Alu i mataupu o loo iai

Alu i le lisi o mataupu

O se Aso e Tumu i le Fiafia Tele ma Faamoemoega Pupula

O se Aso e Tumu i le Fiafia Tele ma Faamoemoega Pupula

Faauuga Lona 130 o le Aʻoga a Kiliata

O se Aso e Tumu i le Fiafia Tele ma Faamoemoega Pupula

E LĒ taumatea, o le faauuga o le vasega lona 130 o le Aʻoga Faale-Tusi Paia a le Olomatamata o Kiliata na faatumulia i le fiafia ma faamoemoega. I le Aso Toonaʻi, Mati 12, 2011, na faapotopoto ane ai le 8,500 o tagata, e aofia ai sui aʻoʻoga, o o latou aiga faapea ma uō, ina ia molimauina le faauuga. Na lagona le fiafia tele, e lē gata i lenā aso, ae faapea foʻi mo le lumanaʻi o misionare ua lelei ona toleniina, lea e lē o toe umi ona auina atu lea i vaega uma o le lalolagi, e aʻoaʻoina tagata e uiga i upu moni o le Tusi Paia.

“E Fiafia i Latou Uma o Ē e Faatalitali iā” Ieova

O lenā manatu faalaeiau, e maua lea i le Isaia 30:18, ma o le matua lea o le lauga a Geoffrey Jackson, o se sui mai i le Vaega Pule o Molimau a Ieova ma o le taʻitaʻifono o le polokalame. Na ia faaalia ona uiga māfana ma agamālie a o ia faamalō i le ʻauaʻoʻoga mo le faaiʻuina o la latou aʻoga e ui ina faigatā, faapea ai ma le faapopoleina i le aso o le faauuga. O ā ni mea e mautinoa e faatalitalia e le ʻauaʻoʻoga o le a tutupu? Na ia taʻua ni manatu aogā se tolu mai i le Isaia 30:18-21.

Muamua, na taʻua e le uso o Jackson: “E mafai ona e faatalitalia Ieova e faafofoga i au tatalo.” Na ia taʻua le faamautinoaga lea e i le fuaiupu e 19: “O le a matuā agalelei mai lava o ia [le Atua] iā te oe pe a e alaga atu.” Ia mātau, i le gagana Eperu, o loo fetalai le Atua i tagata taʻitoʻatasi ae e lē o se vaega, o lea na faapea mai ai le uso o Jackson, e faafofoga mai Ieova i tatalo a tagata taʻitoʻatasi. “E pei o se Tamā, e lē fesili mai Ieova, ʻAiseā e te lē malosi ai e pei o le isi tagata lale?’ Nai lo lea, e uaʻi totoʻa mai o ia i tagata taʻitoʻatasi ma e tali mai o ia.”

Lona lua, na faailoa mai e le failauga e tatou te faatalitalia faafitauli. “E lē o folafola mai e Ieova o le a faigofie le olaga, peitaʻi o le a ia fesoasoani mai iā i tatou.” E pei ona faaalia i le fuaiupu e 20, na valoia e le Atua e faapea, o taimi e vagaia ai e ʻautau ia Isaraelu, o le a avea ai popolega ma omiga o se mea e masani ai tagata e tai pei o le mauaina o meaʻai ma vai. Peitaʻi e nofosauni pea Ieova e faasaoina tagata. O le a fesagaʻi foʻi tagata aʻoga o Kiliata ma faafitauli ma luʻi, e aofia ai ma mea e latou te leʻi faatalitalia! Na faaopoopo atili mai le uso o Jackson: “Ae e mafai ona e faatalitalia o le a iai pea Ieova e fesoasoani iā te oe ina ia taulimaina luʻi taʻitasi.”

Lona tolu, na faamanatu atu e le uso o Jackson i le ʻauaʻoʻoga e faapea, e pei ona faaalia mai i fuaiupu 20 ma le 21, “e mafai ona e faatalitalia taʻitaʻiga—o lea, ia saʻili iai!” Na ia faapea mai, e tatau i Kerisiano i aso nei ona faalogologo lelei a o fetalai mai Ieova e ala i le Tusi Paia, faapea ma lomiga faale-Tusi Paia. Na uunaʻia ma le māfana e le failauga le ʻauaʻoʻoga, ina ia faaauau pea ona faitauina le Tusi Paia i aso taʻitasi, ona e maua ai le ola.

“Ia Oo iā te Outou le Mataʻu iā Ieova”

Na faamatalaina e Anthony Morris o se sui o le Vaega Pule, le uiga o le faaupuga mai i le Tusi Paia “le mataʻu iā Ieova.” (2 Nofoaiga a Tupu 19:7) E lē o faasino atu na upu i se uiga fefe, ae o se faanaunauga malosi e faia le mea saʻo, o se migao loloto ma e moni, lea e faaalia ai e se tasi le gatete talafeagai. Na apoapoaʻi atu le uso o Morris i le ʻauaʻoʻoga: “Ia faaalia lenā mataʻu a o faatino la outou tofiga faamisionare.” E faapefea ona latou faaalia lenā mataʻu iā Ieova? Na taʻua e le failauga ni auala aogā se lua.

Muamua, na timaʻi atu le uso o Morris i le ʻauaʻoʻoga ina ia faatatau le fautuaga o loo i le Iakopo 1:19: “Ia faalogologo lelei . . . ae aua le vave ona tautala.” Na ia mātauina le tele o mea na aʻoaʻoina e le ʻauaʻoʻoga a o faagasolo le aʻoga mo le lima masina, ae sa tatau ona faaeteete ina neʻi faamaualuluga i mea ua latou aʻoaʻoina, a o faatinoina lo latou tofiga. Na taʻua e ia: “E ao ona outou faalogo muamua. Ia faalogo atu i a outou faapotopotoga ma ē o taʻimua i oganuu o le a outou galulue ai; faalogo i mea latou te fai atu ai e uiga i le atunuu ma le aganuu. Aua le faatalatū e fai atu, ʻOu te lē iloa.’ Pe afai na aogā lau aʻoga, e te iloa ai, o le tele o mea o le a e aʻoaʻoina, o le tele foʻi lenā o lou malamalama e itiiti lava mea o loo e iloa.”

Lona lua, na faitau e le uso o Morris le Faataoto 27:21: “O le ulo e tunu ma faamamā ai le siliva, o le ogaumu foʻi mo le auro; e faapea foʻi le tagata i lona viiga.” Na taʻua e ia, e pei lava ona manaʻomia ona faamamā pe faaleleia le auro ma le siliva, e faapena foʻi ona faaleleia i tatou e ala i viiga. E faapefea? Pe a viia se tasi, o i inā e iloa ai le ituaiga o tagata e iai o ia. E ono iʻu ai i le faamaualuga ma motusia ai le faiā a se tasi ma Ieova, pe e uunaʻia ai i tatou ina ia faailoa atu o loo tatou nofo aitalafu iā Ieova, ma atili maumauaʻi ai ina ia ausia ana tapulaa. O lea, na uunaʻia e le uso o Morris le ʻauaʻoʻoga ina ia saʻo lo latou manatu i so o se viiga e latou te maua—o se avanoa e faamaonia atu ai o loo iā te i latou le ʻmataʻu tatau iā Ieova.’

“Ia Faataua Lou Tofiga”

Na tauaaoina e Guy Pierce o se sui o le Vaega Pule le lauga autū o le polokalame. Na ia talanoaina le matua o loo i luga, ma faamatalaina le upu “misionare” lea e uiga o “lē ua auina atu ma se tofiga.” Na faapea mai o ia, e tele isi ituaiga o misionare ua auina atu ma le tele o tofiga eseese. E toʻatele ua taulaʻi atu i le faamālōlōina faaletino ma faiga faapolotiki, ina ia maua ai se iʻuga mo faafitauli o le lalolagi. Na fai mai o ia: “E ese outou.” E faapefea?

I la latou suʻesuʻega i le Tusi Paia, na aʻoaʻoina mai ai e le ʻauaʻoʻoga le tele o mea e uiga i faamālōlōga faaletino. Na “matuā olioli” mātua o se teineitiiti ina ua toe faatūina o ia e Iesu. (Mareko 5:42) E faapena foʻi le matuā olioli o tauaso ina ua faamālōlōina faavavega i latou. O se tasi o māfuaaga o na faamālōlōga, o le faaalia mai ai o mea o le a faataunuuina e Keriso i le lalolagi fou. I lenā lava taimi, o le a faamālōlōina mai i maʻi uma le “motu o tagata e toʻatele,” o ē e amiotonu o le a faasaoina mai le iʻuga o lenei lalolagi amioleaga. (Faaaliga 7:9, 14) O le a latou faafeiloaʻia ē e pele o le a toe faatutūina mai, lea o le a maua foʻi le malosi atoatoa. Maʻeu le olioli tele!

Peitaʻi, na faamatala e le uso o Pierce e faapea, o faamālōlōga faaletino e lē o le faamālōlōga sili lea. Na toe mamaʻi ē na faamālōlōina e Iesu. Na toe maliliu ē na ia faatutūina. O ē na ia faapupulaina na toe tauaso mulimuli ane, atonu ina ua maliliu. Na sili atu ona tāua le faamālōlōga faaleagaga lea na faataunuuina e Iesu. Ua iai foʻi i misionare mai i Kiliata se tofiga o le faia o faamālōlōga faaleagaga. Ua latou fesoasoani i tagata ina ia toe maua se leleiga ma lo tatou Tamā faalelagi, ina ia mafai ona latou ola faaleagaga. E na o ē e faamālōlōina faaleagaga o le a ausia le sini o le ola e faavavau. Na taʻua manino e le uso o Pierce: “O lenā faamālōlōga faaleagaga e viia ai le Atua. O le a e taulau manuia ai i lau faiva.”

Isi Manatu Tāua e Tolu o le Polokalame

“Po o le a Lelei Lenei Aso?” Na faia lenā fesili talafeagai e Robert Rains, o se sui o le Komiti o le Lālā i le Iunaite Setete. Na ia faalaeiauina le ʻauaʻoʻoga ina ia faamautinoa, o aso taʻitasi i o latou tofiga o se aso lelei, e ala i le faaaogā tatau o o latou taimi, saʻili atu i le Afioga a le Atua pe a feagai ma popolega, ma faalagolago iā Ieova e ala i le tatalo.

“Po o le a Toe Faafouina O Tatou Uiga?” Na taʻua lenā fesili i le lauga a Mark Noumair, o se faiaʻoga o le Aʻoga a Kiliata. Na talanoaina le 1 Ioane 2:7, 8, lea na taʻua ai e le aposetolo o Ioane le “poloaʻiga tuai” lea sa avea foʻi ma “poloaʻiga fou.” E tutusa uma mea o loo faasino atu ai nei poloaʻiga e lua—o le faaalia lea e soo o Keriso o le alofa lē manatu faapito o le tasi i le isi, ma se agaga faataulaga. (Ioane 13:34, 35) Ua leva lea poloaʻiga, auā sa tuuina mai e Keriso lava ia i ona soo i le tele o tausaga ua mavae; ae e fou foʻi, ona o loo fesagaʻia e Kerisiano ni luʻi fou, ma e manaʻomia ai ona faaalia le alofa i auala fou ma atoatoa. Ua feagai foʻi misionare ma se faasologa fou o tulaga o mea, ma e manaʻomia ai ona iloa auala fou e faaalia ai le alofa. O le ā le auala sili e faia ai faapea?

Na timaʻi atu le uso o Noumair e faapea: “Aua neʻi avea oe ma mea e te ʻinoʻino iai.” Na ia lapataʻi mai, pe afai e tatou te vāai i amioga e tatou te ʻinoʻino iai, ae i le taimi e tasi e tatou te faia na amioga, o lenā la ua tatou faia le mea e tatou te ʻinoʻino iai—o se ala e faaleagaina ai i tatou lava. I le isi itu, pe a tatou tali atu i ia luʻi e ala i le faaalia o le alofa i ni auala fou, o lenā ua tatou faasusulu atu le “malamalama moni” ma aveesea ai le pogisa faaleagaga.

“Tauave le Avega.” Na faalautele e Michael Burnett, o se isi faiaʻoga i Kiliata ia lenei matua. Na ia taʻua tagata i Aferika, o ē e tauaveina ni avega mamafa i luga o o latou ulu. E latou te faaaogāina le kata, o se ʻie e tāʻai ma tuu i luga o le ulu ina ia mafai ona lagolagoina ma faapaleni le avega, ma e iʻu ina savali ma le faaeteete ma le matagofie. O le a iai i misionare mai i Kiliata se avega mamafa o tiute tauave i atunuu o le a tofia iai, ae ua iā i latou se mea e tai pei o se kata: o se toleniga auʻiliʻili faale-Tusi Paia. A o faatatauina mea ua latou aʻoaʻoina, o le a paleni lelei a latou tiute tauave, ma faia i se auala talafeagai.

O Mea na Tutupu ma Faatalanoaga

O se tasi vaega o le Aʻoga o Kiliata, o le talaʻi faatasi ma faapotopotoga a Molimau a Ieova i lenā vaipanoa. Na aotele mai e William Samuelson, o le ovasia o le Matagaluega o Aʻoga Faatiokarate, nisi o mea na tutupu i nisi o le ʻauaʻoʻoga e ala i lana matua, “Aua Neʻi Mālōlō Lou Lima.” (Failauga 11:6) E ala i le toe faaata mai o mea na tutupu, na faataʻitaʻi mai ai e nisi o le ʻauaʻoʻoga le auala na latou galulue malolosi ai, ma maua avanoa e talaʻi atu ai le tala lelei i luga o vaalele, o faleʻaiga ma pamu penisini. Na latou talaʻi atu mai i lea fale i lea fale, molimau lē fuafuaina atu, pe e ala foʻi i tusi. E mautinoa le lē mālōlō o o latou lima, ma na maua ai ni iʻuga lelei.

Na faatalanoa e Kenneth Stovall, o se sui o le matagaluega e vaavaaia le Aʻoga i Kiliata ia ni tane se toʻatolu o ē ua tele le tomai i le auaunaga faamisionare—o Barry Hill sa auauna i Ecuador ma Dominican Republic, o Eddie Mobley i Côte d’Ivoire ma Tab Honsberger i Senegal, Benin, ma Haiti. Na latou ioe uma i le matua, “Ia Tofotofo iā Ieova ma Selesele i Faamanuiaga.” (Malaki 3:10) Mo se faataʻitaʻiga, na faamatala e le uso o Hill le auala na ia fesagaʻia ai ma lana avā ia le luʻi o le faamasani i le tau i Ecuador, lea e sui mai i le vevela ma le pefu, i le vevela ma le palapalā. Na ia manatua, e pe a ma le lua ma le ʻafa tausaga o o la faaaogāina pakete e la te tāʻeʻele ai. Ae na lē taitai ona la manatu e tuua lo la tofiga, ona na la manatu iai o se faamanuiaga mai iā Ieova. Na faapea mai o ia: “O lo maʻua olaga lea.”

I le faaiʻuga o le polokalame, na lauina ai loa e se sui o le ʻauaʻoʻoga se tusi e faaalia ai le lototalisapaia o le vasega mo le aʻoga. Na taʻua i le tusi e faapea: “Ua faateleina lo matou faatuatua ma ua matou iloa, o le a faasolosolo ina faaleleia o matou tomai.” Na maua uma e le ʻauaʻoʻoga a latou tipiloma ma tofia loa i atunuu eseese. Na faaiʻuina e le uso o Jackson le polokalame e ala i le faamautinoa atu i le ʻauaʻoʻoga, ina ia faatalitalia le fesoasoani a Ieova i o latou olaga o le a iai, aemaise lava i taimi e feagai ai ma luʻi. Ina ua tuua le polokalame e ē na aofia ai, na faatumulia i latou i le fiafia tele ma faamoemoega pupula. E lē fesiligia, o le a faaaogāina e Ieova nei misionare fou ina ia faataunuuina ai mea lelei.

[Ata i le itulau 31]

FAAMAUMAUGA O LE VASEGA

9 atunuu o loo auai o latou sui

34.0 faatatauga o tausaga

18.6 faatatauga o tausaga papatiso

13.1 faatatauga o tausaga paeonia

[Faafanua]

(Tagaʻi i le lomiga mo le ata atoa)

Ua taʻua i lalo atunuu e galulue ai le ʻaufaauu

ATUNUU UA TOFIA I AI MISIONARE

ANITENITINA

ARMENIA

BURKINA FASO

BURUNDI

CONGO (KINSHASA)

CZECH REPUBLIC

HAITI

HONG KONG

INITONESIA

KENYA

LITHUANIA

MELEISIA

MOZAMBIQUE

NEPALE

PAPUA NIU KINI

ROMANIA

SENEGAL

TANZANIA

UGANDA

ZIMBABWE

[Ata i le itulau 31]

Vasega Faauu Lona 130 o le Aʻoga Faale-Tusi Paia a le Olomatamata o Kiliata

I le lisi o i lalo, e faanumera laina mai i luma i tua, ma o suafa e lisi mai i le agavale i le taumatau.

(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.

(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.

(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.

(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.

(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.

(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.

(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.