Yehovah En Krutudei De Krosibei!
Yehovah En Krutudei De Krosibei!
„A bigi dei fu Yehovah de krosibei. A de krosibei, èn a e hasti ensrefi fu tru.”—SEFANIA 1:14.
1. Sortu warskow Gado ben gi nanga yepi fu Sefania?
DYONSRO Yehovah Gado sa du wan sani fu puru den godelowsusma. Arki! Disi na a warskow di a e gi: „Mi sa tyari wan kaba kon na libisma . . . Mi sa koti a libisma famiri puru fu grontapu” (Sefania 1:3). A Soeverein Masra Yehovah ben taki den wortu disi nanga yepi fu en profeiti Sefania. Kande Sefania ben de wan fara granpikin fu a getrow Kownu Hiskia. A warskow dati di ben meki bekènti na ini a ten fu Kownu Yosia, e sori taki takru sani ben o pasa nanga den godelowsuwan di ben libi na ini a kondre Yuda.
2. Fu san ede den sani di Yosia ben du, no ben man hori Yehovah fu tyari en krutudei kon?
2 A taki di Sefania ben taki den profeititori, sondro tweifri ben meki a yongu Kownu Yosia si moro krin taki a ben de fanowdu fu puru a falsi anbegi di ben doti Yuda. Ma den sani di a kownu ben du fu puru falsi anbegi na ini a kondre, no ben puru ala godelowsufasi na mindri a pipel. Den sani dati no ben meki Gado gi den pardon fu den sondu fu en granpapa, Kownu Manase, di „ben furu Yerusalem nanga a brudu fu sma di no du notinoti” (2 Kownu 24:3, 4; 2 Kroniki 34:3). Fu dati ede Yehovah en krutudei ben o kon seiker.
3. Fa wi kan de seiker taki wi man pasa „a dei fu Yehovah en atibron” libilibi?
3 Toku, wan tu sma ben o tan na libi tapu a frede dei dati. Fu dati ede, a profeiti fu Gado ben gi tranga: „Bifo a reglementi e tyari wan sani kon na krin, bifo a dei pasa gowe neleki buba [fu karu], bifo a faya atibron fu Yehovah e kon na un tapu, bifo a dei fu Yehovah en atibron e kon na un tapu, suku Yehovah, ala un safri-atisma fu grontapu, di du den krutu bosroiti fu En. Suku regtfardikifasi, suku safri-atifasi. Kande unu sa kisi kibri tapu a dei fu Yehovah en atibron” (Sefania 2:2, 3). Ala di wi e hori na prakseri a howpu fu kisi frulusu tapu Yehovah en krutudei, dan meki wi go luku a Bijbel buku Sefania. A buku disi skrifi na Yuda bifo 648 b.G.T. A de wan pisi fu a „profeiti wortu” fu Gado èn wi musu poti prakseri na dati nanga wi heri ati.—2 Petrus 1:19.
Yehovah Langa En Anu Go
4, 5. Fa Sefania 1:1-3 ben kon tru gi den godelowsuwan na ini Yuda?
4 „A wortu fu Yehovah” di ben kon na Sefania e bigin nanga a warskow di ben skrifi kaba na a bigin fu na artikel. Gado e meki bekènti: „’Sondro misi mi sa tyari ala sani di de na tapu a gron kon wan kaba’, na so Yehovah taki. ’Mi sa tyari wan kaba kon na libisma nanga meti. Mi sa tyari wan kaba kon na a mekisani di e frei na loktu nanga den fisi fu se, nanga den sani di e meki sma naki futu fadon makandra nanga den godelowsuwan; èn mi sa koti a libisma famiri puru fu gron.”—Sefania 1:1-3.
5 Iya, Yehovah ben o tyari na ogridu di ben lai srefisrefi, kon na wan kaba na ini a kondre Yuda. Ma suma Gado ben o gebroiki fu „tyari ala sani di de na tapu a gron kon na wan kaba”? Soleki fa a sori, dan Sefania ben du en profeitiwroko na a bigin fu a tiri fu Kownu Yosia, di ben bigin na ini 659 b.G.T. So bun, den profeiti wortu di Sefania ben taki ben kon tru di Babilon ben pori Yuda nanga en mamafoto Yerusalem na ini 607 b.G.T. Na a ten dati, den godelowsuwan na ini Yuda ben ’tyari kon na wan kaba’.
6-8. San Sefania 1:4-6 ben taki na fesi, èn fa a profeititori dati kon tru na ini Yuda fu owruten?
6 Sefania 1:4-6 e taki na fesi san Gado sa du nanga falsi anbegiman: „Mi sa langa mi anu go teige Yuda èn teige ala den sma di e libi na Yerusalem, èn fu a presi disi mi sa koti puru den wan fu Bâ-al di tan abra, a nen fu den priester fu den gado fu tra kondre makandra nanga den priester, èn den wan di boigi densrefi na tapu den daki gi a legre fu hemel, èn den wan di e boigi densrefi, ala di den e sweri na Yehovah èn e sweri na Malkam; èn den wan di e hari densrefi puru fu di den no wani waka baka Yehovah moro èn den wan di no suku Yehovah èn no go suku rai na en.”
7 Yehovah ben langa en anu go teige den sma fu Yuda nanga Yerusalem. A ben abi a fasti bosroiti fu pori den anbegiman fu Bâ-al, a gado fu Kanan di den ben anbegi fu kisi ipi-ipi meti èn fu koti bun furu gron-nyanyan. Den ben abi difrenti gado di den ben kari Bâ-al, fu di den anbegiman fu den ben denki taki ibriwan fu den gado dati ben basi èn ben abi krakti na tapu spesrutu presi. Fu eksempre, den Moabsma nanga den Midiansma ben abi wan Bâ-al di den ben anbegi na tapu a Peorbergi (Numeri 25:1, 3, 6). Na ala presi na ini Yuda, Yehovah ben o koti den priester fu Bâ-al puru. So srefi a ben o koti den Leifi priester puru di no ben de getrow èn di ben broko a wet fu Gado fu di den ben abi demakandra nanga den priester fu Bâ-al.—Exodus 20:2, 3.
8 Gado ben o koti puru tu, den wan di ben „boigi gi a legre fu hemel” fu di, soleki fa a sori, den ben du astrologia èn ben anbegi a son (2 Kownu 23:11; Yeremia 19:13; 32:29). Na atibron fu Gado ben o kon tu tapu den wan di ben pruberi fu moksi a tru anbegi nanga falsi bribi, fu di den ’ben sweri na Yehovah èn ben sweri na Malkam’. Malkam kande na wan tra nen gi Molèk, a moro prenspari gado fu den Amonsma. Te den ben anbegi Molèk, dan den ben òfer pikin-nengre tu.—1 Kownu 11:5; Yeremia 32:35.
Krestenhèit Sa Kon na En Kaba Heri Esi!
9. (a) Sortu fowtu sani Krestenhèit du? (b) Tra fasi leki den wan fu Yuda di no ben de getrow, san musu de wi fasti bosroiti?
9 Ala den sani disi ben kan memre wi na a fasi fa Krestenhèit de. Krestenhèit lai nanga falsi anbegi èn nanga astrologia. So srefi Krestenhèit òfer milyunmilyun libisma libi na tapu na altari fu feti èn den kerki tiriman horibaka gi den feti dati. Trutru wan tegu sani! Meki wi noiti no tron leki den sma fu Yuda di no ben de getrow. Den ’ben hari densrefi puru fu di den no ben wani waka baka Yehovah moro’. Den ben kisi wan mi-no-ke-fasi èn den no ben suku Yehovah moro, noso a tiri fu en. Na presi fu dati, meki wi hori wi soifri retifasi na Gado.
10. Fa yu ben sa fruklari san den profeiti wortu na Sefania 1:7 wani taki?
10 Den wortu di a profeiti e taki now, e fiti den ogriman fu Yuda, ma so srefi den godelowsuwan na ini a ten disi. Sefania 1:7 e taki: „Tan tiri na fesi a Soeverein Masra Yehovah; bika a dei fu Yehovah de krosibei, bika Yehovah sreka wan srakti-ofrandi; a santa den wan di a gi wan kari.” A sori taki den wan disi „di a gi wan kari” ben de den Kaldeasma di ben de feanti fu Yuda. A „srakti-ofrandi” ben de Yuda srefi, makandra nanga a mamafoto fu en. So bun, Sefania ben meki a prakseri fu Gado bekènti fu pori Yerusalem, èn a profeititori disi ben sori go tu na a pori di Krestenhèit sa kisi pori. Fu taki en leti, fu di Gado en krutudei de so krosibei, meki ala sma fu grontapu musu „tan tiri na fesi a Soeverein Masra Yehovah” èn musu arki san a e taki nanga yepi fu a „pikin ipi” fu Yesus en salfu bakaman èn den kompe fu den, den „tra skapu” fu Yesus (Lukas 12:32; Yohanes 10:16). Ala den sma di no wani arki èn na so fasi e seti densrefi teige a tiri fu Gado Kownukondre, sa kisi pori.—Psalm 2:1, 2.
Heri Esi—Wan Dei fu Babari!
11. San Sefania 1:8-11 wani taki trutru?
11 Sefania 1:8-11 e taki moro fara fu Yehovah en dei: „’Èn a musu pasa tapu a dei fu Yehovah en srakti-ofrandi taki mi sa poti prakseri na den prins, èn na den manpikin fu den kownu, èn na ala den wan di e weri krosi fu tra kondre. Èn mi sa poti prakseri na ala sma di e kren go na tapu a podium tapu a dei dati, den wan di e furu na oso fu den masra fu den nanga ogri di e du nanga tranga èn nanga bedrigifasi. Èn a musu pasa tapu a dei dati’, na so Yehovah taki, ’dati wan babari e kon fu a Fisi Portu, èn wán babari fu a di fu tu pisi fu a foto, nanga wan tranga babari fu den pikin bergi. Bari krei, un sma di e libi na Maktes, bika den tapu den mofo fu ala sma di de bisnisman; ala den sma di e wegi solfru, den koti puru.’”
12. Fa a du kon taki wi e si son sma „e weri krosi fu tra kondre”?
12 Yoahas, Yoyakim, nanga Yoyakin ben o tron kownu baka Kownu Yosia. Baka dati, Sedekia ben o tiri a kondre èn na a ten dati, Yerusalem ben o kisi pori. Ala di a rampu dati ben o miti den, toku a sori taki son sma ben suku fu meki den birtikondre feni den bun fu di den ben „weri krosi fu [den] kondre” disi. Na so a de tu na ini a ten disi. Furu sma e sori krin na difrenti fasi taki den no de wan pisi fu Yehovah en organisâsi. Soleki fa a de krin fu si taki den de wan pisi fu Satan en organisâsi, na so den sa kisi den strafu tu.
13. Soleki fa a profeititori fu Sefania ben taki, dan san ben o pasa te den Babilonsma ben go feti nanga Yerusalem?
13 „A dei dati” di Yuda ben musu gi frantwortu, e kruderi nanga a dei te Yehovah sa tyari krutu kon na tapu den feanti fu en, te a sa tyari wan kaba kon na ogridu, èn sa sori taki En na a moro heiwan. Di den Babilonsma ben go feti nanga Yerusalem, dan wan babari ben komoto na a Fisi Portu. Kande den ben kari en a Fisi Portu fu di a ben de krosibei fu a wowoyo pe den ben seri fisi (Nehemia 13:16). Den legre fu Babilon ben sa go na ini a presi di den ben kari a di fu tu portu, èn a kan taki a „tranga babari fu den pikin bergi” ben de a babari fu den Kaldeasma di ben kon krosibei. Den sma di ben tan na Maktes, kande wan presi na tapusei fu a Tyropeon Lagipresi, ben o meki „wán babari”. Fu san ede den sma ben o meki so wan babari? Fu di den no ben o man seri sani drape moro, èn den wan di „e wegi solfru” no ben o man du dati tu.
14. O seryusu Yehovah sa ondrosuku den sma di e taki dati den e anbegi En?
14 O seryusu Yehovah sa ondrosuku den sma di e taki dati den e anbegi En? A profeititori e taki moro fara: „Èn a musu pasa na a ten dati taki mi sa ondrosuku Yerusalem finifini nanga lampu, èn mi sa poti prakseri na den man di e kon deki na tapu a sakasaka fu den èn di e taki na ini den ati: ’Yehovah no sa du bun èn a no sa du ogri.’ Èn a gudu fu den musu kon tron wan sani di sma sa fufuru èn den oso fu den, wan leigi presi di no bun fu sma libi na ini. Èn den sa bow oso, ma den no sa libi na ini; èn den sa prani droifidyari, ma den no sa dringi a win fu den.”—Sefania 1:12, 13.
15. (a) San ben o pasa nanga den priester fu Yerusalem di ben fadon komoto na bribi? (b) San o pasa nanga den sma na ini a ten disi di abi falsi bribi?
15 Den priester fu Yerusalem di fadon komoto na bribi ben moksi na anbegi fu Yehovah nanga falsi bribi. Ala di den ben denki taki no wan ogri no ben man miti den, toku Yehovah ben o suku den. A ben o du dati neleki wan man di e waka nanga lampu di e skèin krin go na ala presi, fu feni den na ini a dungru na yeye fasi pe den ben go kibri densrefi. No wán fu den ben o man lowe gi a krutu di Gado ben o krutu èn strafu den. Den sma dati di ben fadon komoto na bribi èn ben denki taki noti no ben kan pasa nanga den, ben kon deki neleki den sakasaka di de fu si ondrosei na ini wan winbari. Den no ben wani hati den ede nanga no wan sortu warskow taki Gado ben o tyari kenki kon na ini libisma afersi, ma den no ben o man lowe gi a krutu di Gado ben o tyari kon na den tapu. Den sma na ini a ten disi di no sa man lowe tu, na den sma di abi falsi bribi, den sma na ini Krestenhèit nanga den sma di fadon komoto na a anbegi fu Yehovah. Fu di den no wani bribi taki disi na „den lasti dei”, meki den e taki na ini den ati: „Yehovah no sa du bun, èn a no sa du ogri.” Fa den e meki wan bigi fowtu srefisrefi!—2 Timoteus 3:1-5; 2 Petrus 3:3, 4, 10.
16. San ben o pasa te Gado ben o tyari krutu kon na tapu Yuda, èn san wi musu du fu di wi sabi disi?
16 Den sma na Yuda di fadon komoto na bribi, ben kisi a warskow taki den Babilonsma ben o fufuru den gudu fu den, taki den ben o leigi den oso fu den, èn ben o teki a froktu fu den droifidyari fu den. Materia gudu no ben sa abi waarde te Gado ben sa tyari krutu kon na tapu Yuda. A srefi sani o pasa te Yehovah en krutudei sa kon na tapu a disiten seti fu sani. Fu dati ede, meki wi abi wan bun fasi fu si sani na yeye fasi. Meki wi so srefi ’tyari gudu kon na wan na hemel’ fu di wi e poti a diniwroko fu Yehovah na a fosi presi na ini wi libi!—Mateus 6:19-21, 33.
„A Bigi Dei fu Yehovah De Krosibei”
17. O krosibei Yehovah en bigi krutudei de soleki fa Sefania 1:14-16 e sori?
17 O krosibei Yehovah en bigi krutudei de? Soleki fa Sefania 1:14-16 e sori, dan Gado e gi wi a dyaranti disi: „A bigi dei fu Yehovah de krosibei. A de krosibei, èn a e hasti ensrefi fu tru. A babari fu a dei fu Yehovah bita. Drape wan tranga man e meki wán babari. A dei dati na wan dei fu atibron, wan dei fu banawtu nanga bigi frede, wan dei fu bigi winti nanga pori, wan dei fu dungru nanga blaka dungru, wan dei fu wolku nanga bigi dungru, wan dei fu a babari fu tutu nanga a warskow fu sma, teige den tranga foto èn teige den hei toren di de na tapu den uku fu den skotu fu a foto.”
18. Fu san ede wi no musu denki taki Yehovah en krutudei fara ete?
18 Den godelowsu priester, den prins, nanga a pipel fu Yuda ben kisi a warskow taki ’a bigi dei fu Yehovah ben de krosibei’. Gi Yuda ’a dei fu Yehovah ben e hasti ensrefi fu tru’. Na so a de tu na ini a ten disi. No meki no wan sma denki taki a dei fara ete taki Yehovah sa tyari krutu kon na tapu den godelowsusma. Na presi fu dati, neleki fa Gado ben handri gaw na Yuda, na so a sa „hasti” a dei fu en fu tyari krutu kon (Openbaring 16:14, 16). Dati sa de wan bita ten gi ala sma di no wani arki den warskow di Yehovah e gi nanga yepi fu den Kotoigi fu en! A sa de wan bita ten trutru gi den wan di no wani teki a soifri anbegi!
19, 20. (a) San na wan tu sani di Gado ben du di a ben kanti en atibron na tapu Yuda nanga Yerusalem? (b) Sortu aksi e opo kon, fu di Gado sa pori soso den wan fu a seti fu sani disi di musu kisi pori?
19 Di Gado ben kanti en atibron na tapu Yuda nanga Yerusalem, dan dati ben de „wan dei fu banawtu nanga bigi frede”. Den Babilonsma di ben kon fu feti nanga den sma fu Yuda, ben meki den sma fu Yuda pina na furu fasi; den sma fu Yuda ben pina tu, fu di den ben sabi taki dede nanga pori ben wakti den. A ’dei dati fu bigi winti nanga pori’ ben de wan dei fu dungru, fu wolku èn fu bigi dungru; kande den sani disi no ben pasa na wan agersi fasi wawan, ma a kan taki a situwâsi ben de so trutru bika na ala sei, smoko, dede meti nanga dedeskin ben de. A ben de „wan dei fu [a babari fu] tutu nanga a warskow fu sma”, ma den warskow disi di ben de fu yere, ben de fu soso.
20 Den waktiman fu Yerusalem no ben man du notinoti di nanga bigi pisi udu, den feanti ben broko „den hei toren di de na tapu den uku” fu den skotu fu a foto. Den tranga sani di a disiten godelowsu seti fu sani abi, no sa man yepi den tu te Gado sa gebroiki den fetisani di a abi na hemel. Gado de srekasreka fu gebroiki den fetisani fu en dyonsro fu pori soso den wan di musu kisi pori. Yu e howpu fu kisi kibri? Yu teki a fasti bosroiti kaba fu tan na a sei fu Yehovah ’di e kibri ala den wan di lobi en, ma di sa kiri ala den godelowsuwan?’—Psalm 145:20.
21, 22. Fa Sefania 1:17, 18 sa kon tru na ini a ten fu wi?
21 A dei di Sefania 1:17, 18 ben taki fu en na fesi, na wan kefalek ogri krutudei fu tru! Mi sa tyari banawtu kon na tapu libisma”, na so Yehovah Gado taki, „èn trutru den sa waka lontu leki breniman; bika den sondu teige Yehovah. Èn a brudu fu den sa trowe trutru leki doti, èn a bere fu den leki kunkun. Èn no a solfru fu den, no a gowtu fu den sa man frulusu den tapu a dei fu na atibron fu Yehovah; ma a faya di a abi fu du sani fayafaya, sa nyan heri grontapu, bika a sa pori ala den sma di e libi na grontapu, iya, na wan ogri fasi.”
22 Neleki fa Yehovah ben du na ini a ten fu Sefania, na so a sa tyari banawtu kon heri esi na tapu „ala den sma di e libi na grontapu”, den wan di no wani gi yesi na a warskow fu en. Fu di den e sondu na Gado, dati meki den sa waka lontu leki breniman di no man yepi densrefi èn den no sa man feni frulusu. Tapu Yehovah en krutudei, a brudu fu den „sa trowe trutru leki doti”, leki wan sani di no warti notinoti. Fu tru, a kaba fu den godelowsuwan no sa moi srefisrefi, bika Gado sa panya den skin — srefi den inibere — fu den godelowsuwan disi na tapu a gron, „leki kunkun”.
23. Sortu howpu a profeititori fu Sefania e gi, ala di ogri sma no sa man lowe tapu „a dei fu na atibron fu Yehovah”?
23 No wán sma man kibri den wan di e feti nanga Yehovah èn nanga en pipel. A solfru nanga a gowtu fu den ogrisma fu Yuda no ben man frulusu den; na a srefi fasi furu gudu nanga tyuku no sa man kibri sma noso no man yepi den fu lowe tapu „a dei fu na atibron fu Yehovah” di sa kon na tapu Krestenhèit èn a tra pisi fu a seti fu sani disi. Tapu a dei dati fu kaba sani, a faya di Gado abi fu du sani fayafaya sa „nyan heri grontapu” te a sa kiri den godelowsusma. Fu di wi e bribi na ini a profeiti wortu fu Gado, meki wi e bribi trutru taki wi de fara now na ini „a ten fu a kaba” (Danièl 12:4). Yehovah en krutudei de krosibei, èn a sa teki refensi tapu den feanti fu en heri esi. Ma a profeititori fu Sefania e sori taki howpu de fu kisi frulusu. So bun, san wi musu du fu feni kibri tapu a dei fu Yehovah en atibron?
San Yu Ben Sa Piki?
• Fa a profeititori fu Sefania ben kon tru gi Yuda nanga Yerusalem?
• San o pasa nanga Krestenhèit èn nanga ala den godelowsusma na ini a ten disi?
• Fu san ede wi no musu denki taki Yehovah en krutudei de fara ete?
[Aksi fu a tori disi]
[Prenki na tapu bladzijde 13]
Nanga deki-ati, Sefania ben meki bekènti taki Yehovah en krutudei ben de krosibei
[Sma di abi a reti fu a prenki]
Fu a Self-Pronouncing Edition of the Holy Bible, di abi a King James vertaling nanga den Revised vertaling na ini
[Prenki na tapu bladzijde 15]
A dei fu Yehovah ben kon na tapu Yuda nanga Yerusalem nanga yepi fu Babilon na ini 607 b.G.T.
[Prenki na tapu bladzijde 16]
Yu e howpu fu kisi kibri te Yehovah sa pori den godelowsusma?