O le Tusi i le Faapotopotoga i Efeso 6:1-24
6 Le fanau e, ia usiusitaʻi i o outou mātua+ e tusa ma le finagalo o le Alii, auā o le mea tonu lea e ao ona fai.
2 “Ia e āva i lou tamā ma lou tinā,”+ o le poloaʻiga muamua lea ua iai le mea ua folafolaina:
3 “Ina ia e manuia ai ma e ola umi ai i le lalolagi.”
4 O outou tamā foʻi, aua le faatigā loto i a outou fanau,+ ae ia tausia pea i latou i aʻoaʻiga+ ma apoapoaʻiga* a Ieova.*+
5 O outou pologa, ia usiusitaʻi i o outou matai o i le lalolagi,*+ ma le āva ma le mataʻu i le lotofaamaoni e pei ua outou faia iā Keriso,
6 e lē na o le vaaiga a tagata ina ia tau ina ia faafiafia ai i latou,+ ae e pei o pologa a Keriso o loo faia ma le lotoatoa le finagalo o le Atua.+
7 Ia auauna ma le lotomalie e pei o loo faia iā Ieova*+ ae lē o tagata,
8 auā ua outou iloa, po o ā lava mea lelei e faia e tagata taʻitoʻatasi, e toe maua lava e ia mai iā Ieova,*+ e tusa lava po o ia o se pologa po o se tagata saʻoloto.
9 O outou matai foʻi, ia outou faia le mea lava lea iā i latou, aua le taufaafefe iā i latou, auā ua outou iloa o lo latou Matai o lo outou Matai foʻi lea o loo i le lagi,+ ma e lē faailoga tagata o ia.
10 O aʻu toe upu nei, ia maua pea e outou le mana+ mai i le Alii, ma le tele o lona malosi.
11 Ia oofu i le ofutau atoatoa+ mai i le Atua, ina ia mafai ai ona outou tutū mausalī e tetee atu i togafiti* a le Tiapolo;
12 auā e tatou te lē o tauivi*+ ma tagata* a o malo,* ma pule, ma taʻitaʻi o le lalolagi o loo pulea lenei lalolagi pogisa, ma agaga leaga+ uma i mea o i le lagi.
13 O le māfuaaga lea ia oofu ai i le ofutau atoatoa mai i le Atua,+ ina ia mafai ona outou tetee atu pe a oo i le aso leaga, ma ia outou tutū mausalī ai pe a uma ona outou faia māeʻaeʻa o nei mea uma.
14 O lenei, ia tutū mausalī a o fusimau le fusi o le upu moni i o outou sulugātiti,+ ia oofu i le ufifatafata o le amiotonu,+
15 ma ia faaseevaeina o outou vae e nofosauni e folafola le tala lelei o le filemu.+
16 E ese mai i na mea uma, ia outou ave le talita telē o le faatuatua,+ lea e mafai ai ona outou tineia aū fanafana mū uma a lē o loo leaga.+
17 Ia talia foʻi le puloutau o le faaolataga,+ ma le pelu a le agaga, o le afioga lea a le Atua,+
18 ma ia faaauau ona tatalo+ i le Atua i taimi uma i le agaga,+ ma tatalo eseese uma, ma faatoga eseese uma. O le mea lea, ia mataala ai pea ma tausisi i talosaga mo le ʻaupaia uma.
19 Ia tatalo foʻi mo aʻu, ina ia tuuina mai iā te aʻu upu ina ia mafai ai ona ou tautala ma le lototele e faailoa atu le mea lilo paia o le tala lelei,+
20 lea ua fai ai aʻu ma sāvali+ ua saisaitia, ina ia ou tautala foʻi ma le lototele e tusa ma lenā mea, e pei ona tatau ona ou tautala atu ai.
21 O lea, ina ia outou iloa ai foʻi se tala e uiga iā te aʻu ma mea na ou faia, e faailoa atu mea uma lava iā te outou e Tuiko+ le uso pele, ma o le auauna faamaoni i le Alii.+
22 O le mea lava lea ua ou auina atu ai o ia iā te outou, ina ia outou iloa ai mea e uiga iā i matou, ma ia faamāfanafanaina e ia o outou loto.
23 Tau ina ia maua e uso le filemu ma le alofa, faatasi ma le faatuatua mai i le Atua le Tamā, ma le Alii o Iesu Keriso.
24 Tau ina ia iai le agalelei faifua iā i latou uma, o ē e tumau lo latou alofa i lo tatou Alii o Iesu Keriso.
Faamatalaga Pito i Lalo
^ Po o “faatonuga; taʻitaʻiga.” Ele., “ia tāmau i le mafaufau.”
^ Ele., “i la le tino.”
^ Po o “faufauga.”
^ Ele., “tau.”
^ Ele., “tino aano ma toto.”
^ E foliga mai e faasino atu i malo e lē vaaia i nofoaga o agaga.
