Sowan feifi milyard sma o luku a WK voetbal di o bigin tapu 20 november te go miti 18 december 2022. Furu sma denki taki den sortu sport disi kan du moro leki fu gi sma a firi taki den abi wánfasi te den e luku sport.

•   „Sport abi a krakti fu kenki a grontapu. A abi krakti tapu sma. A abi a krakti fu meki wánfasi de na mindri sma na wan spesrutu fasi.”​—Nelson Mandela, di ben de wan president fu Zuid-Afrika.

•   „Voetbal e meki sma abi a srefi howpu, a e meki den alamala abi prisiri, a e meki den abi a srefi firi, den alamala abi lobi awinsi fa den e difrenti fu makandra.”​—Gianni Infantino, presidenti fu FIFA a

 A WK noso iniwan tra sport man du den bigi sani disi? Fa wi kan abi freide nanga wánfasi?

 A WK disi no ben abi fu du nanga voetbal wawan. A meki sma bigin haritaki nanga makandra fu sociaal nanga politiek afersi di abi fu du nanga den reti fu libisma, a bita-ati di sma abi gi tra ras èn a difrenti na mindri pôtisma nanga gudusma.

 Toku sma lobi luku sport soleki a WK. Ma den sport disi no man tyari wánfasi kon di e tan fu ala ten aladi libisma wani dati. Na presi fu dati den e tyari pratifasi kon èn den e sori na sortu ogri fasi sma e tyari densrefi. Bijbel e taki dati disi ben o de wan fu den marki fu „den lasti dei”.​—2 Timoteyus 3:1-5.

 Bijbel e gi wi a howpu taki trutru wánfasi o de na heri grontapu. A e pramisi taki ala sma na heri o libi o abi wánfasi ondro a tiri fu wan hemel regering di nen „Gado Kownukondre”.​—Lukas 4:43; Mateyus 6:10.

 A Kownu fu a Kownukondre dati, Yesus Krestes, o tyari freide kon na heri grontapu. Bijbel e taki:

•   „Te en e tiri, den reti-ati sma o de leki grun grasi di e opo kon. Freide o de pasa marki.”​—Psalm 72:7.

•   „A o frulusu den pôti sma di e bari suku yepi . . . A o kibri den libi, so taki sma no man kwinsi den moro noso du ogri-ati sani nanga den.”​—Psalm 72:12, 14.

 Nownow kaba den leri fu Yesus meki taki milyunmilyun sma na ini 239 kondre abi trutru wánfasi. Den leri fu no abi bita-ati gi tra sma. Fu kon sabi moro, leisi na artikel di nen „Wi man stop bita-ati.”