O le Tusi Lona Lua i le Faapotopotoga i Tesalonia 3:1-18
3 Le ʻauuso e, o toe upu nei, ia outou tatalo e lē aunoa mo i matou+ ina ia vave ona agaʻi i luma le afioga a Ieova,*+ ma ia faamamaluina e pei ona outou faia,
2 ia laveaʻiina foʻi i tatou mai i tagata taulamalama ma amioleaga,+ auā e lē o tagata uma e iai le faatuatua.+
3 Ae e faamaoni le Alii, ma e na te faamalosia outou ma puipuia outou mai i lē o loo leaga.
4 Ona o i matou o soo o le Alii, ua matou mautinoa ai o loo outou faia mea ua matou faatonu atu, ma e faaauau lava ona outou faia.
5 Tau ina ia faaauau ona taʻitaʻi tonu e le Alii o outou loto i le alofa i le Atua+ ma le tumau+ ina ia auauna ai i le Keriso.
6 O la matou faatonuga lenei iā te outou le ʻauuso e, i le suafa o lo tatou Alii o Iesu Keriso, ia ō ese mai i so o se uso e faalogogatā,+ ma e lē amioaʻi e tusa ma mataupu* na outou* maua mai iā i matou.+
7 Auā ua outou iloa lava le auala e tatau ona outou faaaʻoaʻo mai ai iā i matou,+ auā e matou te leʻi faalogogatā a o iai iā te outou,
8 e matou te leʻi aai fua foʻi i ni meaʻai a se tasi.+ E leai, ae na matou galulue ma le fitā i le pō ma le ao, ina neʻi o matou faatigāina so o se tasi o outou.+
9 E lē ona e leai sa matou pule,+ ae na matou mananaʻo e avea i matou ma faaaʻoaʻoga e tou te faaaʻoaʻo i ai.+
10 O le mea moni, a o matou faatasi ma outou, sa masani ona matou tuuina atu lenei faatonuga: “Afai e lē fia galue se tasi, aua neʻi ʻai o ia.”+
11 Auā ua matou faalogo, e iai nisi o outou e faalogogatā,+ e matuā lē galulue, ae e isuisu fua i mea e leai sa latou feʻau i ai.+
12 O tagata faapena ua matou tuuina atu ai lenei faatonuga ma le apoapoaʻiga ona o le Alii o Iesu Keriso, ia galulue ma le filemu ma aai i meaʻai na alu ai lo latou afu.+
13 A o outou le ʻauuso e, aua le fiu i le faia o le mea lelei.
14 Ae afai e lē usiusitaʻi se tasi i la matou upu o loo i lenei tusi, ia faailogaina lea tagata, ma aua neʻi toe auaumea ma ia+ ina ia māsiasi ai o ia.
15 Aua foʻi le manatu iā te ia o se fili, ae ia apoapoaʻi atu pea iā te ia+ e pei o se uso.
16 Tau ina ia foaʻi atu pea le filemu iā te outou i mea uma lava, e le Alii o le filemu.+ Tau ina ia faatasi atu le Alii iā te outou uma.
17 O aʻu o Paulo, o oʻu alofaaga nei ua ou tusia i loʻu lava lima,+ ma o le faailoga lenei i tusi uma; o laʻu tusilima lea.
18 Ia iā te outou uma le agalelei faifua o lo tatou Alii o Iesu Keriso.
