A di fu tu brifi gi den Tesalonikasma 3:1-18
3 Te fu kba, brada nanga sisa, tan begi gi wi taki a wortu fu Yehovah* kan panya es’esi èn taki sma kan teki en nanga lespeki, neleki fa unu ben teki en nanga lespeki.
2 Iya, begi taki Gado kan ferlusu wi fu den takr’ati sma èn fu den ogrisma, bika a no ala sma abi bribi.
3 Ma Masra e du ala ten san a pramisi. A o gi unu dek’ati èn a o kibri unu gi Didibri.*
4 Boiti dati, wi leki bakaman fu Masra sabi taki unu e du san wi e taigi unu èn taki unu o tan du dati.
5 Meki Masra yepi unu fu lobi Gado èn fu tan waka baka Krestes.
6 Brada nanga sisa, wi e taigi unu na ini a nen fu Masra Yesus Krestes, taki efu wan brada no e tyari ensrefi na wan fasi di fiti èn a no e du san wi ben leri unu, dan un no musu bemui nanga en moro.
7 Iya, unu sabi fa unu musu teki na eksempre fu wi, bika di wi ben de nanga unu, wi ben tyari wisrefi na wan fasi di fiti.
8 Boiti dati, wi no ben e nyan a n’nyan fu nowan sma fu soso.* Ma wi ben e wroko tranga dei nanga neti, fu di wi no ben wani de wan hebi gi unu. Wi no ben wani taki wan fu unu gebroiki en moni fu sorgu wi.
9 A no taki wi no abi a reti fu kisi den sani disi, ma wi ben wani de wan eksempre gi unu.
10 Di wi ben de nanga unu, wi ben gwenti fu taigi unu a sani disi: „Efu wan sma no wani wroko, dan a no musu nyan tu.”
11 Ma wi yere taki son sma na un mindri no e tyari densrefi na wan fasi di fiti. Den no e wroko srefi, ma den e bemui na ini tra sma tori.
12 Na ini a nen fu Masra Yesus Krestes wi e taigi den sortu sma disi, iya, wi e gi den a rai fu du den eigi wroko sondro fu bemui na ini tra sma tori èn fu nyan a n’nyan di densrefi wroko fu en.
13 Brada nanga sisa, no kon weri fu du bun.
14 Ma efu wan sma no e du san wi taki na ini a brifi disi, dan un musu luku bun nanga en. No bemui nanga en moro, so taki a kan firi syen.
15 Tòg un no musu si en leki wan feanti, ma tan gi en rai leki wan brada.
16 Meki a Gado fu freide srefi gi unu freide ala ten na ala fasi. Meki Masra de nanga un alamala.
17 Mi, Paulus, e seni taki unu odi. Mi srefi skrifi unu, soleki fa unu kan si na ini ala den brifi fu mi. Disi na a fasi fa mi e skrifi.
18 Meki wi Masra Yesus Krestes sori un alamala bun-ati.
