Alu i mataupu o loo iai

Alu i le lisi o mataupu

Po o le Pope le “Sui o Sagato Petelo”?

Po o le Pope le “Sui o Sagato Petelo”?

Po o le Pope le “Sui o Sagato Petelo”?

I LE 2002, na tusi ai le pope o Ioane Paulo II i le epikopo o Limburg i Siamani e faalēaogāina ai le faaiʻuga a le epikopo e tusa ma le faapaʻū tama. Na faatomua e le pope lana tusi i le taʻua e faapea, e iā te ia le matafaioi mo “le sologa lelei ma le autasi o ekalesia uma e tusa ai ma le finagalo o Iesu Keriso.” Na faapea mai o ia, ua iā te ia le pule e faalēaogāina ai le faaiʻuga, ona o ia o le pope ma o le “sui o Sagato Petelo.”

E tusa ai ma se faamalamalamaga a le Katoliko Roma: “Na tofia e Keriso Sagato Petelo [Peteru] e avea ma taʻitaʻi o le ʻauaposetolo.” Ua fai mai atili le lotu Katoliko, “o le fuafuaga a Keriso ia iai pea nisi e soloaʻi ane i le tofi ulu o Petelo, ma o i latou ia o epikopo o le ekalesia i Roma.”—New Catholic Encyclopedia (2003), Tusi 11, itulau e 495-496.

O nei aʻoaʻoga e faatupu manatu. Po ua e iloiloina pe moni? Seʻi o tatou iloiloina ni fesili se tolu: (1) Pe e lagolagoina i le Tusi Paia le manatu, o Peteru o le uluaʻi pope? (2) E tusa ai ma le talafaasolopito, na faapefea ona amata mai le nofoaiga a pope? (3) Po o faaalia mai i amioga ma aʻoaʻoga a pope o i latou moni o sui o Peteru?

Po o Peteru o le Uluaʻi Pope?

Ua leva ona faaaogā e le lotu Katoliko fetalaiga a Iesu i le Mataio 16:18 e faamaonia ai e faavae le lotu i luga o Peteru. Na fetalai Iesu: “O Peteru oe, ma ou te atiaʻe laʻu faapotopotoga i luga o lenei papa.” Ua tusia na upu i le gagana Latina, i lalo ifo o le taualuga lapotopoto o le malumalu o Sagato Petelo i Roma.

Sa manatu muamua Aokusotino, o se faatamā aloaʻia o le lotu, sa faavae le ekalesia i luga o Peteru. Ae na toe sui lona manatu a o pulapula a lā goto lona soifua, i le uiga o fetalaiga a Iesu. Na ia taʻua i le tusi Retractations, ua faavaeina le ekalesia Kerisiano i luga o Iesu, ae lē o Peteru. *

O loo tele ina matilatila mai le aposetolo o Peteru i tusi o Evagelia. O se faataʻitaʻiga, na filifilia e Iesu le toʻatolu o ona aposetolo—o Ioane, Iakopo ma Peteru, e auai faatasi ma ia i ni taimi faapitoa. (Mareko 5:37, 38; 9:2; 14:33) Sa avatu foʻi e Iesu iā Peteru “ki o le malo o le lagi,” ma na faaaogā e Peteru e tatala ai le avanoa e ulu atu ai i le Malo. Na muamua maua lea avanoa e tagata Iutaia ma i latou na liliu i le lotu Iutaia, ona sosoo lea ma tagata Samaria, ae mulimuli i tagata o Nuu Ese. (Mataio 16:19; Galuega 2:5, 41; 8:14-17; 10:45) O nisi taimi na avea ai Peteru ma fofoga fetalai o le ʻauaposetolo ona e lē mā e tautala. (Galuega 1:15; 2:14) Ae pe na avea Peteru ma ulu o le uluaʻi faapotopotoga ona o na mea?

E saʻo na tusi le aposetolo o Paulo e faapea na avatu iā Peteru le “faiva o le aposetolo mo ē ua peritomeina.” (Kalatia 2:8) Peitaʻi e lē o faapea mai Paulo o Peteru le faauluuluga o le faapotopotoga. Ae o loo faatatau i le matafaioi a Peteru e talaʻi atu ai i tagata Iutaia.

E ui ina tele tiute tauave o Peteru, ae e lē o taʻua i le Tusi Paia lona faapea mai o ia o le ulu o le faapotopotoga, e faia filifiliga mo le ʻausoo. Ae e pau lana tala i lana tusi, o ia “o le aposetolo” ma “o le toeaina.”—1 Peteru 1:1; 5:1.

Ua Faapefea Ona Faaalia i Talafaasolopito le Amataga o le Nofoaiga a Pope?

O anafea, ma na faapefea ona amata mai le nofoaiga a pope? Na amata ona iai i tagata le uiga fiasili i o latou uso tapuaʻi, a o soifua le ʻauaposetolo. Faamata o ā lagona o le ʻauaposetolo i na manatu?

Na faatonuina e le aposetolo o Peteru tane na taʻimua i le faapotopotoga ia aua le “fia pule i tagata o le Atua,” a ia fusia i latou i le lotomaulalo o le tasi i le isi. (1 Peteru 5:1-5) Na lapataʻi foʻi le aposetolo o Paulo o le a iai i le faapotopotoga tane o ē e “faauiga sesē mea, ina ia fetoso ese ai soo e mulimuli atu iā i latou.” (Galuega 20:30) Sa tusia e le aposetolo o Ioane se tusi e lata i le faaiʻuga o le uluaʻi senituri T.A., ma na matuā aʻoaʻia ai se soo e igoa iā Tioterifi. Aiseā? Ona sa “fia muamua” o ia i totonu o le faapotopotoga. (3 Ioane 9) Na avea na aʻoaʻiga mai i le ʻauaposetolo ma auala e taofiofia ai faanaunauga fiasili o nisi mo se vaitaimi.—2 Tesalonia 2:3-8.

E leʻi leva talu ona maliliu uma le ʻauaposetolo ae amata loa ona faasilia e nisi lo latou tulaga. Ua taʻua i le tusi The Cambridge History of Christianity: “E foliga mai e leai se epikopo e toʻatasi na pule i Roma a o leʻi oo i le ogatotonu o le senituri lona lua T.A.” Ae e oo ane i le senituri lona tolu, ua fai e le epikopo o le ekalesia i Roma o ia lava ma pule sili, aemaise lava i nisi o ʻaulotu. * Na tuufaatasia e nisi se lisi o i latou e soloaʻi ane ia avea ma sui o Peteru, e taumafai e faamaonia ai le pule a le epikopo o Roma.

Ae e lē o lagolagoina e lenei lisi le nofoaʻiga a pope. Aiseā? Muamua, e lē o mafai ona faamaonia nisi o igoa o loo iai i le lisi, ma o le mea e sili ona tāua, e lē o mafai ona faamaonia na faavae le ekalesia i luga o Peteru. E tusa lava pe na talaʻi Peteru i Roma e pei ona taʻua i nisi tusitusiga o le senituri muamua ma lona lua, ae e leai se faamaoniga na avea o ia ma faauluuluga o lenā faapotopotoga.

O se tasi o faamaoniga e lē o Peteru le ulu o le faapotopotoga i Roma, ona e toʻatele ni Kerisiano na taʻua e le aposetolo o Paulo i lana tusi i Roma, ae e leʻi taʻua ai lava Peteru. (Roma 16:1-23) Pe afai e moni o Peteru le ulu o le faapotopotoga i Roma, e faapefea ona lē amanaʻiaina o ia e Paulo ma lē taʻua lona igoa i le tusi?

Ia mātau, i le taimi lea na tusia ai e Peteru lana tusi muamua o le Tusi Paia, na tusia ai foʻi e Paulo lana tusi lona lua iā Timoteo, lea na taʻua ai e Paulo Roma. O le mea moni, e ono tusi a Paulo na tusia a o iai i Roma, ae e aunoa ma sona taʻua ai o Peteru.

Na tusia e le aposetolo o Ioane ana tusi e tolu faatasi ma le tusi o Faaaliga, ina ua mavae le 30 tausaga talu ona tusia tusi a Paulo. E aunoa ma lona faapea mai e sili le faapotopotoga i Roma, pe na iai foʻi se taʻitaʻi o le ekalesia e avea ma sui o Peteru, o lē e umia le tofi autū. E leai se faamaoniga i le Tusi Paia po o talafaasolopito, na faia e Peteru o ia lava ma epikopo muamua o le ekalesia i Roma.

Po o Faaalia Mai i Amioga ma Aʻoaʻoga a Pope o i Latou Moni o Sui o Peteru?

E tatou te faatalitalia sē e faapea mai o le “sui o Sagato Petelo” ma “o le sui o Keriso,” o le a ia faaaʻoaʻo i amioga ma aʻoaʻoga a Peteru ma Keriso. O se faataʻitaʻiga, pe na manaʻo Peteru ia matuā faamamaluina o ia e ona uso tapuaʻi? E leai, ona e leʻi manaʻo e ifo atu se isi iā te ia. (Galuega 10:25, 26) Ae ā Iesu? Na fetalai mai o ia, na sau e auauna i tagata, ae lē o tagata iā te ia. (Mataio 20:28) Ae ā pope, po o latou teena le faamamaluina o i latou, ma lē mananaʻo i faalupega maualuluga pe ʻalofia le faalialiavale o a latou ʻoa ma le pule?

Na amiotonu Peteru ma Keriso ma na la faatupuina le filemu. Seʻi faatusatusa a la mea na fai ma tala a le lomifefiloi Katokilo, Lexicon for Theology and Church, e uiga iā pope Leo X: “Sa aafia fua Leo X i faiga faapolotiki, tofia lona aiga i tofi maualuluga ma pupū i mea e fiafia i ai le lalolagi, ae lē amanaʻia ona tiute i mea faaleagaga.” Na taʻua e Karl Amon, o se patele Katoliko ma o se polofesa o le talaaga o le lotu, ia faamatalaga e faamaonia ai o le pope o Alesana VI, o ia o sē e “tele le piʻopiʻo, e pule sauā, faatau mai ma faatau atu tofi o le lotu, ma faia feusuaʻiga lē mamā.”

Ae ā aʻoaʻoga a pope, pe a faatusatusa atu i aʻoaʻoga a Peteru ma Keriso? E leʻi talitonu Peteru e ō uma tagata lelei i le lagi, ona sa ia taʻua le tupu lelei o Tavita e faapea: “E leʻi alu aʻe Tavita i le lagi.” (Galuega 2:34) E na te leʻi aʻoaʻoina foʻi le papatisoga o pepe, ae e ao ona papatisoina se tagata ina ua aʻoaʻoina i le Tusi Paia, ma faaalia ai lona faatuatua.—1 Peteru 3:21.

Na aʻoaʻo e Iesu ona soo ia aua neʻi fiasili i isi. Na fetalai o ia: “Afai e fia muamua se tasi, e tatau ona avea o ia ma lē e mulimuli ma auauna i tagata uma.” (Mareko 9:35) Na manino le faatonuga a Iesu i ona soo ina ua lata i lona maliu, e faapea: “Aua neʻi taʻua outou o Aʻoaʻo, auā e toʻatasi lo outou aʻoaʻo, auā o le ʻauuso uma outou. Aua foʻi neʻi taʻua se tasi i le lalolagi o lo outou tamā, auā e toʻatasi lo outou Tamā o Lē o i le lagi. Aua foʻi neʻi taʻua outou o ʻtaʻitaʻi,’ auā e toʻatasi lo outou Taʻitaʻi o le Keriso lea.” (Mataio 23:1, 8-10) O lea la, faamata o lagolagoina e pope aʻoaʻoga a Peteru ma Keriso?

Ua fai mai nisi e tatau ona tumau pea le nofoaiga a pope e ui e lē o amio faa-Kerisiano i latou o loo umia le tofi. Faamata e talafeagai lenā manatu? Na fetalai Iesu: “E faapea foʻi i laau lelei uma ona fua mai ai o fua lelei, a o laau pala uma, e fua mai ai o fua leaga. E lē mafai e le laau lelei ona fua mai ai ni fua leaga, e lē mafai foʻi e se laau pala ona fua mai ai ni fua lelei.” Pe a fua la i faamaoniga ua tatou talanoaina, pe e te manatu e fia faia se vaega a Peteru ma Keriso, i fua ua fuaina mai e pope?—Mataio 7:17, 18, 21-23.

[Faaopoopoga i lalo]

^ pala. 7 O loo faatatau le talanoaga a Iesu ma Peteru i le faailoaina mai o le Keriso ma lana matafaioi, ae lē o le matafaioi a Peteru. (Mataio 16:13-17) Na taʻua mulimuli ane e Peteru e faapea o Iesu le papa o loo faavae ai le faapotopotoga. (1 Peteru 2:4-8) Na faamautinoa mai e le aposetolo o Paulo, o Iesu le “maa tulimanu faavae” o le faapotopotoga Kerisiano, ae e lē o Peteru.—Efeso 2:20.

^ pala. 14 Na lapataʻi uma mai Iesu ma le ʻauaposetolo o le a pulea le faapotopotoga Kerisiano e tane e aʻoaʻoina talitonuga e ese mai aʻoaʻoga a Iesu. (Mataio 13:24-30, 36-43; 2 Timoteo 4:3; 2 Peteru 2:1; 1 Ioane 2:18) Na taunuu na lapataʻiga ina ua ofi mai i totonu o le faapotopotoga Kerisiano o le senituri lona lua, aganuu faapaupau ma tuufaatasia ai aʻoaʻoga o le Tusi Paia ma filosofia faa-Eleni.

[Ata i le itulau 25]

E tusa ai ma faamaoniga, po o mulimuli pope i le faaaʻoaʻoga a Peteru?