A brifi fu Yakobus 2:1-26
2 Mi brada, fa unu kan taki dati unu e bribi na ini wi Masra Yesus Krestes di kisi glori, dan unu e gi a wan sma moro grani leki a trawan?
2 Kow taki dati tu sma e kon na wan konmakandra fu unu. Wan fu den weri gowtu linga nanga moi krosi. A trawan na wan pôtiman di weri doti krosi.
3 A de so taki unu e gi moro grani na a wan di weri a bun krosi èn unu e taigi en: „Kon sdon na a moi presi disi”? Dan unu e taigi a pôtiwan: „Tan tnapu drape”, noso „Go sdon drape sei mi futubangi”?
4 Efu na dati unu e du, dan gi unu a wan sma prenspari moro a trawan èn unu tron krutuman di no e koti krutu na wan reti fasi.
5 Arki, mi lobi brada. Gado teki den sma di grontapu e si leki pôtisma. A e si den leki sma di gudu fu di den abi wan tranga bribi èn a o gi den a Kownukondre di a pramisi den sma di lobi en.
6 Ma tòg unu e wiswasi den pôtisma. Suma na den sma di e pina unu èn di e srepi unu go na fesi krutu? A no den gudusma?
7 A no den e pori a bun nen di unu abi?
8 Gado Buku taki: „Yu musu lobi tra sma leki fa yu lobi yusrefi.” Efu unu e du san a moro hei wet* disi e taki, dan unu e du bun.
9 Ma efu unu e tan gi a wan sma moro grani leki a trawan, dan unu e sondu èn a wet e krutu unu leki sma di trangayesi a wet.
10 Bika awinsi wan sma e hori ensrefi na a heri Wet, ma a misi fu du wán sani di skrifi na ini, dan tòg a e tron wan sma di e trangayesi a heri Wet.
11 Bika a srefi sma di taki: „Un no musu waka gi un trowpatna”, e taki tu: „Un no musu kiri sma.” We, efu yu no e waka gi yu trowpatna, ma yu e kiri sma, dan tòg yu tron wan sma di e trangayesi a Wet.
12 Unu na wan fri pipel èn a wet fu wan fri pipel o krutu unu. Dati meki un musu taki èn tyari unsrefi leki wan pipel di fri.
13 Efu wan sma no abi sar’ati gi trawan, dan Gado no o abi sar’ati gi a sma dati tu te a o krutu en. Sar’ati e wini krutu.
14 Mi brada, sortu wini a abi efu wan sma e taki dati a abi bribi, ma dati no de fu si na den sani di a e du? Efu a abi so wan bribi, dan a no o kisi ferlusu tòg?
15 Kow taki dati wan brada noso wan sisa no abi nofo krosi* èn a no abi nofo n’nyan gi a dei.
16 Efu wan fu unu e taigi en: „Tan bun. Sorgu taki yu abi nofo krosi fu hori yu skin waran èn nyan yu bere furu”, ma unu no e gi en san a abi fanowdu fu tan na libi, dan sortu bun unu e du?
17 Na so a de tu nanga bribi. Efu wan sma e taki dati a abi bribi, ma dati no de fu si na den sani di a e du, dan a bribi fu a sma dati dede.
18 Ma kande wan sma o taki: „Yu e bribi, ma mi e du. Sori mi a bribi fu yu sondro fu du wan sani, dan mi o sori yu a bribi fu mi nanga den sani di mi e du.”
19 Yu e bribi taki wán Gado de tòg? Dati bun. Ma den ogri yeye srefi e bribi dati tu èn den e frede en.
20 Yu don man yu, fa yu no man ferstan taki a bribi fu wan sma na noti efu dati no de fu si na den sani di a e du?
21 A no fu di wi afo Abraham du wan sani, meki Gado taki dati a de wan ret’ati sma? Iya, na di a tyari en manpkin Isak leki ofrandi na tapu na altari, meki Gado taki dati a de wan ret’ati sma.
22 Dus a de krin taki a no ben abi bribi nomo, ma a bribi fu en ben de fu si tu na den sani di a ben du. Na den sani di a ben e du ben sori taki a ben abi trutru bribi.*
23 Dati meki Gado Buku taki: „Abraham ben bribi na ini Yehovah.* Dati meki Gado si en leki wan ret’ati sma” èn den ben kari en „Yehovah* mati”.
24 Yu si, a no bribi w’wan e meki taki Gado e si wan sma leki wan ret’ati sma, ma na te a bribi fu en de fu si na den sani di a e du.
25 Na so a ben de tu nanga a huru-uma Rakab. A ben teki den boskopuman na ini en oso èn a ben meki den waka wan tra pasi di den ben o gwe. Na den sani di a du meki taki Gado si en leki wan ret’ati sma.
26 Neleki fa a skin dede te wan sma no e bro moro, na so a bribi fu wi dede tu efu dati no de fu si na den sani di wi e du.
