Alu i mataupu o loo iai

Alu i le lisi o mataupu

O ā Mea e ao Ona A‘oa‘oina e Fanau?

O ā Mea e ao Ona A‘oa‘oina e Fanau?

O ā Mea e ao Ona Aʻoaʻoina e Fanau?

“O Tusitusiga Paia uma e mai i le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu.” —2 TIMOTEO 3:16.

E TATAU ona aʻoaʻoina fanau i le mea moni e uiga i le Atua. O fea e maua ai? E maua i le Tusi Paia, o le tusi lotu e sili ona faaaloalogia i le lalolagi aoao.

Ua pei le Tusi Paia o se tusi mai i le Atua. Ua faailoa mai ai e le Atua ona uiga ma taʻu mai ai taʻiala mo amioga tatau mo ana fanau uma, e tusa pe lāiti pe matutua. Seʻi mātau nisi o aʻoaʻoga o loo i le Tusi Paia ma lesona e oo lava i fanau iti, e mafai ona aʻoaʻoina ai.

E tusa ai ma nei faataʻitaʻiga, e fesoasoani lesona o le Tusi Paia i fanau ina ia matutua aʻe e iai le lotofaafetai, le faaaloalo ma le tigā alofa. Ae o ai la e tatau ona aʻoaʻoina fanau i nei lesona?

O le ā e finagalo le Atua ia tatou iloa e uiga iā te ia?

Le aʻoaʻoga a le Tusi Paia: “O oe e ou le suafa o Ieova, e na o oe lava o Lē e Silisili Ese i le lalolagi uma.”Salamo 83:18.

Lesona: O loo soifua le Atua ma e iai lona suafa.

Le aʻoaʻoga a le Tusi Paia: “E suʻesuʻe e Ieova loto uma, e silafia foʻi e ia o mafaufauga ma faanaunauga uma. Afai e te saʻili iā te ia, ona e maua lea o ia.”—1 Nofoaiga a Tupu 28:9.

Lesona: E manatu mai Ieova le Atua iā i tatou uma e aofia ai ma fanau iti. (Salamo 10:14; 146:9) O lona finagalo, ia tatou aʻoaʻoina mea e uiga iā te ia.

Le aʻoaʻoga a le Tusi Paia: “Aua tou te faapuapuagatia se . . . tama ua leai sona tamā. Afai e te faapuapuagatia lava iā te ia, ae e matuā alaga mai o ia iā te aʻu, ou te faalogo lava i lana alaga.”—Esoto 22:22-24.

Lesona: E faafofoga mai foʻi Ieova i tatalo a fanau iti. E mafai ona tatou talanoa atu i le Atua i so o se taimi ma sasaa atu iā te ia o tatou faalogona ma popolega.

Le aʻoaʻoga a le Tusi Paia: “Na latou tofotofo pea lava pea i le Atua, ma na latou faatigā foʻi i Lē e Paia o Isaraelu.”—Salamo 78:41.

Lesona: E tatau ona tatou mafaufau muamua ona faatoʻā tautatala lea pe gaoioi, ona o ā tatou faamatalaga ma gaoioiga, e mafai ona faatigā pe faafiafia ai Ieova.

O le ā so tatou manatu i tagata e eseese o tatou tulaga?

Le aʻoaʻoga a le Tusi Paia: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”—Galuega 10:34, 35.

Lesona: Afai e talia e le Atua ituaiga uma o tagata, e lē tatau la ona tatou faailogaina tagata ona e ese o latou lanu po o foliga.

Le aʻoaʻoga a le Tusi Paia: “Ia nofosauni pea e tali atu i luma o tagata uma e fesili mai iā te outou i le māfuaaga o lo outou faamoemoe, a ia faia faapea faatasi ma le agamalu ma le matuā faaaloalo lava.”—1 Peteru 3:15.

Lesona: Pe a talanoa e uiga i lotu, e tatau ona faaali atu o tatou manatu i se auala mautinoa ma ia agalelei. E tatau foʻi ona faaaloalo i ē e ese o latou talitonuga.

Auala e feagai ai ma sui taʻitasi o le aiga.

Le aʻoaʻoga a le Tusi Paia: “O outou le fanau, ia usiusitaʻi i o outou mātua i mea uma lava, auā o le mea lea e finagalo malie i ai le Alii.”—Kolose 3:20.

Lesona: Pe afai e usiusitaʻi le fanau, e faamaonia ai lo latou alolofa i o latou mātua ma e mananaʻo e faafiafia le Atua.

Le aʻoaʻoga a le Tusi Paia: “Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia.”—Kolose 3:13.

Lesona: E iai taimi e faia ai e nisi tagata e aofia ai ma tagata o lo tatou aiga se mea e tatou te lē fiafia ai. Peitaʻi, pe afai e tatou te mananaʻo e faamagalo i tatou e le Atua, e tatau ona tatou faamagalo atu i isi.—Mataio 6:14, 15.

Aiseā e ao ai ona faamaoni ma agalelei?

Le aʻoaʻoga a le Tusi Paia: ʻIa tuu ese le pepelo, ma ia taʻitasi outou ma tautala i le mea moni ma lona tuaoi.’—Efeso 4:25.

Lesona: Pe a tatou tautatala ma le faamaoni, ua tatou faaaʻoaʻo ai i le Atua ma faafiafia o ia. Ae pe a fai ma a tatou masani le pepelo, o le a pei i tatou o le Tiapolo le fili o le Atua, ma o le “tamā o le pepelo.”—Ioane 8:44; Tito 1:2.

Le aʻoaʻoga a le Tusi Paia: “O mea uma tou te mananaʻo e faia mai e tagata iā te outou, ia faapea lava ona outou faia iā i latou.”—Mataio 7:12.

Lesona: E tatau ona tatou magafagafa i faalogona, manatu ma manaʻoga o sui taʻitasi o le aiga ma isi i lo tatou nuu. Pe a tatou faaalia le “tigā alofa,” o le a agalelei mai foʻi isi iā i tatou.—1 Peteru 3:8; Luka 6:38.