A fosi buku fu Samuel 28:1-25
28 Na a ten dati den Filisteasma meki ala den man fu den difrenti srudatikampu kon makandra fu go feti nanga Israel. Dati meki Akes taigi David: „Yu sabi taki yu nanga den man fu yu musu go feti makandra nanga mi.”
2 David piki Akes: „Dan yu sabi san mi o du.” Ne Akes taigi David: „We, dan mi e poti yu na wroko fu sorgu taki nowan sani no pasa nanga mi.”
3 Na a ten dati Samuel ben dede kaba. Ala den sma na ini Israel ben e row gi en èn den beri en na ini en eigi foto Rama. Disiten, Saul ben puru ala den bonuman nanga lukuman na ini a kondre.
4 Ne den Filisteasma kon makandra, dan den seti kampu na Sunem. Ne Saul tyari ala den srudati fu Israel kon na wán, dan den seti kampu na Gilbowa.
5 Di Saul si a legre fu den Filisteasma, a kon frede èn a bigin beifi srefisrefi.
6 Ibri tron baka Saul ben e aksi Yehovah san a musu du, ma noiti Yehovah ben e piki en. A no ben e piki en nanga dren, noso nanga na Urim èn a no ben e meki den profeiti taigi Saul san a musu du.
7 Te fu kaba Saul taigi den futuboi fu en: „Un suku wan uma gi mi di e du lukuman-wroko, dan mi o go na en fu aksi en rai.” Den futuboi fu en taigi en: „We, wan uma e libi na En-Dor. A de wan lukuman.”
8 Sobun, Saul weri krosi na so wan fasi taki sma no ben o man sabi taki na en èn a meki tu man go nanga en. Den doro na a uma na netiyuru. Ne Saul taigi en: „Mi e begi yu, koti luku gi mi. Mi wani aksi yu fu kari wan sma gi mi. Mi o taigi yu suma yu musu kari.”
9 Ma na uma taigi Saul: „Yusrefi sabi san Saul du. Yu sabi taki a puru ala bonuman nanga lukuman na ini a kondre. Dan fu san ede yu e suku fu kori mi? Yu wani sma kiri mi?”
10 Wantewante Saul sweri gi en na fesi Yehovah. A taki: „Mi e sweri na Yehovah, a libi Gado, taki yu no o kisi strafu fu a sani disi!”
11 Ne na uma aksi en: „Suma mi musu kari gi yu?” Saul piki en: „Na Samuel yu musu kari gi mi.”
12 Di na uma si „Samuel”,* a bari bun tranga, dan a taigi Saul: „Yusrefi na Saul. Dan fu san ede yu kori mi?”
13 Ma Kownu taigi na uma: „No frede. San yu si?” Na uma taigi Saul: „Mi si wan gado e opo komoto na ini a gron.”
14 Wantewante Saul aksi na uma: „Fa a tan?” Na uma piki en: „Na wan owru man mi e si e opo kon. A weri wan dyakti sondro mow.” Fu di Saul ben prakseri taki na „Samuel”, meki a boigi nanga en fesi go na gron.
15 Ne „Samuel” bigin taki nanga Saul. A aksi: „San meki yu kon muilek mi? Fu san ede yu meki mi opo kon?” Dan Saul taki: „Mi de na bigi nowtu. Den Filisteasma kon feti nanga mi èn Gado gowe libi mi. A no e taki nanga mi moro. A no e meki den profeiti taigi mi san fu du èn a no e piki mi nanga dren. Dati meki mi kari yu fu fruteri mi san mi musu du.”
16 Ne „Samuel” taki: „Efu Yehovah gowe libi yu èn efu en srefi kon tron yu feanti, dan fu san ede yu kon aksi mi san yu musu du?
17 Yehovah o du ala den sani di a ben meki mi taigi yu. Yehovah o puru a kownukondre na yu anu èn a o gi en na yu kondreman David.
18 Yu no du san Yehovah taki. Di Yehovah ati bron nanga Amalèk, dan yu no kiri Amalèk soleki fa a ben taki. Dati meki a o du den sani disi nanga yu tide.
19 Boiti dati, Yehovah o meki den Filisteasma wini yu nanga Israel. Tamara yu nanga den manpikin fu yu o de pe mi de now. Yehovah o meki den Filisteasma wini a heri legre fu Israel srefi.”
20 Di Saul yere san „Samuel” taki, dan a kon frede srefisrefi èn a fadon langalanga na gron. A no ben abi krakti moro na ini en skin, fu di a no ben nyan heri dei nanga heri neti.
21 Ne na uma waka go na Saul. Di a si taki Saul bruya srefisrefi, a taigi en: „Luku, mi masra, mi du san yu taki. Mi ben kan lasi mi libi, ma toku mi du san yu taigi mi.
22 Sobun, du san mi o taigi yu. Meki mi gi yu wan pisi brede fu nyan, so taki te yu o gowe yu kan abi krakti baka.”
23 Ma Saul no ben wani nyan. A taki: „Mi no o nyan.” Toku den futuboi fu en nanga na uma tan begi en fu nyan. Te fu kaba a du san den taki. A opo komoto na gron, dan a go sidon na tapu wan langa bangi.
24 Na uma ben abi wan fatu yongu kaw na ini na oso. Sobun, a srakti* a kaw esi-esi. Dan a teki blon, a masi en èn a meki brede sondro srudeki.
25 Ne a gi Saul nanga den futuboi fu en, meki den nyan. Baka dati den opo, dan den gowe a srefi neti dati.
