Bijbel e taki dati Gado ’no wani fu libisma du hurudu’ (1 Tesalonikasma 4:3). Soleki fa Bijbel e gebroiki a wortu „hurudu”, dan dati na te wan man noso wan frow e du sutadu, te sma e libi wan homolibi, noso te wan man nanga wan uma abi seks sondro fu trow.

•  Fu san ede Gado feni en prenspari taki wan man nanga wan uma musu trow na presi fu libi nanga makandra?

•  Fa a de efu wan man nanga wan uma e libi nanga makandra fosi den trow soso fu kon sabi efu den o man tan nanga makandra?

•  Fa tu sma di trow kan abi wan bun trowlibi?

•   Na Gado seti a trowlibi. Gado ben seti a trowlibi di a ben tyari den tu fosi libisma kon na makandra (Genesis 2:22-24). A no ben abi na prakseri taki wan man nanga wan uma ben o libi nanga makandra sondro fu trow.

•   Gado sabi san moro bun gi libisma. A seti a trowlibi so taki wan man nanga wan uma kan de na ini wánfasi, èn dati ben o kibri den èn tyari wini gi ala sma na ini na osofamiri. Luku wan eksempre. Neleki fa wan bedrijf di e meki sturu nanga tafra, e gi sma wan buku pe den kan leisi soifri fa den musu gebroiki den sturu nanga tafra, na so Gado e taigi wi na ini Bijbel fa wi kan abi wan koloku osofamiri libi. Ala ten den sani di Gado taki e tyari wini kon gi sma di e teki den rai disi.​—Yesaya 48:17, 18.

•   Te wan sma waka gi en trowpatna, dan dati kan abi takru bakapisi. Fu di dati kan meki taki wan sma kon de nanga bere sondro taki a ben wani dati, a kan kisi wan takru siki fu di a ben abi seks nanga wan sma di no de en trowpatna, èn a kan hati a firi fu en trowpatna srefisrefi.

•   Gado meki man nanga uma so taki den kan meki pikin te den abi seks. Gado e si a libi leki wan santa sani. Dati meki Gado gi man nanga uma a warti kado fu kan kisi pikin. Gado wani taki wi abi lespeki gi a kado dati. Wi kan du dati te wi e hori wisrefi na den seti fu a trowlibi.​—Hebrewsma 13:4.

 Efu tu sma wani abi wan bun trowlibi, dan a no de fanowdu taki den e libi nanga makandra fosi den pramisi densrefi taki den no o gwe libi makandra. Na presi fu dati, wan man nanga wan uma o libi moro bun nanga makandra te ala tu e tai hori na makandra, èn te den e meki muiti fu lusu den problema di den e kisi na ini den trowlibi. a Te tu sma trow, dan den tu sma kan tai hori moro bun na makandra.​—Mateyus 19:6.

 Trowlibi sondro problema no de. Ma toku, te wan man nanga wan uma trow, dan den kan abi wan bun trowlibi efu den e fiti den rai fu Bijbel. Luku wan tu eksempre:

•   Broko yu ede na san yu patna abi fanowdu, na presi fu prakseri nomo san yu wani.​—1 Korentesma 7:3-5; Filipisma 2:3, 4.

•   Kweki lobi nanga lespeki gi makandra.​—Efeisesma 5:25, 33.

•   Denki bun fosi yu taki wan sani.​—Odo 12:18.

•   Abi pasensi èn de gaw fu gi makandra pardon.​—Kolosesma 3:13, 14.