Alu i mataupu o loo iai

Alu i le lisi o mataupu

E Mafai e le Tusi Paia Ona Suia Olaga

E Mafai e le Tusi Paia Ona Suia Olaga

E Mafai e le Tusi Paia Ona Suia Olaga

AISEĀ na filifili ai se tamāloa sa tele ona toʻalua ma ita i Molimau a Ieova e avea ma Molimau? O le ā na uunaʻia ai se faifeʻau o le lotu Penetekoso e suia ona talitonuga? O le ā na fesoasoani i se fafine e leʻi lelei lona aiga na ola aʻe ai, e faateʻaese lagona ua lē aogā ma mafuta atu i le Atua? Na faapefea ona avea sē na fiafia i musika malomaloā ma Molimau a Ieova? Faitau i a latou tala.

“Ua avea aʻu ma se tane lelei.”—RIGOBERT HOUETO

TAUSAGA FANAU: 1941

ATUNUU: BENIN I AFERIKA

TALAAGA: TELE ONA TOʻALUA, MA ITA I MOLIMAU A IEOVA

OLAGA SA IAI: Ou te sau mai i Cotonou, o se aai telē i Benin. Na ou ola aʻe o se Katoliko ae ou te lē toʻaga i lotu. O le toʻatele o le ʻau Katoliko i lo matou nuu sa tele a latou avā, ona sa faataga e le malo le tele o avā i na taimi. O lea, na ou faaipoipo ai i ni fafine se toʻafā.

Na tupu se fouvalega i le atunuu i le va o le 1970 ma le 1980, ma na ou faapea o se mea lelei mo loʻu atunuu. Sa ou lagolagoina lenā fouvalega, ma ou aafia ai i mataupufai a le malo. Na itagia e le ʻaufouvale Molimau a Ieova ona e lē auai i mataupufai a le malo. O aʻu o se tasi o i latou na sauāina le ʻau Molimau. Ina ua tuliesea a latou misionare mai le atunuu i le 1976, na ou mautinoa lava e lē toe foʻi mai.

SUIA E LE TUSI PAIA LOʻU OLAGA: Na uma le fouvalega i le 1990, ma na faateʻia aʻu i le toe vaaia o misionare Molimau. Na ou faapea ifo atonu o loo faatasi le Atua ma nei tagata. O le taimi lenā, ua sui laʻu galuega. Sa ma faigaluega ma se Molimau, ma na talatalanoa mai o ia e uiga i ona talitonuga. Na ia faaali mai mau o le Tusi Paia o loo taʻua ai Ieova o se Atua e alofa ma amiotonu. (Teuteronome 32:4; 1 Ioane 4:8) Na ou fiafia lava i na uiga, ma o loʻu fia iloa atili e uiga iā Ieova, na ou manaʻo ai loa e fai ni aʻu suʻesuʻega i le Tusi Paia.

E leʻi umi ae amata ona ou alu i sauniga a Molimau a Ieova. E ese loʻu fiafia ona o lo latou fealofani, ma e leʻi faapea e sili atu isi ituaiga o tagata nai lo o isi. O le tele lava o loʻu mafuta ma Molimau, o le atili faamalosia foʻi lea o loʻu talitonuga, o soo moni nei o Iesu.—Ioane 13:35.

Na ou iloa afai ou te fia auauna iā Ieova, e ao ona ou tuua le lotu Katoliko. E leʻi faigofie mo aʻu lenā mea ona o loʻu fefe ma popole i manatu o tagata. E umi se taimi na ou mafaufau ai e tuua le lotu, ma na ou maua le lototele e faia faapea ona o le fesoasoani mai iā Ieova.

Peitaʻi e iai le isi suiga tele sa manaʻomia ona ou faia. Na ou aʻoaʻoina i aʻu suʻesuʻega i le Tusi Paia e inosia e le Atua le tele o avā a se tane. (Kenese 2:18-24; Mataio 19:4-6) E na o laʻu faaipoipoga muamua e talia e Ieova. O lea na lesitala ai loa i le malo laʻu faaipoipoga muamua, ae faateʻa isi avā ma faia fuafuaga e tausia ai i latou. Mai i le toʻatolu o na fafine, e toʻalua na avea ma Molimau a Ieova mulimuli ane.

AOGĀ IĀ TE AʻU: E ui lava o loo alu pea laʻu avā i le lotu Katoliko, ae e faaaloalo i laʻu filifiliga e auauna iā Ieova. E ma te iloa uma ua avea aʻu ma se tane lelei.

Na masani ona ou manatu e mafai ona ou faaleleia mea i loʻu nuu e ala i mataupufai a le malo, ae na lē aogā uma na taumafaiga. O lea ua ou iloa nei e na o le Malo o le Atua e mafai ona foʻia faafitauli o tagata. (Mataio 6:9, 10) Ou te faafetaia Ieova ona o le faasino mai o le auala e maua ai se olaga fiafia moni.

“E leʻi faigofie suiga na tatau ona faia.”—ALEX LEMOS SILVA

TAUSAGA FANAU: 1977

ATUNUU: PASILI I AMERIKA I SAUTE

TALAAGA: FAIFEʻAU PENETEKOSO

OLAGA SA IAI: Na ou ola aʻe i le taufaasiʻusiʻuga o le aai o Itu i le itumalo o São Paulo, ma na lauiloa lo matou nuu i le tele o le solitulafono.

Sa ou matuā faasauā ma tele ina faia feusuaʻiga lē mamā, ma sa ou faatau atu fualaau faasāina. Na oo ina ou iloa, e na o le falepuipui po o le tuugamau ou te iʻu i ai. Sa tuu loa lenā olaga ae ou alu i le lotu Penetekoso, ma mulimuli ane avea aʻu ma faifeʻau.

Na ou lagona e tele soʻu aogā i tagata e ala i le lotu, ma sa fai foʻi aʻu polokalame faalelotu i le leitiō ma lauiloa ai i lo matou nuu. Ae na oo ina ou iloa, e lē o popole le lotu i tagata, pe naunau e faamamaluina le Atua. E pau le mea e taulaʻi i ai o le suʻeina o tupe, ma na ou faamavae ai loa mai i le lotu.

SUIA E LE TUSI PAIA LOʻU OLAGA: Ina ua amata ona ou suʻesuʻeina le Tusi Paia faatasi ma Molimau a Ieova, na ou iloa ai le eseesega o i latou ma isi lotu. E lua mea na ou mātauina. Muamua, e lē gata ina aʻoaʻo e Molimau a Ieova le alofa i le Atua ma tuaoi, ae e faatino foʻi. Lona lua, e lē auai i faiga faapolotiki po o taua. (Isaia 2:4) O mea na na ou mautinoa ai ua ou maua le lotu moni, o le auala vaitiiti lea i le ola e faavavau.—Mataio 7:13, 14.

Na ou iloa e tatau ona ou faia ni suiga tetele ina ia fiafia le Atua iā te aʻu. E tatau foʻi ona vaai faalelei loʻu aiga, ma ia ou lotomaulalo. E leʻi faigofie suiga na tatau ona faia, ae na ou mafaia ona o le fesoasoani mai o Ieova. Na muamua suʻesuʻeina e loʻu toʻalua le Tusi Paia, ma o lona fiafia tele i suiga na ou faia, na vave ai ona malamalama i le Tusi Paia. E leʻi umi ae ma iloaina e fia avea i maʻua ma Molimau a Ieova, ma na ma papatiso faatasi i se taimi mulimuli ane.

AOGĀ IĀ TE AʻU: Ua ma fiafia lava e fesoasoani i si a ma fanau e toʻatolu ia mafuta atu iā Ieova, ma ua fiafia ai lava lo matou aiga. Ou te faafetai iā Ieova ona o lona tosina mai o aʻu e ala i ana aʻoaʻoga moni o loo i lana Afioga, le Tusi Paia. E matuā suia ai lava olaga o tagata, e pei ona faamaonia i loʻu olaga.

“Ua lelei oʻu faalogona, ma fiafia loʻu olaga.”—VICTORIA TONG

TAUSAGA FANAU: 1957

ATUNUU: AUSETALIA

TALAAGA: OLA AʻE I SE AIGA LEAGA

OLAGA SA IAI: Na ou ola aʻe i Newcastle i Niu Sa Uelese. O aʻu le ulumatua o le fanau e toʻafitu, ma e sauā ma ʻai ʻava loʻu tamā. E ese foʻi le limatētē o loʻu tinā ma e lē gata ina fasi aʻu i upu, ae toe fasi faamoʻamoʻa. E fai mai lava o aʻu e leaga, ma ou te mū nei i le afi i seoli. O loʻu fefe ia i na faamatalaga.

E tele ina ou tiaʻi aʻoga ona o oʻu manuʻa pe a fasi aʻu e loʻu tinā. Na aveese aʻu e le malo i le 11 o oʻu tausaga ma tuu i se nofoaga mo tamaiti, ma mulimuli ane i se fale e vaai ai e taupousa. Na ou sola ese ina ua 14 oʻu tausaga, ma ou te leʻi fia foʻi i loʻu aiga. O lea na ou nofo ai i aualatele i Kings Cross, o se aai i Sini.

O le taimi lea na ou faaaogāina ai fualaau faasāina, le ʻava malosi ma ata matagā, ma faia faiga faatalitane. E iai se mea na tupu na ou fefe ai lava. Sa ou faamautū i le fale o se alii e fai sona pā pia, ma i se tasi afiafi, na ō mai ai ni alii se toʻalua i le fale. Na tuli aʻu i le potumoe, ae na ou lagona atu lava a latou tala. O loo fia faatau atu aʻu e le alii e ona le pā pia i tamāloloa, ma ave faalilolilo i se vaa laʻu oloa i Iapani, ou te faigaluega ai i se pā pia. O loʻu fefe tele na ou puna ai i fafo mai i le poletito i luga, ma tamoʻe loa mo se fesoasoani.

Na ma fetaui ma se alii o loo asiasi mai i Sini, ma na ou faamatala i ai le mea ua tupu, i loʻu manaʻo e aumai sana tupe mo aʻu. Ae na fai mai o ia e ma te ō i le mea e nofo ai ou te taʻele ma fai se meaʻai. O le mea na oo i ai, na ou nofo ai i inā, ma na ma faaipoipo i le tausaga na sosoo ai.

SUIA E LE TUSI PAIA LOʻU OLAGA: Na tele le mau faalogona na oo mai ina ua ou suʻesuʻeina le Tusi Paia ma Molimau a Ieova. Na ou ita ona sa aʻoaʻoina aʻu o le Atua e māfua ai o tatou puapuaga, ae o lea ua ou iloa nei, o Satani le pogai o mea leaga uma. E ese loʻu fiafia ina ua ou iloa, e lē susunuina e le Atua tagata i se afi i seoli, ona o se mea ua leva ona ou fefe ai.

O loʻu fiafia ia ona e faalagolago Molimau i le Tusi Paia i le faia o a latou filifiliga, ma e ola foʻi e tusa ma o latou talitonuga. O aʻu o se tagata e finauvale, ae na alolofa ma faaaloalo mai Molimau e tusa lava po o ā aʻu tala ma mea na fai.

O le mea na sili ona faigatā, o oʻu faalogona ou te lē aogā ma e pei ou te ʻinoʻino iā te aʻu. Sa tumau pea na lagona e ui ua leva ona ou papatiso o se Molimau a Ieova. Ou te alofa iā Ieova ae na ou mautinoa, e lē mafai ona alofa o ia i se tagata e pei o aʻu.

Na suia atoa loʻu manatu ina ua mavae le 15 tausaga talu ona ou papatiso. Na taʻua e le failauga i le Maota mo Sauniga a Molimau a Ieova le Iakopo 1:23, 24. I le mau, o loo faatusa ai le Tusi Paia i se fāʻata, e mafai ona tatou vāai ai iā i tatou e pei o le silasila mai a Ieova. Sa ou faapea, atonu e ese laʻu vaaiga iā te aʻu ma le silasila mai a Ieova. Ou te leʻi talia lenā manatu fou i lea taimi, ona sa iai pea iā te aʻu le manatu, ailoga e mafai ona alofa Ieova i se tagata e pei o aʻu.

I nai aso mulimuli ane, na ou faitau ai i se mau na suia ai loʻu olaga. O le Isaia 1:18, o loo fetalai mai ai Ieova: “Inā ō mai ia outou, seʻi o tatou talanoa faatasi, ina ia faaleleia la outou faiā ma aʻu. E ui lava ina e pei o le ʻie mūmū sesega a outou agasala, ae o le a paʻepaʻe e pei o le kiona.” Na pei o loo fetalai saʻo mai Ieova iā te aʻu e faapea: “A Viki, sau ia seʻi ta talanoa ma faalelei la ta mafutaga. Ua ou malamalama lelei iā te oe ma ou sesē, ae ou te iloa foʻi mea o i lou loto, ma ou te alofa lava iā te oe.”

E leʻi lelei saʻu moe i lenā po. Sa ou masalosalo pea i le alofa o Ieova iā te aʻu, ae na amata ona ou mafaufau i le togiola na faia e Iesu. O inā faatoʻā ou malamalama ai ua leva ona onosaʻi mai Ieova, ma faaalia mai lona alofa i auala eseese. E pei lava ua ou fai atu iā Ieova: “E lē mafai e lou alofa ona fesoasoani mai iā te aʻu. E lē aogā le maliu o lou Alo e faamagalo ai aʻu agasala.” E foliga mai ou te leʻi talia le togiola na saunia e Ieova. Ae ona o le manatunatu loloto i le meaalofa o le togiola, na ou lagona ai ua alofagia aʻu e Ieova.

AOGĀ IĀ TE AʻU: Ua lelei oʻu faalogona, ma fiafia loʻu olaga. Ua faaleleia laʻu faaipoipoga, ma ou te fiafia e taʻu atu i isi mea na oo iā te aʻu e fesoasoani ai iā i latou. Ua matuā māfana la ma mafutaga ma Ieova.

“O le tali lea o laʻu tatalo.”—SERGEY BOTANKIN

TAUSAGA FANAU: 1974

ATUNUU: RUSIA

TALAAGA: FIAFIA I MUSIKA MALOMALOĀ

OLAGA SA IAI: Na ou fanau i Votkinsk, le nuu na fanau ai foʻi ia Pyotr Ilich Tchaikovsky, o se fatupese lauiloa. E matitiva loʻu aiga. E tele uiga lelei o loʻu tamā ae o lona vaivaiga o le ʻai ʻava, ma e leʻi maua ai se filemu i le aiga.

E lē o aʻu o se tamaitiiti e lelei i le aʻoga, ma na ou manatu faatauvaa iā te aʻu a o ou tuputupu aʻe. Ou te leʻi fia talanoa pe faatuatuaina isi, ma ou te lē fiafia foʻi i le aʻoga. Sa faigatā ona ou faamatala atu se mataupu i luma o le vasega, e oo lava i manatu faigofie sa mafai ona ou faamatala i nisi taimi. Ina ua uma laʻu vasega valu, na taʻua i loʻu lipoti e faapea: “E lē tele ni upu e iloa, ma e lē mafai ona faamatala ona manatu.” Na ou faanoanoa ai lava i na upu ma atili ai ona lagona loʻu faatauvaa, ma ou mafaufau pe e iai se aogā o loʻu olaga.

Na amata ona ou inu ʻava malosi a o ou talavou ma sa ou fiafia i ai. Ae ina ua ova laʻu inu, na oo ina lē lelei ai oʻu faalogona. Na atili ai ona ou lagona le mafatia ma ua lē aogā loʻu olaga. O nisi taimi ou te lē fia tuua le fale mo le tele o aso, ma iʻu ai ina ou faapea ifo, atonu e sili pe a ou pule i loʻu ola.

Ina ua 20 oʻu tausaga, sa ou maua se isi mea fou ou te fiafia i ai, o musika malomaloā. Na toe faafouina ai loʻu malosi ma sa ou faamasani i isi na fiafia foʻi i ai. Na faauumi loʻu ulu, tui oʻu taliga ma fai ofu e pei o tagata o fāʻili sa ou fiafia i ai. Na faasolosolo ina ou lē popoi, fia malosi ma faamisa i loʻu aiga.

Sa ou manatu ou te maua le fiafia i le faalogologo i musika malomaloā, ae e lē o le mea lenā na tupu ona na leaga ai oʻu uiga! E lē gata i lea, ou te leʻi fiafia ina ua ou iloa mea leaga e fai e tagata pepese taʻutaʻua sa ou fiafia i ai.

Ua ou toe mafaufau, o le a ou pule nei i loʻu ola, ae na pau le mea na taofia ai aʻu, o loʻu mafaufau i si oʻu tinā. E alofa o ia iā te aʻu ma e tele mea na ia faia mo aʻu. Na matuā faigatā loʻu tulaga. Ou te lē o toe fia ola, ae ou te lē mafaia foʻi ona faauma loʻu ola.

Na ou faitauina tusi o tala lauiloa a Rusia e tau faateʻa ai na mafaufauga. Sa iai se tala i se tagata toa na auauna i se falesā. Na oso aʻe soʻu faanaunauga e fia auauna i le Atua ma uso a tagata ma na sasaa atu oʻu faalogona i le Atua, o se mea ou te leʻi faia muamua. Na ou talosaga i le Atua e faasino mai se auala ina ia aogā ai loʻu ola. A o faia laʻu tatalo, na pei ua matuu atu se avega mamafa. Ae na sosoo ai ma se isi mea e sili ona ofoofogia. I le pe ā ma le lua itula mulimuli ane, na asiasi mai ai se Molimau a Ieova ma ofo mai e faia ni aʻu suʻesuʻega i le Tusi Paia. Na ou talitonu o le tali lea o laʻu tatalo, ma o le amataga lea o se olaga fou ma fiafia mo aʻu.

SUIA E LE TUSI PAIA LOʻU OLAGA: E ui ina faigatā, ae na ou tiaʻi mea uma e fesootaʻi atu i musika malomaloā. Peitaʻi e umi se taimi o mau pea na musika i loʻu mafaufau. O so o se mea lava ou te faalogo ai i musika faapena, ou te manatua ai loʻu olaga tuai. Ae ou te leʻi manaʻo e toe mafaufau i na taimi leaga, auā o lea ua ou teuloto mea lelei ua ou aʻoaʻoina. O lea, na ou ʻalofia ai na nofoaga ma pe afai e faaosoosoina aʻu e toe mafaufau i loʻu olaga tuai, ona ou tatalo faatauanau atu lea iā Ieova. O le faia faapea na ou lagona ai “le filemu mai i le Atua, e silisili i mea uma lava e manatu i ai.”—Filipi 4:7.

A o ou suʻesuʻeina le Tusi Paia, na ou aʻoaʻoina ai e tatau i se Kerisiano ona taʻu atu i isi ona talitonuga. (Mataio 28:19, 20) Na ou manatu, e lē taitai mafai ona ou faia faapea. I le taimi e tasi, na matuā faafiafiaina aʻu ma toʻafilemu loʻu loto ona o mea fou ua ou aʻoaʻoina. Na ou iloa e tatau foʻi i isi ona aʻoaʻoina nei mea moni ma e ui i loʻu matamuli, ae na amata ona ou talanoa atu i isi. Na faateʻia aʻu ona na teʻa loʻu lagona lē aogā, ina ua ou talaʻi atu i isi e faatatau i le Tusi Paia. Na atili faamalosia ai loʻu talitonuga i le Tusi Paia.

AOGĀ IĀ TE AʻU: Ua ou maua se faaipoipoga fiafia ma olioli foʻi ona o le fesoasoani i le toʻatele ina ia iloa le Tusi Paia, e aofia ai loʻu tuafafine ma loʻu tinā. Ua ou maua se olaga e aogā, ona o le auauna i le Atua ma fesoasoani i isi ia iloa o ia.