Gi den Efeisesma 1:1-23
1 Mi, Paulus, tron wan apostel fu Krestes Yesus fu di Gado wani. Mi e skrifi a brifi disi gi den santawan na Efeise di e du a wani fu Gado ala ten èn di de wán nanga Krestes Yesus:
2 Meki Gado, wi P’pa, nanga Masra Yesus Krestes sori unu bun-ati èn meki a freide fu den de nanga unu.
3 Prèise a Gado èn a P’pa fu wi Masra Yesus Krestes, bika a gi wi ala sortu blesi na hemel nanga yepi fu en santa yeye, fu di wi de wán nanga Krestes.
4 A kari wi fu de wán nanga Krestes sensi a ten di grontapu seti. Dati meki wi musu sori lobi, wi musu de santa èn wi musu de sondro fowtu na fesi Gado.
5 Bika Gado ben besroiti na fesi fu teki wi leki en eigi manpkin nanga yepi fu Yesus Krestes, fu di na dati a wani èn dati e gi en prisiri.
6 Na so sma ben o prèise Gado fu di a sori wi furu bun-ati nanga yepi fu en lobi Manpkin.
7 Wi kon fri nanga yepi fu Yesus fu di a lusu-paiman pai nanga a brudu fu en. Na so wi e kisi pardon fu wi sondu, bika Gado e sori wi furu bun-ati.
8 A sori wi a bun-ati disi èn a gi wi ala koni nanga ferstan.
9 A meki wi kon sabi san na a santa kibritori di abi fu du nanga a wani fu en. Fu di a feni en bun èn fu di a e gi en prisiri meki a besroiti fu
10 seti sani na a kba fu a ten di a poti. Na so ala sani o kon makandra na ondro Krestes. Dati na den sani di de na ini hemel nanga den sani di de na grontapu. Ja, na ondro en ala sani o kon makandra.
11 Wi de wán nanga en èn wi o kisi wan gudu makandra nanga en, fu di Gado besroiti disi na fesi kba èn fu di a e du ala sani soleki fa a wani.
12 Na so wi, den foswan di ben howpu tapu Krestes, o meki taki Gado kisi prèise nanga glori.
13 Ma unu srefi ben howpu na en tapu, baka di unu yere a tru boskopu. Dati na a bun nyunsu taki unu o kisi ferlusu. Baka di unu bigin bribi, dan Gado poti a santa yeye leki wan stampu na un tapu nanga yepi fu Krestes soleki fa a ben pramisi.
14 A santa yeye disi na wan dyaranti* taki wi o kisi wan gudu. Na so a pipel fu Gado o kon fri nanga yepi fu wan lusu-paiman. Disi o meki taki Gado kisi prèise nanga glori.
15 Mi yere taki unu e bribi na ini Masra Yesus èn taki unu e sori lobi gi ala den santawan. Dati meki mi srefi
16 e tan taki Gado tangi gi unu. Ala ten mi e begi gi unu,
17 taki a Gado fu wi Masra Yesus Krestes, a P’pa di abi ala glori, kan gi unu koni èn a kan meki unu ferstan den sani di a tyari kon na krin. Na so unu o kon sabi en bun.
18 Gado opo un ati, so taki unu kan si sortu howpu a gi unu èn sortu moi gudu a sreka gi den santawan.
19 Unu o si tu fa a bigi krakti fu en e wroko na ini a libi fu wi di e bribi. A bigi krakti fu en ben de fu si
20 di a gi Krestes libi baka èn di a poti en sdon na en ret’anusei na ini hemel.
21 A poti Krestes moro hei leki ala tirimakti, ala den wan di abi makti, ala tiriman, nanga ala kownu, èn a gi en wan nen di bigi moro ala tra nen. A no na ini a ten* disi w’wan, ma owktu na ini a ten di o kon.
22 A poti ala sani na en ondro tu èn a meki a tron edeman fu ala sani di abi fu du nanga a gemeente
23 di de en skin. A gemeente disi abi ala den fasi fu en èn Krestes e meki taki ala sani de leki fa den musu de.
