateyus 6:9, 10; Openbaring 20:1, 2, 10). Na te grontapu ’sa kon furu nanga a sabi fu Yehovah’, dan fosi ala sma sa meki trawan firi taki den warti.—Yesaya 11:9.

Wi e gi yu deki-ati fu kon sabi moro fu a tumusi moi howpu disi. Te yu abi demakandra nanga Yehovah Kotoigi, dan yusrefi sa kon si taki te sma e fiti den gronprakseri fu Bijbel, den kan meki trawan firi warti. Yu sa kon sabi tu taki heri esi a Kownukondre fu Gado sa tyari ’wan nyun grontapu kon di bun omeni tron moro a wan disi’. Iya, dati sa de wan grontapu pe „ala sma e meki trawan firi taki den warti”, èn pe noiti moro sma sa wisiwasi makandra.

[Faki/Prenki na tapu bladzijde 6]

Fu di den tan getrow na Gado, meki den tan abi a firi taki den warti

Na a ten fu a di fu Tu Grontapufeti, moro leki 2000 Kotoigi fu Yehovah ben musu go koti strafu na ini Nazi strafuman kampu, soso fu di den ben wani tan getrow na Gado. Gemma La Guardia Gluck, di ben koti strafu na ini a strafuman kampu Ravensbrück, ben fruwondru fu a fasi fa Yehovah Kotoigi ben tan getrow na a Gado fu den. Na uma disi ben skrifi wan buku di nen My Story, èn na ini a buku dati a fruteri: „A Gestapo ben meki bekènti taki iniwan Bijbel Ondrosukuman di ben o drai baka gi a bribi fu en èn di ben o poti en nen na tapu wan papira leki buweisi fu dati, ben o kon fri èn sma no ben o frufolgu en moro.” Na uma e taki fu den wan di weigri fu poti den nen na tapu a papira dati: „Den ben feni taki a moro betre fu tan pina èn fu wakti nanga pasensi tapu a nyun grontapu.” Fu san ede den ben teki a bosroiti disi? Magdalena di ben kari na a bigin fu a fosi artikel abi 80 yari now, èn a e taki: „A ben de moro prenspari gi wi fu tan getrow na Yehovah leki fu du iniwan sani fu man tan na libi. Solanga wi ben tan getrow na Gado, wi ben man tan abi a firi taki wi warti.” *

[Futuwortu]

[Prenki na tapu bladzijde 5]

Yesus ben sori den wan di a meki kon betre baka, taki den warti

[Prenki na tapu bladzijde 7]

Yehovah Kotoigi e sori trawan taki den warti, fu di den e fruteri den ’bun nyunsu fu wan moro bun sani’