Mataupu 27

E Faapefea Ona Maua le Fesoasoani e Ala i le Tatalo

1. O le ā le fesoasoani tatou te manaomia mai le Atua, ma pe faapefea ona tatou mauaina?

INA IA SAOLOTO i faatosinaga leaga a le lalolagi, ua manomia faapitoa e Kerisiano le fesoasoani e maua mai i le tatalo. Sa fetalai Iesu: “[O le a] foaiina mai e lo outou Tamā o i le lagi le Agaga Paia i e o atu ai ia te ia.” (Luka 11:13) Tatou te manaomia le agaga paia o le Atua, po o le mana galue, e pei o se suesue i lana Afioga ma faatasitasi ma lana faalapotopotoga. A e ao ona tatalo ia maua le agaga paia.

2. (a) O le ā le tatalo? (e) O ā ituaiga eseese o tatalo? (i) Ai se ā e tāua ai le tatalo?

² O le tatalo o le tautala ma le ava i le Atua. E mafai ona avea ma talosaga, e pei o le fesili i le Atua mo ni mea. O le tatalo e mafai foi ona avea ma faafetai po o viiga i le Atua. (1 Nofoaiga a Tupu 29:10, 13) Ina ia maua se faiā lelei ma lo tatou Tamā faalelagi, e ao ona tatou talanoa e le aunoa i a te ia i le tatalo. (Roma 12:12; Efeso 6:18) E maua lona mana galue pe a talosaga atu i ai, e fesoasoani i a i tatou ia faia lona finagalo e ui i faafitauli po o tofotofoga e aumaia e Satani po o lana lalolagi.—1 Korinito 10:13; Efeso 3:20.

3. (a) O le ā le malosi e mafai ona tatou maua mai le Atua? (e) Na o le ā le ala e mafai ai ona tatou tausia se faiā lelei ma le Atua?

³ Atonu o e faia moni se taua ia lafoai ni amioga e le fiafia i ai le Atua. Afai o lea, ia e saili le fesoasoani a Ieova. Tatalo ia te ia. Sa faia e le aposetolo o Paulo, ma sa ia tusi: “Ou te mafaia mea uma i le malosi mai i le na te faamalosia au.” (Filipi 4:13, NW; Salamo 55:22; 12:1, 2) Sa fai mai se fafine na sola i ala o amioga lē mamā: “Ua na o Ia lava e i ai le mana e mafai ona fesoasoani i a te oe ia e sao mai i lea tulaga. E ao ona ia a te oe lea faiā totino ma Ieova, ma e na o le tatalo e tausia ai lea faiā totino.”

4. Sa faapefea e se tamaloa ona maua le malosi ina ia saoloto mai ai i lana masani o le ulaula?

 ⁴ Atonu e fai mai se tasi: ‘Ua ou tatalo soo i le Atua, ae ua ou lē tuua lava le faia o mea leaga.’ O upu ia o ē ulaula. Ina ua fesiligia se tagata: “O le ā le taimi e te tatalo ai?” sa tali mai: “I le afiafi ae ou te lei moe, i le taeao pe a ou ala mai, ma pe a uma loʻu vaivai ma ula se tapaa, ou te fai atu i ai Ieova ua ou faanoanoa i le mea ua ou faia.” Sa fai atu lana uo: “O le taimi e te manomia moni ai le fesoasoani a le Atua o le taimi e te tago ai i se utufaga, pe e lē moni ea? O le taimi lea e ao ona e tatalo loa i a Ieova ia faamalosia oe.” Ina ua ia faia, sa ia maua le fesoasoani e tuu ai le ulaula.

5. (a) O le ā e manaomia ina ia auauna ai ma le tonu i le Atua? (e) O le ā ua aliali mai ai e masani ona aafia i ni puapuaga pe a tuu esea galuega o le agasala?

⁵ E le faapea o le tatalo i le Atua, faatasi ma le suesueina o lana Afioga ma faatasi i lana faalapotopotoga vaaia, o le a faigofie ai mo oe ona faia lea mea tonu. O loo manaomia pea se taumafaiga; ioe, o se taua fitā, atonu e aofia ai ni puapuaga. (1 Korinito 9:27) O masaniga leaga e iu i se tuinanau matautia mo le mea ua leaga. O lea, e masani ona oo mai puapuaga pe a tuua e se tagata galuega o le agasala. Pe o e naunau e puapuagatia ina ia mafai ona fai le mea ua tonu?—1 Peteru 2:20, 21.

TATALO E FAAFOFOGAINA E LE ATUA

6. (a) Ai se ā ua mauaina ai e le toatele le faigata ona tatalo? (e) O le ā tatou te manaomia ina ia mafai ona faafofogaina a tatou tatalo?

⁶ Ua faigata ona tatalo le toatele. Fai mai se fafine talavou: “Ua i a te au se faafitauli, o le tatalo atu i se tasi ou te lē o vaaia.” Ona e lei vaai se tasi i le Atua, e manaomia le faatuatua ina ia tatalo ma faafofogaina e le Atua. E ao ona tatou talitonu e soifua moni Ieova ma na te faia le mea tatou te ole atu ai. (Eperu 11:6) Afai tatou te faatuatua, faapea ma faalatalata i le Atua ma se loto faamaoni, e mautinoa o le a ia fesoasoani mai. (Mareko 9:23) Ma, e ui ina sa lei avea Konelio le taʻitaʻi au Roma i lea taimi ma vaega o le faalapotopotoga a le Atua, a e ina ua ia tatalo ma le faamoani mo le taʻitaʻiga a le Atua, sa talia lana tatalo.—Galuega 10:30-33.

7. (a) O ā ituaiga o tatalo e fiafia i ai le Atua? (e) O ā ituaiga o tatalo o le a le faafofoga i ai le Atua?

⁷ O isi ua faigata ona tautala atu i ni a latou lava upu. Ae ua  le ao ona taofia ai i le tatalo atu i le Atua. Tatou te mautinoa e silafia e ia o tatou manaoga ma o le a malamalama o ia pe a taʻu atu. (Mataio 6:8) Mafaufau: O ā tala e sili ona e talia mai i se tama itiiti—o lona faigofie, faafetai ma le faamaoni po o upu faapitoa na taʻu atu e se tasi i a te ia na te faia? E faapea foi lo tatou Tamā faalelagi ona talisapaia faamatalaga faigofie le manaomia ni upu faapitoa po o se gagana faaletapuaiga. E le faafofoga foi o ia i ē o tatalo i gagana e le masani ai po o upu maualuluga ia ofo ai isi, po o le taʻua ma le toe taʻua o le mea lava e tasi a e lē mai le loto.—Mataio 6:5, 7.

8. (a) O le ā ua faaalia ai e mafai e le Atua ona faafofoga i tatalo e faia lē leoa? (e) Pe ua faaalia mai ea e le Tusi Paia e tatau ona tatou tatalo i soo se tulaga faapitoa po o se nofoaga?

⁸ E oo foi pe a e tatalo lē leoa, e mafai ona faafofoga le Atua. Ina ua faia e Neemia, sa gaoioi le Atua e tusa ma lana talosaga faamaoni, ma sa faapena foi i a Hana. (Neemia 2:4-8; 1 Samuelu 1:11-13, 19, 20) E lē tāua foi le tulaga o loo faia ai e le tagata le  le tatalo. E mafai ona e tatalo i soo se tulaga, ma i soo se taimi i soo se nofoaga. E ui i lea, ua faaalia e le Tusi Paia ua talafeagai se tulaga o le loto maulalo, e pei o le ifo po o le tootuli. (1 Tupu 8:54; Neemia 8:6; Tanielu 6:10; Mareko 11:25; Ioane 11:41) Na faaalia e Iesu e lelei pe a faia le tatalo totino a le tagata i se nofoaga paninoa.—Mataio 6:6.

9. (a) I a te ai e ao ona taulai i ai a tatou tatalo uma, ma ai se ā? (e) Mo a tatou tatalo ina ia talia e le Atua, o le suafa o ai e tatau ona ala atu ai?

⁹ O le tatalo o se vaega o la tatou tapuaiga. E ao lava la ona tuu atu a tatou tatalo na o i Lē na Faia i tatou, o Ieova le Atua. (Mataio 4:10) Ma ua faaalia e le Tusi Paia e ao i Kerisiano ona ole atu i le Atua e ala i a Iesu, o lē na foai mai lona ola ia aveesea a tatou agasala. E ao la ona ala atu a tatou tatalo i le suafa o Iesu.—Ioane 14:6, 14; 16:23; Efeso 5:20; 1 Ioane 2:1, 2.

10. (a) O tatalo a ai e le fiafia i ai le Atua? (e) O le ā le manaoga autu e tatau ona tatou ausia pe afai ia faafofogaina a tatou tatalo e le Atua?

¹⁰ Peitai, pe e fiafia Ieova i tatalo uma? Ua fai mai le Tusi Paia: “O le ua liliu ese ona taliga a e le faalogo i le tulafono, e inosia lana lava tatalo.” (Faataoto 28:9; 15:29; Isaia 1:15) Afai la tatou te faia lona finagalo, ma tausi ma ana poloaiga. Neʻi teʻi ua le faafofoga mai le Atua, e pei lava ona le fia faalogo se tagata amiotonu i se polokalama mai i se reitio e manatu i ai e lē mamā. Fai mai le Tusi Paia: “O mea uma foi tatou te ole atu ai, e maua mai ia te ia, auā ua tatou tausi i ana poloaiga, tatou te faia foi mea e lelei i ona luma.”—1 Ioane 3:22.

11. Po o le ā le uiga o le galue ia talafeagai ma mea ua tatou tatalo ai?

¹¹ E ao ai la ona tatou galulue i mea ua tatou tatalo i ai. E pei o lenei, ua sese mo se tasi e ole i le Atua mo le fesoasoani ia taofia le ula tapaa po o le mariuana, ae alu pea e faatau mai. E lē mafai foi ona ia ole i a Ieova ia fesoasoani ia alofia amioga lē mamā ae faitau pea i lomiga ma matamata i tifaga ma televise i ata lē mamā. Afai foi o le pelē tupe o se vaivaiga o se tasi, e le mafai ona tatalo i le Atua e fesoasoani i a te ia ia tuu ae e alu pea i malae tutuu ma nofoaga o faia ai petipetiga. Ina ia faafofogaina a tatou tatalo e le Atua, e ao ona faaali atu i a tatou gaoioiga e matuā uigā moni a tatou upu.

12. (a) O ā mea e mafai ona aofia i a tatou tatalo? (e) Ina ia fiafia le Atua i a tatou tatalo, o le ā e ao ona tatou aʻoaʻoina?

 ¹² O ā mea totino e mafai ona taʻua i a tatou tatalo i a Ieova? Soo se mea o le a faia ai lo tatou faiā ma le Atua ua o se mataupu tonu mo le tatalo, e aofia ai le maloloina i la le tino, ma le tausia foi o fanau. (2 Tupu 20:1-3; Faamasino 13:8) Sa tusi le aposetolo o Ioane: “Pe afai tatou te ole atu ai se mea e tusa ma lona finagalo, e faafofoga mai o ia ia te i tatou.” (1 Ioane 5:14) O le mea tāua la, ia tusa a tatou talosaga ma le finagalo o le Atua. O lona uiga, e ao ona tatou aʻoaʻoina muamua po o le ā lona finagalo. (Faataoto 3:5, 6) Ma o lea afai tatou te pupū i le finagalo o le Atua ma lana fuafuaga pe a tatou tatalo, na i lo i o tatou lava lelei totino, o le a mafai la ona talia a tatou tatalo e Ieova. Ua tonu ona tatou faafetai i a Ieova i aso uma mo mea lelei ua ia saunia.—Ioane 6:11, 23; Galuega 14:16, 17.

13. (a) Sa faapefea ona faaalia e Iesu po ā mea e ao ona faamuamua i a tatou tatalo? (e) O ā mea e lona lua lona tāua e tatau ona tatou tatalo i ai?

¹³ Sa tuu e Iesu i ona soo se tatalo faaaʻoaʻo e talia e le Atua. (Mataio 6:9-13) Ua faamuamua i lea tatalo le suafa o le Atua, lona malo ma le faia o lona finagalo i le lalolagi. Ona sosoo lea ma le talosagaina o o tatou manaoga totino, e pei o mea e ʻai e tatau mo le aso, le faamagaloina o agasala, ma le faasaoina mai i tofotofoga ma mai lē o leaga, o Satani le Tiapolo.

 TATALO INA IA FESOASOANI I ISI

14. E faapefea ona faaalia e le Tusi Paia le tāua o le tatalo mo isi?

¹⁴ Sa faaalia e Iesu i lana faaaʻoaʻoga le tāua o le tatalo mo isi. (Luka 22:32; 23:34; Ioane 17:20) Sa iloa e le aposetolo o Paulo le tāua o lea ituaiga o tatalo ma e masani ona ole atu i isi ia tatalo mo ia. (1 Tesalonia 5:25; 2 Tesalonia 3:1; Roma 15:30) A o i le fale puipui sa ia tusi: ‘O loo oʻu faamoemoe e ala i a outou tatalo o le a faasaolotoina ai aʻu.’ (Filemoni 22; Efeso 6:18-20) E lei umi ae faasaoloto Paulo mai le fale puipui ma ua faaalia mai ai le aoga o tatalo na faia mo ia.

15. O le ā le ituaiga o talosaga e mafai ona tatou faia mo tagata o ē tatou te alolofa i ai?

¹⁵ Sa tatalo fesoasoani Paulo mo isi. Sa ia tusi: “O le mea foi lea matou te faatoga atu ai e le aunoa mo outou, ina ia taʻuaogaina outou e lo tatou Atua ia valaauina.” (2 Tesalonia 1:11) Ma sa ia fai mai i se tasi faapotopotoga: “O lenei, ou te tatalo atu i le Atua, ina neʻi tou faia se mea leaga . . . ina ia outou faia le mea lelei.” (2 Korinito 13:7) Ua lelei ona pei o Paulo i le ofoina o talosaga faapitoa mo tagata tatou te alolofa i ai. Ioe, “ua aoga tele le tatalo faatauanau [ma le faamaoni] a le tagata amitonu.”—Iakopo 5:13-16.

16. (a) Ina ia maua le fesoasoani manaomia, o le ā le tele e tatau ona tatou tatalo ai? (e) Ai se ā ua avea ai le tatalo ma faaeaga sili?

¹⁶ Pe a fai se suesuega o le Tusi Paia, e masani ona fai atu se tasi faifeau: “Pe e te tatalo ea i isi taimi e ese mai i le taimi o lau suesuega o le Tusi Paia faalevaiaso?” Ina ia maua le fesoasoani e ao ona tatou tautala atu i le Atua e lē aunoa i le tatalo. (1 Tesalonia 5:17; Luka 18:1-8) Aʻoaʻo ia iloa ona talanoa i a te ia ma le loto maulalo e pei o lea i se uo mamae. Maeu se faaeaga o le mafai ona tuu atu o tatalo i le Pule o le vateatea aoao, le Faafofoga tatalo, ma iloa e faafofoga mai.—Salamo 65:2.

[Fesili mo le Suʻesuʻega]

[Ata i le itulau 227]

Po o le ā e ao i se tasi ona fai pe a faaosoosoina e ulaula—tatalo mo se fesoasoani pe lolo atu ma fai?

[Ata i le itulau 229]

Pe e te tatalo mo le fesoasoani ae ona aafia ai lea i faiga e mafai ona taʻitaʻia i faiga sese?

[Ata i le itulau 230]

Pe e te tatalo a o toatasi oe pe na o i taimi ua e faatasi ma isi?