Alu i mataupu o loo iai

Alu i le lisi o mataupu

Pe e iai se afioaga mau o le Atua?

Pe e iai se afioaga mau o le Atua?

Ua Fesili Mai le ʻAufaitau . . .

Pe e iai se afioaga mau o le Atua?

▪ Ua talitonu nisi lotu, e iai le Atua i mea uma. O se faaaʻoaʻoga, ua faapea mai le New Catholic Encyclopedia e iai le Atua “i so o se mea ma o ia ua māfua ai ona iai mea uma.” O le faamatalaga a Ioane Ueselē, o lē na faavaeina le lotu Metotisi, i lana lauga na faamatuaina, “Ua Iai le Atua i Mea Uma” e faapea: “E lē o iai se vaega o le vateatea, po o le foafoaga, e lē o iai le Atua.”

O le ā le aʻoaʻoga a le Tusi Paia? Pe e iai le Atua i mea uma i le lagi, i le lalolagi, ma i totonu foʻi o tagata?

O le mea moni, ua taʻua i le Tusi Paia o le lagi, o le afioaga lea o le Atua. Ua tusia ai foʻi le talosaga lenei i le Atua a le tupu o Solomona: “Ia e faafofoga mai mai i le lagi i lou afioaga tumau.” (1 Tupu 8:43) Ina ua aʻoaʻo e Iesu Keriso ona soo i le auala e tatalo ai, na ia faapea atu ia latou tatalo: “Lo matou Tamā e o i le lagi.” (Mataio 6:9) Ua faapea mai le Tusi Paia, ina ua toetū Keriso, ona ulu atu lea o ia i ʻle lagi ina ia tulaʻi ai i luma o le Atua.’—Eperu 9:24.

Ua taʻua manino mai i na fuaiupu, e na o le lagi lava e afio ai Ieova le Atua, ae e lē o iai i mea uma. Peitaʻi, e lē o faasino atu “le lagi” lea o loo taʻua i na mau, i le atimosifia lea e siʻomia ai le lalolagi po o le vateatea. E lē mafai ona ofi Lē na foafoaina le aoao o mea, i le lagi lea e tatou te vāai atu i ai. (1 Tupu 8:27) Ua faapea mai le Tusi Paia: “O le Atua o le Agaga.” (Ioane 4:24) O loo afio o Ia i le lagi lē vaaia, lea e ese mai i le lalolagi ma le lagi ua iai fetu, le lā ma le masina.—1 Korinito 15:44.

Ae faapefea mau o le Tusi Paia lea e foliga mai e lagolagoina le manatu o loo iai le Atua i mea uma? O se faataʻitaʻiga, e pei ona tusia i le Salamo 139:7-10, na faapea atu Tavita e uiga i le Atua: “O fea e mafai ona ou alu i ai mai i lou agaga, ma o fea e mafai ona ou sola ese i ai mai i ou fofoga? Afai ou te alu aʻe i le lagi, o loo iai lava oe; afai foʻi ou te fofola loʻu moega i le Tuugamau, faauta! o loo iai lava oe. Afai foʻi e fai mo aʻu apaʻau o le vaveao, ina ia ou nofo ai i le tuluʻiga mamao o le sami, e taʻitaʻiina ai foʻi aʻu i inā e lou aao.” Po o faaalia i nei fuaiupu o loo iai le Atua i mea uma, ma afio i nofoaga eseese o loo taʻua i le mau?

Mātau, na muamua ona fesili Tavita e faapea: “O fea e mafai ona ou alu i ai mai i lou agaga?” * O le agaga paia o le Atua, e mafai ai ona ia silafia mea uma, ma faaaogā lona mana i so o se mea e aunoa ma le alu pe afio ai i inā. O se faataʻitaʻiga: Na mafai e saienitisi i tausaga e leʻi leva atu ona suʻesuʻe palapala i le paneta o Mars, lea e faitau miliona maila (kilomita) le mamao mai i le lalolagi. E faapefea? E lē faapea na alu i ai se tagata, ae e ala i le vaavaai i ata na puʻe ma isi faamatalaga na maua mai i isi vaa suʻesuʻe lea na auina atu i lenā paneta e aunoa ma se pailate, e iloilo le fogāeleele o Mars.

E faapena foʻi Ieova le Atua, e lē tatau ona iai o ia i mea uma, ina ia silafia mea o loo tutupu i le aoao o mea. Ua faapea mai le Afioga a le Atua: “E leai foʻi se foafoaga e lilo i lana silafaga.” (Eperu 4:13) Ioe, e mafai ona auina atu le malosi galue o Ieova po o le agaga paia i so o se mea, ma silafia ai e ia mea uma ma faataunuu lona finagalo, a o afio i lona “afioaga paia” i le lagi.—Teuteronome 26:15.

[Faaopoopoga i lalo]

^ pala. 8 O loo faasino atu le upu Eperu o loo faaliliuina i inei “agaga,” i le malosi galue po o le mana lea e faaaogā e le Atua e faataunuu ai lona finagalo.

[Ata i le itulau 27]

IAC/RGO/David Malin Images