A di fu tu brifi gi den Korentesma 13:1-14
13 Disi na a di fu dri leisi di mi wani kon na unu. „Wan sani tru te tu noso dri kotoigi taki dati a tru.”
2 Mi no de drape now, ma tòg un musu si den sani di mi skrifi unu leki na kon mi kon na unu a di fu tu leisi. Ete wan leisi mi e warskow den sma di ben du sondu èn ala den tra sma, bika efu mi kon baka na unu, mi no o abi sar’ati nanga den.
3 Na so mi o bewijs unu taki mi taki na ini a nen fu Krestes. Den sani di Krestes e du e sori taki a no swaki. Ma a e sori a krakti fu en te a de na un mindri.
4 Iya, a tru taki den ben spikri en na wan postu di a ben swaki. Ma a krakti fu Gado meki taki a de na libi. A tru taki wi swaki tu neleki fa en ben swaki, ma a krakti fu Gado o meki taki wi o libi makandra nanga en.
5 Tan ondrosuku efu unu de na bribi. Tan bewijs sortu sma unu de. Na sabi unu no sabi taki Yesus Krestes de wán nanga unu? Disi no o de so efu Gado no feni unu bun.
6 Ma Gado feni wi bun. Mi howpu taki unu sabi dati.
7 Now wi e begi Gado taki unu no o du nowan ogri. Wi no e du disi fu di wi wani meki a gersi leki wi na sma di Gado feni bun. Ma wi e du disi fu di wi wani taki unu du san bun, awinsi a gersi leki wi na sma di Gado no feni bun.
8 Bika wi no man du noti fu tapu a tru leri. A wan-enkri sani di wi kan du na fu horbaka gi en.
9 Wi e prisiri trutru te unu tranga, awinsi wi swaki èn wi e begi taki unu o kenki un denki.
10 Fu dati ede mi e skrifi den sani disi now di mi no de nanga unu. Bika te mi kon mi no wani pir’ai gi unu, aladi Masra gi mi a makti dati. Mi no wani strafu unu, ma mi wani gi unu dek’ati.
11 Brada nanga sisa, a lasti sani di mi wani taigi unu na disi: Tan de nanga prisiri, tan kenki un denki, tan meki sma trowstu unu, tan abi wán denki èn tan libi bun nanga makandra, dan a Gado fu lobi èn fu freide o de nanga unu.
12 Gi makandra odi nanga wan bosi.*
13 Ala den santawan e seni odi gi unu.
14 Meki a de so taki Masra Yesus Krestes sori unu bun-ati, taki Gado sori unu lobi èn taki a santa yeye kon na tapu un alamala.
Futuwortu
^ Grikitongo: „santa bosi”. Kresten ben abi a gwenti fu gi makandra wan bosi te den ben miti.
