O Ai e Tatau Ona Aʻoaʻoina Fanau e Uiga i le Atua?

“E lē sili le tagata aʻoga i lona faiaʻoga, a o lē ua aʻoaʻoina lelei o le a pei o lona faiaʻoga.”—LUKA 6:40.

E MANATU nisi mātua e latou te lē agavaa e aʻoaʻoina fanau e uiga i le Atua. Atonu e manatu e leʻi lelei ni aʻoaʻoga ma e lē lava foʻi se malamalama i mataupu faalelotu. O lea la, e masani ona latou tuu atu lenei tiute tāua i se isi o le aiga po o se taʻitaʻi lotu.

Ae o ai e sili ona agavaa e aʻoaʻoina le fanau i aʻoaʻoga moni faalelotu ma taʻiala tau amio? Seʻi iloilo le tala a le Tusi Paia e uiga i lenei mataupu, ma faatusatusa i faamatalaga a tagata suʻesuʻe.

O le Ā le Matafaioi a se Tamā?

Le Aʻoaʻoga a le Tusi Paia: “O outou tamā . . . , aua le faatigā loto i a outou fanau, a ia tausia pea i latou i aʻoaʻiga ma apoapoaʻiga a Ieova.”—Efeso 6:4.

Mea ua iloa e tagata suʻesuʻe: E faapefea ona maua e tamā aogā pe a malolosi o latou talitonuga faalelotu? Ua faapea mai le mataupu Fathers’ Religious Involvement and Early Childhood Behavior, na lomia i le 2009: “Pe a auai tamāloloa i lotu, e ono mafai ona fesoasoani iā i latou e avea ai ma tamā lelei. Pe a lolotu tagata, e latou te maua le lagolagosua mai i isi,  faapea ma taʻitaʻiga, aʻoaʻoga ma taʻiala i le auala e ola ai.”

O loo matuā faatāua e le Tusi Paia le matafaioi a tamā i le faatonuina ma le tausiaina o fanau. (Faataoto 4:1; Kolose 3:21; Eperu 12:9) Peitaʻi, po o aogā pea na fautuaga i aso nei? I le 2009, na lomia ai e le Iunivesite o Florida se mataupu e talanoaina ai aafiaga i fanau mai i o latou tamā. Ua iloa e tagata suʻesuʻe, o fanau sa tele le taimi o o latou tamā i le tausiaina o i latou, e masani ona avea ma tagata e iai faalogona alofa mo isi ma e fiafia o latou olaga. E tele ina amio lelei tama ma e faaitiitia le lotomafatia o teine. E mautinoa, o loo aogā pea fautuaga a le Tusi Paia.

O le Ā le Tāua o le Matafaioi a se Tinā?

Le aʻoaʻoga a le Tusi Paia: “Aua e te tuulafoaʻiina le tulafono a lou tinā.”—Faataoto 1:8.

O mea ua iloa e tagata suʻesuʻe: Ua taʻua i le Handbook of Child Psychology i le 2006: “E tusa ai ma suʻesuʻega i le lalolagi aoao, e masani ona sili mamao atu le taimi e faatasi ai se tinā ma talatalanoa ma lana fanau i lo o le tamā, ma o le tulaga foʻi lenā i le tele o atunuu.” Ona o le tele o le taimi e faatasi ai le tinā ma fanau, e telē la se aafiaga o gaoioiga, tala ma uiga o le tinā i le tuputupu aʻe o le tamaitiiti.

Pe a galulue faatasi le tinā ma le tamā i le aʻoaʻoina o le fanau i upu moni e uiga i le Atua, e lua ni mea tāua ua la faia mo le fanau. Muamua, ua maua e le fanau se mafutaga ma lo latou Tamā i le lagi, o se mafutaga e aogā i le olaga atoa. Lona lua, ua aʻoaʻoina mai ai e fanau i le faaaʻoaʻoga a mātua le auala e tatau ona galulue faatasi ai se tane ma se avā, ina ia taunuu ni faamoemoega tāua. (Kolose 3:18-20) E tusa pe fesoasoani ifo isi i le tamā ma le tinā, ae ua iai i mātua le avega tauave o le aʻoaʻoina o fanau e uiga i le Atua, ma le auala e finagalo o ia e ola aʻe ai se aiga.

E faapefea i mātua ona aʻoaʻoina a latou fanau? O ā auala e sili ona lelei e faia ai faapea?