Krutuman 4:1-24
4 Baka di Ehud dede, den Israelsma bigin du sani baka, di Yehovah no feni bun.
2 Fu dati ede Yehovah gi den abra na Kownu Yabin fu Kanan. A kownu disi ben e tiri na ini Hasor. Na edeman fu a legre fu en ben de Sisera di ben e tan na Haroset-Hagoyim.
3 Ne den Israelsma bari kari Yehovah, fu di Sisera ben abi neigi hondro fetiwagi di ben abi isri nefi na den wiel. A ben du ogri-ati sani tu nanga den Israelsma tutenti yari langa.
4 Na a ten dati na umaprofeiti Debora, a wefi fu Lapidot, ben de krutuman na ini Israel.
5 A tanpe fu na uma disi ben de na ondro a Debora-palmbon. A bon disi ben de na mindri Rama nanga Betel na Efrayim-bergikontren. Den Israelsma ben abi a gwenti fu go na Debora fu meki a taigi den fa Gado e prakseri fu wan tori.
6 Wan dei Debora seni kari Barak, a manpikin fu Abinowam. Na a ten dati Barak ben de na Keides-Naftali. Di Barak kon, Debora taigi en: „Yehovah, a Gado fu Israel, ben taigi yu: ’Go na Tabor-bergi makandra nanga tin dusun sma fu a lo fu Naftali nanga Seibulon èn panya unsrefi na ala sei fu a bergi.
7 Dan mi o meki Sisera, a legre-edeman fu Yabin, kon na yu na a lagipresi pe Kison-liba e lon. Sisera o kon drape makandra nanga en legre èn nanga den fetiwagi fu en. Dan mi o meki yu wini en.’”
8 Ne Barak taigi Debora: „Mi o go, efu yu go nanga mi. Ma efu yu no go nanga mi, dan mi no o go tu.”
9 Dati meki Debora taki: „No frede. Mi o go nanga yu. Ma disi leisi a no yu o kisi a grani. Yehovah o gi wan uma na okasi fu wini Sisera.” Ne Debora opo, dan a go nanga Barak na Keides.
10 Sobun, Barak kari a lo fu Seibulon nanga Naftali fu kon makandra na Keides. Dan tin dusun man hari go feti makandra nanga Barak èn Debora go tu nanga en.
11 Now a ben de so, taki Heiber, a Keniet man, gowe libi den tra Kenietsma di ben de bakapikin fu Hobab, a papa fu Moses wefi. Ne Heiber seti en tenti krosibei fu a bigi bon na Sananim na ini Keides.
12 Now sma go fruteri Sisera taki Barak, a manpikin fu Abinowam, hari go na Tabor-bergi.
13 Wantewante Sisera tyari ala den fetiwagi fu en kon na wán. Ala nanga ala, dati ben de neigi hondro fetiwagi di ben abi isri nefi na den wiel. A meki ala den srudati fu en komoto fu Haroset-Hagoyim, dan den go na a lagipresi pe Kison-liba e lon.
14 Now Debora taigi Barak: „Opo, bika disi na a dei di Yehovah o meki yu wini Sisera. A no Yehovah srefi hari go na yu fesi?” Ne Barak saka komoto fu Tabor-bergi, makandra nanga tin dusun man di ben e waka na en baka.
15 Dan Yehovah bruya Sisera, nanga ala den srudati di ben e rèi den fetiwagi fu en èn a bruya a heri legre fu en tu, so taki Barak ben kan feti nanga den. Te fu kaba Sisera saka komoto fu en fetiwagi, dan a lon gowe.
16 Ne Barak hari go na baka den fetiwagi èn na baka den srudati te na Haroset-Hagoyim. Na so fasi a kiri a heri legre fu Sisera nanga feti-owru. Nowan fu den srudati tan na libi.
17 Ma Sisera lowe go na a tenti fu Yael, a wefi fu Heiber, a Keniet man, fu di Kownu Yabin fu Hasor ben de wan mati fu na osofamiri fu Heiber, a Keniet man.
18 Ne Yael kon na dorosei fu miti Sisera, dan a taigi en: „Kon dyaso, mi masra. Kon na inisei. No frede.” Dati meki Sisera go na ini a tenti fu Yael. Bakaten Yael tapu Sisera skin nanga wan bedikrosi.
19 Baka wan pisi ten Sisera taigi Yael: „Mi e begi yu, gi mi pikinso watra fu dringi, bika watra e kiri mi.” Fu dati ede Yael teki wan lerisaka* nanga merki na ini, a opo a saka èn a meki Sisera dringi pikinso fu a merki. Dan a tapu Sisera skin baka nanga a bedikrosi.
20 Ne Sisera taigi Yael: „Go tanapu na a mofo fu a tenti. Te wan sma e kon aksi yu: ’Wan man de dyaso na ini yu tenti?’ Dan yu musu piki en: ’Nôno!’”
21 Ne Yael, a wefi fu Heiber, teki wan pen fu a tenti èn a grabu wan amra. Dan a waka safrisafri go na Sisera di ben e sribi dipi, fu di a ben weri. Yael naki a pen go na ini a sei-ede fu Sisera. A naki a pen so tranga, taki a beri go na ini a gron. Na so Sisera dede.
22 Disiten Barak ben e lon na baka Sisera. Di Yael si Barak e kon, dan a go na dorosei fu miti en. Yael taigi en: „Kon nanga mi, dan mi o sori yu a man di yu e suku.” Dati meki Barak go nanga Yael na ini en tenti. Ne a si taki Sisera dede èn taki wan pen fu a tenti ben fasi na ini en sei-ede.
23 Sobun, a dei dati Gado meki den Israelsma wini Kownu Yabin fu Kanan.
24 Ibri tron baka den Israelsma ben e go feti nanga Kownu Yabin fu Kanan. Den feti nanga en, teleki den wini en. Na so den kiri Kownu Yabin fu Kanan.
Futuwortu
^ Disi na wan saka fu metibuba pe sma ben gwenti poti watra na ini.
