Preikiwroko di gi prisiri trutru

„A son faya srefisrefi. A gersi leki a bergipasi no abi kaba. Baka di wi pasa furu sani di ben de na wi pasi, dan te fu kaba wi e doro na a presi pe wi e go: a moro farawe dorpu na ini a kontren. Te wi e naki na a fosi doro èn te na ososma e kari wi kon na inisei na wan switi fasi, dan wi e prisiri so te, taki wi e frigiti taki wi ben weri. Na a kaba fu a dei, wi prati ala den buku di wi ben tyari kon, aladi wi ben man bigin wan tu bijbelstudie srefi. Den sma fu a dorpu e angri fu leri sani. Wi musu gowe now, ma wi e pramisi den taki wi o drai kon baka.”

DISI na den sortu sani di wan spesrutu grupu fu pionier preikiman na ini Meksikow e ondrofeni furufuru. Den pionier dati abi wán sani nomo na prakseri, namku fu wroko fayafaya fu du san Yesus Krestes ben komanderi den disipel fu en: „Unu sa de kotoigi fu mi . . . te na a moro farawe presi fu grontapu” (Tori fu den Apostel 1:8). Na ini Meksikow sani ben seti fu hori spesrutu preikiwaka di den e kari pionier preikiwaka. Den preikiwaka disi e seti spesrutu fu wroko na ini kontren di no de fu nowan gemeente, san e meki taki a bun nyunsu fu a Kownukondre fu Gado no e preiki so furu na den presi dati. Furu tron disi na farawe presi pe yu no man doro so makriki. Den gemeente di de na den presi dati, èn di abi fu preiki na ini wan kontren di bigi srefisrefi, e kisi yepi tu.

Bifo a bijkantoro fu Yehovah Kotoigi na ini Meksikow e bosroiti pe fu a kondre den o hori wan pionier preikiwaka, dan den e ondrosuku finifini sortu yepi de fanowdu na ini a spesrutu kontren dati. * Te den kaba du disi, dan den e seni wan tu grupu fu spesrutu pionier fu go preiki na den difrenti presi. Den pionier musu pasa na tapu pasi di no grati. Dati meki den e kisi wagi di fiti fu rei na tapu den pasi dati. Furu tron den e gebroiki den wagi disi sosrefi leki wan maksin gi den publikâsi di den e tyari, èn efu a de fanowdu, dan den e sribi na ini den wagi tu.

Den de klariklari fu yepi

Sensi oktober 1996, dan tra preikiman fu a bun nyunsu kisi a kari sosrefi fu teki prati na a preikiwroko disi, pe den ben e wroko makandra nanga den spesrutu pionier. Na difrenti momenti, dan Kownukondre preikiman nanga gewoon pionier di de klariklari fu dini pe yepi de fanowdu, e horibaka gi den preikiwaka disi. Son preikiman e kisi a frantwortu fu go yepi wan fu den gemeente di de na den farawe presi dati, so taki den kan preiki na ini a kontren fu den gemeente dati, èn fu yepi den wan di wani fu kon sabi moro fu Bijbel. Furu yongu preikiman nanga pionier teki a kari disi èn den ondrofeni furu tumusi moi sani di gi den deki-ati.

Prakseri Abimael leki eksempre. A Kresten yonkuman disi ben abi wan bun wroko. A ben e wroko na wan presi pe sma e meki cellulair telefon. Toku a ben bosroiti fu go yepi nanga a preikiwroko na den farawe presi. Di den basi fu en ben kon yere taki a ben wani gowe libi a wroko, dan den pristeri en moro bigi frantwortu na ini a wrokope, nanga moro moni. Tra wrokoman na a wrokope ben e feni nomonomo taki a ben musu teki a wroko fu di den ben feni taki sma no e kisi den sortu okasi disi ala dei èn taki a ben o de wan don sani fu no teki en. Ma Abimael ben teki a fasti bosroiti fu horibaka gi a spesrutu preikiwaka, dri mun langa. Abimael ben nyan bun fu a spesrutu preikiwroko disi. Dati meki a ben bosroiti fu tan dini na ini wan gemeente na wan farawe presi pe preikiman ben tranga fanowdu. Now a e du wan wroko di e gi en nofo moni fu sorgu ensrefi èn a leri fa fu libi nanga den sani di a abi.

 Wan tra ondrofenitori na a di fu Julissa di ben musu teki waka nanga bus sowan 22 yuru langa fu kan doro na a kontren di a ben kisi fu go preiki. Na a lasti pisi fu a waka fu en a misi a lasti bus fu a dei. Ma dan a si wan wagi di ben e tyari wrokoman. Julissa teki deki-ati èn a aksi den sma efu a kan rei nanga den. A no de fu taki dati a no ben firi so switi fu di a ben de a wan-enkri umasma na mindri so furu man-nengre. Di a bigin preiki gi wan yonkuman na ini a wagi, dan a kon frustan taki a yonkuman na wan Kotoigi fu Yehovah! „Boiti dati”, na so Julissa e memre, „dan mi ben kon frustan tu taki a man di ben e rei a wagi ben de na owruman fu a gemeente pe mi ben musu go!”

Den owruwan e teki prati tu

Te yu luku en bun, dan a wroko disi no de gi yongusma wawan. Someni langa kaba wan owru sisa di nen Adela, ben wani gebroiki moro ten na ini a preikiwroko. A ben kisi na okasi fu du dati di a ben kisi a kari fu horibaka gi a spesrutu preikiwroko disi. A e fruteri: „Mi ben lobi a wroko so te, taki mi aksi den owruman na ini a gemeente efu mi no ben kan tan drape solanga leki a kan. Mi breiti srefisrefi fu di Yehovah kan gebroiki mi aladi mi kon owru kaba.”

Na so a ben de tu nanga wan uma fu 60 yari di nen Martha. A warderi di a ben abi gi Yehovah èn gi tra sma, ben pusu en fu gi ensrefi tu fu teki prati na a preikiwaka disi. A ben kon si taki a grupu fu en no ben man doro ala sma na ini a kontren pe den ben e wroko fu di den pasi ben langa srefisrefi èn fu di den pasi no ben bun. Dati meki a ben bai wan wagi di den pionier ben kan gebroiki. A fasi disi fa a sisa horibaka gi a wroko meki taki den ben man go na moro presi na ini a kontren dati èn a ben meki taki den ben man prati den tru tori fu Bijbel nanga moro furu sma.

A fasi fa den sma e arki e gi furu prisiri

A marki fu den wan di e teki prati na den spesrutu preikiwaka disi, na fu „meki disipel”. A moi srefisrefi fu si fa sani waka ini a tori disi. Sma na farawe presi pe trawan no e doro so makriki, ben kan yere den tru tori fu Bijbel di kan frulusu sma (Mateyus 28:19, 20). Furu bijbelstudie ben opo. Preikiman di e libi krosibei, noso tra preikiman di go tan na den presi dati, e hori den bijbelstudie disi. Na son presi den ben man seti grupu fu preikiman, aladi na tra presi den ben man seti pikin gemeente srefi.

Magdaleno nanga den kompe fu en ben teki bus fu doro na a kontren pe den ben musu go preiki. Di den ben de na pasi, dan den teki na okasi fu preiki gi a man di ben e rei a bus. „A man disi ben fruteri wi taki wan wiki na fesi wan tu Kotoigi ben kon na en oso, ma taki ensrefi no ben de. Di a ben doro na oso baka, dan en osofamiri fruteri en ala  san den ben yere. Wi taigi a man disi taki wi no e libi na ini a kontren fu en, ma taki wi komoto na difrenti pisi fu a kondre fu horibaka gi wan spesrutu preikiwaka èn taki wi alamala ben pai nanga wi eigi moni fu kon drape. A man disi ben fruwondru srefisrefi fu san a ben yere. Dati meki a taigi wi taki a ben o bigin studeri Bijbel makandra nanga en osofamiri, a srefi wiki dati. A ben horibaka gi a diniwroko fu wi sosrefi fu di a tyari wi go na a presi pe wi ben musu go, sondro fu aksi wi moni.”

Magdaleno ben fruwondru tu fu si fa den sma na ini a kontren fu den bergi na Chiapas ben de klariklari fu arki. „Mi wefi nanga mi ben kisi na okasi fu preiki a Kownukondre boskopu gi wan grupu fu 26 yongu sma fu a Presbyter Kerki. Dritenti miniti langa den alamala arki nanga ala den prakseri. Den ben teki den Bijbel fu den, èn wi ben kan taki finifini nanga den fu den sani di Yehovah abi na prakseri fu du. Furu sma na ini a kontren dati abi den eigi Bijbel na ini a Tzeltaltongo.” Wi ben man bigin wan tu bijbelstudie di e meki moi go na fesi.

Den no ben e gens den so furu moro

Pikinmoro leki tu yari sma no ben preiki a Kownukondre boskopu na ini wan fu den kontren fu Chiapas fu di wan tu sma drape ben e gens den preikiman. Teresa, di na wan furuten preikiman, ben kon si taki son Kotoigi ben e frede fu go preiki na ini a dorpu dati. „Ma den Kotoigi ben fruwondru fu si taki den sma drape ben de klariklari fu arki. Di wi kaba preiki, dan wan hebi alen kon. Na lon wi ben e lon suku wan presi fu kibri di wi doro na wan oso pe wi miti wan man di nen Sebastián. A man disi ben abi switifasi èn a ben meki wi kon na inisei fu kibri gi na alen. Di wi doro na ini na oso, dan mi aksi en efu Kotoigi ben kon na en kaba. Di a taki dati den no ben kon na en ete, dan mi bigin preiki gi en. Sosrefi mi ben gebroiki a buku Sabi di e tjari joe go na têgo libi * fu bigin wan bijbelstudie nanga en. Di wi kaba, dan nanga watra-ai Sebastián begi wi fu kon baka fu studeri nanga en.”

Wan tra grupu fu pionier di ben go preiki na Chiapas e taki: „Tangi fu Yehovah, meki wi ben abi bun bakapisi. A fosi wiki wi bigin 27 bijbelstudie; a di fu tu wiki, wi kari den sma fu kon luku wan fu den video fu wi di nen, The Bible​—Its Power in Your Life (Bijbel​—A krakti fu en na ini yu libi). Siksitenti sma ben kon fu luku a video. Den alamala ben lobi en. Di ala sani ben kaba, dan wi taigi den taki den kan seti wan grupu fu studeri Bijbel makandra. A ben fruwondru wi srefisrefi fu si taki tu grupu ben seti na ini a dorpu dati.

Baka di wi kaba wroko a heri kontren di wi ben kisi, dan wi drai go baka na a dorpu fu go tranga den wan di ben wani kon sabi moro èn fu si fa a ben e go nanga den grupu di ben e studeri makandra. Wi ben gi den wan kari fu kon na wan publiki  konmakandra nanga a Waktitoren-studie. Ma wi no ben man feni wan presi di ben bigi nofo fu hori den konmakandra dati. A man di ben gi primisi taki wan studie grupu ben kan kon makandra na ini na oso fu en, ben sori go na en baka dyari èn a ben taki: ’Wi kan hori den konmakandra na mi bakadyari.’”

A satra nanga sonde dati, den pionier di ben kon drape, makandra nanga den sma di ben wani kon sabi moro fu Bijbel, ben wroko fayafaya fu seti a dyari, so taki den ben kan gebroiki en fu hori den konmakandra. Na a fosi konmakandra dati 103 sma ben de. Now sowan 40 bijbelstudie e hori na ini a dorpu dati.

„A ben de wan kefalek moi ondrofeni”

Den wan di ben teki prati na a preikiwaka disi ben abi tumusi moi bakapisi na ini a preikiwroko. Ma boiti dati a preikiwroko fu den ben tyari wini kon gi den preikiman sosrefi. María na wan yongu pionier di ben teki prati na wan fu den preikiwaka disi. Luku san a e taki fu a fasi fa a e firi: „Tu sani ben de di ben e meki taki a ben de wan kefalek moi ondrofeni gi mi. Now mi e du a preikiwroko nanga moro prisiri, èn a banti fu mi nanga Yehovah kon moro tranga. Wan leisi wi ben e kren wan bergi. Wi ben weri. Baka di wi aksi Yehovah fu yepi wi, dan wi ondrofeni san Yesaya 40:29-31 e taki: ’Den wan di e howpu tapu Yehovah, sa kisi krakti baka.’ Sobun, wi doro pe wi ben musu go èn wi hori oso-bijbelstudie nanga den sma di sori switifasi gi wi.”

Claudia na wan tra yongu pionier di abi 17 yari. A e fruteri wi: „Mi kisi furu wini fu den preikiwaka disi. Mi leri fa fu du mi diniwroko moro bun, èn dati gi mi furu prisiri. Fu taki en leti, dan a sani disi ben yepi mi fu suku fu doro tra marki tu na ini a diniwroko. Boiti dati mi feni taki mi kon moro lepi na yeye fasi. Te mi ben de na oso, dan mi mama ben e du ala sani gi mi. Ma now di mi abi moro ondrofeni, mi leri fu tyari mi eigi frantwortu. Leki eksempre, fosi mi no ben wani nyan ala san mi ben e kisi. Ma now di mi ben abi fu fiti misrefi na difrenti situwâsi, dan mi no e kragi moro fu a nyanyan di mi e kisi. A fasi disi fa mi du a preikiwroko ben yepi mi fu kon feni tumusi bun mati. Ala san wi abi wi e prati nanga makandra èn wi e yepi makandra.”

Wan kotiwroko di e gi prisiri

San na den bakapisi fu a spesrutu muiti disi di ben du fu go na den kontren di de farawe? We, fu a ten di wi bigin nanga dati te go miti a yari 2002, dan sowan 28.300 pionier ben teki prati kaba na den pionier preikiwaka disi. Den ben hori sowan 140.000 bijbelstudie, aladi den ben e wroko sowan 2 milyun yuru na ini a preikiwroko. Den ben prati sowan 121.000 buku nanga sowan 730.000 tijdschrift, fu yepi sma fu kon sabi den tru tori fu Bijbel. A no de wan fruwondru sani taki son wan fu den pionier e hori 20 oso-bijbelstudie èn kande moro srefi.

Den sma di den pionier e fisiti, e warderi en srefisrefi taki den preikiman disi e du so furu muiti fu gi den a Bijbel boskopu. Aladi furu sma na ini den kontren dati na pôtisma, toku den wani nomonomo taki den preikiman musu teki den bijdrage di den e gi den. Wan pôti uma fu 70 yari lobi fu gi den pionier wan sani te den e kon na en oso. Efu den e weigri fu teki a sani di a ben gi den, dan a e bigin krei. Wan pôti osofamiri e taigi den furuten preikiman taki na umafowru fu den meki wan tu eksi spesrutu gi den preikiman, èn dan den e taigi den preikiman fu teki den eksi.

San moro prenspari srefi na taki den reti-ati sma dati e sori taki den abi bigi warderi gi sani fu Gado. Leki eksempre, wan yongu uma e waka dri yuru langa, en wawan, fu kan de na den Kresten konmakandra, èn a no e misi nowan fu den. Wan uma di kon owru kaba, ma di wani kon sabi moro fu Gado, abi problema nanga en kindi. Toku na uma disi ben waka tu yuru langa fu kon kisi Bijbel leri na ini a wiki di a kringopziener ben kon na den. Fu di son sma no ben man leisi noso skrifi, meki den ben wani leri leisi èn skrifi, so taki den ben kan kisi moro wini srefi fu den Bijbel leri di den ben e kisi. Den ben kisi bigi blesi fu den muiti di den ben du.

Na ini a buku Tori fu den Apostel, dan Lukas e taki fu wan fisyun di na apostel Paulus ben si: „Wan man fu Masedonia ben e tanapu èn a ben e begi en taki: ’Abra kon na ini Masedonia fu yepi wi.’” Paulus ben de klariklari fu gi yesi na a kari dati. Na ini a ten disi, a de so taki furu sma di e libi na den farawe presi fu Meksikow, e tyari densrefi na wan srefi sortu fasi fu di den pristeri densrefi fu preiki a bun nyunsu „te na a moro farawe presi fu grontapu”.​—Tori fu den Apostel 1:8; 16:9, 10.

[Futuwortu]

[Prenki na tapu bladzijde 9]

Furu Kotoigi na ini Meksikow teki prati na spesrutu preikiwaka