O le Tusi iā Filemoni 1:1-25
1 O aʻu o Paulo, o le pagota+ ona o Keriso Iesu, ma Timoteo+ lo tatou uso, o laʻu tusi lenei iā Filemoni lo ma uso pele na tatou galulue faatasi,
2 ma Afia lo maʻua tuafafine, ma Arekipa+ lo maʻua uso a fitafita, ma le faapotopotoga o loo i lou fale:+
3 Tau ina ia iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso.
4 Ou te faafetai pea i loʻu Atua pe a ou taʻua oe i aʻu tatalo,+
5 a o oʻu faalogo pea i lou faatuatua ma lou alofa i le Alii o Iesu ma le ʻaupaia uma.
6 Ou te tatalo ina ia avea lou iai faatasi ma isi i le faatuatua, e fesoasoani iā te oe e iloa ai ua tatou maua mea lelei uma e ala iā Keriso.
7 Auā ua matuā tele loʻu olioli ma ua faamāfanafanaina aʻu ina ua ou faalogo i lou alofa, talu ai ua faafouina loto* o le ʻaupaia ona o oe loʻu uso.
8 O le mea lea, e ui ua ou matuā saʻoloto e tautala atu i le suafa o Keriso, ma poloaʻi atu iā te oe e fai le mea e tatau ona fai,
9 ae e sili ona ou ʻaiʻoi atu ona o le alofa, auā o aʻu o Paulo, ua ou matua ma ua avea nei aʻu o se pagota ona o Keriso Iesu.
10 Ou te ʻaiʻoi atu foʻi iā te oe e faatatau i loʻu atalii o Onesemo,+ na avea aʻu e pei o sona tamā+ a o saisaitia* aʻu.
11 Sa lē aogā muamua o ia iā te oe, a o lenei ua aogā o ia iā te oe ma aʻu.
12 Ua ou toe faafoʻi atu o ia iā te oe, o ia foʻi lea ua ou alofa faapelepele i ai.
13 Ua ou manaʻo e taofi o ia e ma te nonofo e fai ma ou sui, ina ia auauna mai pea o ia iā te aʻu, a o saisaitia a‘u ona o le tala lelei.+
14 Ae ou te lē fia faia se mea pe a e lē loto i ai, ae ia e faia i lou lotomalie le mea lelei e aunoa ma le faatauanauina.+
15 Atonu o le mea lea na sola ese ai o ia mo sina taimi,* ina ia e toe maua o ia e faavavau,
16 e lē toe avea o ia o se pologa+ ae e sili atu i le pologa, ua avea o se uso pele+ aemaise lava iā te aʻu, ae e sili atu lea iā te oe, e ala i le toe faatasi ma ia ma autasi i le Alii.
17 O lea, afai o e manatu iā te aʻu o sau uō,* ia e talia mai o ia ma le agalelei e pei ona e taliaina o aʻu.
18 Afai foʻi na ia faia se mea sesē iā te oe po o nofo aitalafu foʻi iā te oe, ou te toe totogi atu.
19 O aʻu o Paulo, ua ou tusi atu i loʻu lava lima: ou te toe totogi atu lava. Ou te lē tau fai atu ae o loo e nofo aitalafu iā te aʻu e oo i lou lava ola.
20 Ioe loʻu uso e, tau ina ia ou maua lenei fesoasoani mai iā te oe i le autasi ma le Alii; ia faafouina loʻu loto* i le autasi ma Keriso.
21 Ua ou tusi atu iā te oe, auā ou te talitonu o le a e gauaʻi mai, ma ou te iloa e sili atu mea o le a e faia nai lo o mea ua ou fai atu ai.
22 Ae e lē na o lenā, ia sauni foʻi se mea ou te nofo ai, auā ua ou faamoemoe o a outou tatalo o le a faasa‘oloto atu ai aʻu iā te outou.+
23 O loo momoli atu alofaaga o Epafara+ iā te oe, o lē ua ma saisaitia faatasi ona o Keriso Iesu.
24 O loo alolofa atu foʻi Mareko, Aritako,+ Tema,+ ma Luka,+ o ē ua matou galulue faatasi.
25 Tau ina ia iā te outou le agalelei faifua o le Alii o Iesu Keriso, ona o le agaga ua outou faaalia.
Faamatalaga Pito i Lalo
^ Po o “le alofa faapelepele.”
^ Po o le “faafalepuipui.”
^ Ele., “se itula.”
^ Po o le “paga.”
^ Po o le “alofa faapelepele.”
