Gi den Hebrewsma 7:1-28
7 A Melkiseidek disi ben de kownu fu Salem èn priester fu a Moro Hei Gado. Baka di Abraham ben feti nanga den kownu èn a kiri den, dan Melkiseidek miti nanga Abraham èn a blesi en.
2 Abraham ben gi en a di fu tin pisi* fu ala sani. Na a fosi presi, a nen Melkiseidek wani taki „Kownu di e du san reti”. Ma en na kownu fu Salem tu, san wani taki „Kownu fu Freide”.
3 Sma no sabi suma na en p’pa nanga m’ma, noso suma na den afo fu en èn den no sabi tu o ten a gebore noso o ten a dede, ma fu di a kon de leki a Manpkin fu Gado, meki a e tan wan priester fu ala ten.
4 Unu e si o bigi a man disi ben de. Na en a famiri-edeman Abraham ben gi a di fu tin pisi fu den moro bun sani di a teki fu den feanti fu en.
5 A tru taki a Wet e sori taki te a pipel e tyari a di fu tin pisi fu den gudu fu den kon, dan den Leifisma di e wroko leki priester musu teki den gudu dati. Sobun, den e teki den gudu fu den brada fu den, awinsi den na bakapkin fu Abraham.
6 Ma Abraham gi a di fu tin pisi fu den gudu fu en na a man disi di no ben de wan bakapkin fu Leifi. Tòg a man teki den gudu èn a blesi a sma di kisi den pramisi fu Gado.
7 We, a no de fu taki dati na a moro bigiwan e blesi a moro pkinwan.
8 Den Leifisma na den wan di e kisi a di fu tin pisi èn den na libisma di man dede. Ma fu a tra man di kisi a di fu tin pisi, Gado Buku e taki dati a de na libi.
9 Yu kan taki dati srefi Leifi di e kisi a di fu tin pisi, pai a di fu tin pisi tu di Abraham ben du dati.
10 Bika na a ten di Melkiseidek miti Abraham, dan Leifi no ben gebore ete* leki wan bakapkin fu Abraham.
11 We efu na a priesterwroko fu den Leifisma ben kan meki sma kon de sondro sondu (bika a wroko disi ben de wan prenspari sani na ini a Wet di Gado gi a pipel), dan fu san ede a ben o de fanowdu ete taki wan tra priester ben musu kon di no ben o de leki Aron, ma leki Melkiseidek?
12 Fu di a priesterwroko e kenki, meki a de fanowdu fu kenki a Wet tu.
13 Bika a man fu suma den e taki den sani disi, ben de fu wan tra lo èn nowan sma fu a lo dati ben e wroko na a altari.
14 Ja, a de krin taki wi Masra kmoto fu a lo fu Yuda. Ma tòg Moses no ben taki noti di e sori taki sma fu a lo dati ben o tron priester.
15 Wi kan ferstan ala den sani disi moro krin, fu di wi abi wan tra priester di de leki Melkiseidek.
16 Soleki fa a Wet e taki, dan soso wan bakapkin fu wan priester ben kan tron priester. Ma disi no de so nanga a man disi. A tron priester fu di Gado gi en krakti di meki taki a abi libi di no man pori.
17 Bika Gado Buku e taki fu en: „Yu na wan priester fu têgo, neleki Melkiseidek.”
18 Sobun, Gado poti na owru Wet na wan sei, fu di a Wet dati swaki èn a no man du san de fanowdu.
19 A Wet no ben man puru sondu. Ma Gado tyari wan moro bun sani kon di e gi wi howpu trutru èn di no e mankeri noti. Na a sani dati e meki wi kon moro krosbei na Gado.
20 Na wan sweri Gado ben meki fu poti Yesus leki priester.
21 (Bika a tru taki man de di tron priester sondro taki wan sweri meki. Ma a man disi tron priester fu di Gado meki wan sweri. A ben taki fu a man disi: „Yehovah* meki wan sweri èn a no o kenki en prakseri. A taki: ’Yu na wan priester fu têgo’”).
22 Na so Yesus tron a dyaranti fu wan moro bun ferbontu.
23 Boiti dati, fu di den priester ben e dede meki den no ben man tan du a wroko fu den. Dati meki trawan ben abi fu teki den presi.
24 Ma fu di a man disi e tan libi fu têgo, meki a kan tan wroko leki priester sondro taki wan tra sma teki en presi.
25 Dati meki a man ferlusu den sma di e begi Gado na ini a nen fu en. A man ferlusu den fu di a e tan na libi fu ala ten fu taki gi den.
26 A fiti taki wi abi so wan granpriester di tai hori na Gado, di no du ogri, di no ben doti ensrefi, di no de leki den sondari èn di hei moro leki den hemel.
27 A de tra fasi leki den granpriester di ben musu tyari ofrandi ibri dei. Den ben musu du dati gi den eigi sondu fosi èn baka dati gi den sondu fu a pipel. Ma en no ben abi fu du dati, bika di a gi ensrefi leki ofrandi, a ben du disi wán leisi nomo fu ala ten.
28 Bika a Wet e poti sma leki granpriester di abi swakifasi. Ma a sweri di ben meki baka a Wet, e poti wan Manpkin leki granpriester di fiti fu du a wroko disi fu ala ten.
