O le Tusi i Kerisiano Eperu 11:1-40
11 O le faatuatua, o le faatalitali lea ma le mautinoa i mea ua faamoemoe i ai,+ o le faamaoniga manino lea o mea moni e lē o vaaia.
2 Auā e ala i lenei mea, na maua ai e tane i aso anamua* le molimau e faapea, na finagalo malie le Atua iā i latou.
3 O le faatuatua ua tatou iloa ai na saunia mea uma lava i le lagi ma le lalolagi* ona o le afioga a le Atua, o lea na oo mai ai mea ua vaaia mai i mea e lē o vaaia.
4 O le faatuatua na ofo atu ai e Apelu i le Atua le taulaga e sili ona lelei nai lo o Kaino,+ o le faatuatua foʻi lea na molimau e faapea o ia o le tagata amiotonu, auā na talia e le Atua ana meaalofa,*+ ma e ui lava ina oti o ia, ae o loo tautala mai pea o ia+ ona o lona faatuatua.
5 O le faatuatua na aveeseina ai Enoka+ ina ia lē vaai i le oti, ma e leʻi maua o ia i se mea ona na aveeseina o ia e le Atua;+ auā a o leʻi aveeseina o ia, na ia maua le molimau e faapea na ia matuā faafiafiaina le Atua.
6 E lē gata i lea, a aunoa ma le faatuatua e lē mafai ona faafiafiaina le Atua, auā o lē e faalatalata atu i le Atua, e tatau ona ia talitonu o loo soifua o ia, ma e na te tauia o ē e matuā saʻili iā te ia.+
7 O le faatuatua na faaalia ai e Noa+ le mataʻu i le Atua, ma fausia ai le vaa+ e faasaoina ai o ia ma lona aiga, ina ua uma ona lapataʻia e le Atua i mea e lē o vaaia;+ o le faatuatua foʻi na ia taʻusalaina ai le lalolagi,+ ma avea ai o ia ma suli o le amiotonu ona o le faatuatua.
8 O le faatuatua na usiusitaʻi ai Aperaamo+ ina ua valaauina o ia, ma alu ai i se nofoaga o le a fai ma ona tofi; ona alu lea o ia, e ui lava e lē iloa le mea o loo alu i ai.+
9 O le faatuatua na aumau ai o ia o se tagata ese i le nuu o le folafolaga e lē o sona nuu,+ na nonofo i faleʻie+ faatasi ma Isaako ma Iakopo, o suli faatasi ma ia o lea lava folafolaga.+
10 Auā na ia faatalitali atu i se aai e iai ona faavae moni, o le tufuga ma o lē na fausia lea aai, o le Atua lea.+
11 O le faatuatua foʻi na maua ai e Sara le malosi e afuafua ai se fanau, e ui lava ina ua matua tele o ia,*+ auā na manatu o ia e faamaoni* Lē na faia le folafolaga.
12 O lea, e faapea foʻi le tane e toʻatasi, e ui ina lē toe mafai ona fanau,*+ ae na fanau mai iā te ia fanau+ e pei o le tele o fetu o le lagi, ma e lē mafaitaulia e pei o oneone o le sami.+
13 Na feoti i latou uma nei a o faatuatua pea, e ui lava e leʻi faataunuuina folafolaga+ i o latou aso, ae na latou iloa mamao atu nei mea,+ ma talia ma le fiafia, ma folafola atu i le lautele e faapea o i latou o tagata ese ma aumau i nuu na latou nonofo ai.
14 Auā o i latou e faia upu faapena, ua faamaonia ai o loo latou saʻili ma le naunau i se mea e latou te nonofo ai.
15 Peitaʻi, pe ana latou mafaufau pea i le nuu na latou tuua,+ semanū e latou te toe foʻi atu i ai.
16 A o lenei ua latou faanaunau atu i se nofoaga e sili ona lelei, lea e fesootaʻi atu i le lagi. O le mea lea e lē mā ai le Atua iā i latou pe a taʻua o ia o lo latou Atua,+ auā ua ia saunia se aai mo i latou.+
17 O le faatuatua na semanū e ofo atu ai e Aperaamo Isaako ina ua tofotofoina o ia,+ o le tagata na talia ma le fiafia folafolaga, na taumafai o ia e ofoina atu lona atalii e toʻatasi,+
18 e ui lava na faapea atu iā te ia: “O lē e taʻua o lau fanau, e ala mai iā Isaako.”+
19 Ae na manatu o ia e mafai e le Atua ona toe faatūina o ia mai i le oti, ma na ia toe maua mai ai o ia i se auala faafaatusa.+
20 O le faatuatua foʻi na faamanuia ai e Isaako o Iakopo+ ma Esau+ e faatatau i mea e oo mai.
21 O le faatuatua na faamanuia taʻitasi ai e Iakopo atalii o Iosefa,+ ina o le a oti Iakopo,+ ma tapuaʻi atu i le Atua a o faalagolago i le ulu o lona tootoo.+
22 O le faatuatua na taʻua ai e Iosefa ina ua lata ona oti, le ō ese mai o le fanauga a Isaraelu mai i Aikupito, ma avatu i ai poloaʻiga* e faatatau i ona ivi.*+
23 O le faatuatua na natia ai Mose e ona mātua mo le tolu masina ina ua fanau mai,+ auā na la iloa le aulelei o le tamaitiiti,+ ma e la te leʻi fefefe foʻi i le faatonuga a le tupu.+
24 O le faatuatua na musu ai Mose ina ua matua,+ e taʻua o ia o le tama a le afafine o Farao,+
25 ma filifili e faileagaina o ia faatasi ma tagata o le Atua, nai lo o le fiafia puupuu i tuʻinanauga o le agasala,
26 auā sa ia manatu i le faalumaina o le Keriso, o se ʻoa e sili atu nai lo o ʻoa uma o Aikupito, auā sa ia tulimataʻi ma le naunau le taimi e maua ai le taui.
27 O le faatuatua na ia tuua ai Aikupito,+ ae e leʻi fefe i le toʻatamaʻi o le tupu,+ auā sa tūmausalī pea o ia e pei ua ia iloa atu Lē e lē o vaaia.+
28 O le faatuatua na ia tausia ai le Paseka ma sausauina pou i le toto, ina neʻi papaʻi atu lē e na te faaoo le oti i a latou ulumatua.+
29 O le faatuatua na latou savavali atu ai i le Sami Ulaula e pei ona savavali i le laueleele mātūtū,+ ae ina ua taumafai le ʻau Aikupito e sopo atu, na malelemo ai i latou.+
30 O le faatuatua na solo ai i lalo pā o Ieriko, ina ua uma ona faataamilo ai tagata Isaraelu mo aso e fitu.+
31 O le faatuatua e leʻi fano ai le fafine talitane o Raava faatasi ma tagata lē usiusitaʻi, auā na ia taliaina ma le filemu o sipai.+
32 O le ā se isi upu ou te toe fai atu ai? Auā e lē lava se taimi ou te faamatala atu ai e uiga iā Kitiona,+ Parako,+ Samasoni,+ Iefata,+ Tavita,+ faapea foʻi Samuelu+ ma isi perofeta.
33 O le faatuatua na latou faatoʻilaloina ai malo,+ faatupu ai le amiotonu, maua ai folafolaga,+ punitia ai gutu o leona,+
34 taofi ai le malosi o le afi,+ sao ai mai i le pelu,+ toe malolosi ai mai i tulaga vaivai,+ avea ai ma tagata totoa i taua,+ ma tutuliese ai ʻautau na osofaʻia i latou.+
35 Na toe maua ai e fafine o latou tagata oti ina ua toetutū mai,+ ae faapuapuagatia isi tagata auā e latou te leʻi talia le faasaʻolotoina o i latou i se togiola, ina ia latou maua ai se toetū e sili atu ona lelei.
36 Ioe, na tofotofoina isi e ala i tauemuga ma le sasa faamoʻamoʻa, e lē gata i lea, o noanoataga+ ma le faafalepuipuiina.+
37 Na fetogia i latou i maa,+ na tofotofoina, na vaevaeina i ʻili, na fasiotia i pelu,+ na feoaʻi solo i ofu paʻu mamoe, ma paʻu o ʻoti,+ a o lē tagolima i latou, ma faapuapuagatia,+ ma faileagaina;+
38 ma na maʻimau i latou i lenei lalolagi. Na latou feoaʻi solo i toafa, o mauga, o ana,+ ma lua i le eleele.
39 A o i latou uma ia, e ui ina latou maua le molimau e faapea na finagalo malie le Atua iā i latou ona o lo latou faatuatua, ae e latou te leʻi maua le faataunuuga o le folafolaga,
40 auā na muaʻi silafia e le Atua se mea e sili atu ona lelei mo i tatou,+ ina neʻi muamua ona faia i latou ia lelei atoatoa nai lo o i tatou.
Faamatalaga Pito i Lalo
^ Po o “o tatou augātamā.”
^ Po o “le faiga o mea a le lalolagi.” Tagaʻi i le Uiga o Upu.
^ Po o le “na molimau le Atua e ala i le faamaonia o ana meaalofa.”
^ Po o le “maufaatuatuaina.”
^ E faasino atu i le lē mafai ona toe fanau.
^ Ele., “e ui ina oti o ia.”
^ Po o “se faatonuga.”
^ Po o “lona tanuga.”
