Alu i mataupu o loo iai

Alu i le lisi o mataupu

E Faapefea Ona E Iloa le Tapua‘iga Moni?

E Faapefea Ona E Iloa le Tapua‘iga Moni?

Aʻoaʻoga a le Tusi Paia

E Faapefea Ona E Iloa le Tapuaʻiga Moni?

O loo talanoaina i lenei mataupu ni fesili atonu sa e fia maua i ai ni tali, ma o loo faaalia ai mau o le Tusi Paia e maua ai. E fiafia Molimau a Ieova e tou te talanoa i nei tali.

1. Pe e na o le tasi le tapuaʻiga moni?

E tasi le tapuaʻiga na aʻoaʻo e Iesu i ona soo, o le tapuaʻiga moni, ma ua faatusaina i se auala e tau atu i le ola. Na fetalai Iesu e faatatau i lenā auala: “E toʻaitiiti foʻi i latou o ē e maua.” (Mataio 7:14) E na o le tapuaʻiga e faavae i le Tusi Paia e talia e le Atua. Ua autasi foʻi tagata tapuaʻi moni uma i le faatuatuaga e tasi.—Faitau le Ioane 4:23, 24; 14:6; Efeso 4:4, 5.

2. Aiseā ua tele ai lotu ua faapea mai o i latou o Kerisiano?

Ua faauiga sesē e perofeta pepelo le faa-Kerisiano ina ia maua ai so latou lava manuia. Na valoia e Iesu, e faafoliga mai i latou o ana “mamoe” ae amio i luko feʻai. (Mataio 7:13-15, 21, 23) Na aliaʻe mai le faa-Kerisiano pepelo ina ua maliliu aposetolo o Iesu.—Faitau le Galuega 20:29, 30.

3. O ā ni mea e iloa ai le tapuaʻiga moni?

E mulimulituʻi tagata tapuaʻi moni i le Tusi Paia, o le Afioga lea a le Atua. E latou te taumafai lava e ola e tusa ma tulafono o loo iai. O lea la, e ese le tapuaʻiga moni mai i tapuaʻiga o loo faavae i manatu o tagata. (Mataio 15:7-9) E tutusa foʻi mea o loo talaʻia e tagata tapuaʻi moni ma mea e latou te faia.—Faitau le Ioane 17:17; 2 Timoteo 3:16, 17.

E faamamaluina e le tapuaʻiga moni le suafa o le Atua, o Ieova. Na faalauiloa atu e Iesu le suafa o le Atua. Na ia fesoasoani i tagata ina ia iloa le Atua, ma aʻoaʻo i latou ina ia tatalo e faapaiaina le suafa o le Atua. (Mataio 6:9) I le mea o loo e alaala ai, o lē fea lotu o loo faaaogāina le suafa o le Atua?—Faitau le Ioane 17:26; Roma 10:13, 14.

4. E faapefea ona mātauina tagata tapuaʻi moni?

E talaʻia e Kerisiano moni le Malo o le Atua. Na auina mai e le Atua Iesu ina ia talaʻia le Malo o le Atua, ma ua na o le pau lenā o le faamoemoe mo tagata. Na faaauau ona talaʻia e Iesu lenā Malo seʻia oo i lona maliu. (Luka 4:43; 8:1; 23:42, 43) Na ia faatonuina ona soo ina ia latou talaʻia le Malo o le Atua. Pe afai e talanoa atu se isi iā te oe e uiga i le Malo o le Atua, faamata o le ā lana lotu?—Faitau le Mataio 10:7; 24:14.

E leai se vaegafai a soo o Iesu i lenei lalolagi amioleaga. E latou te lē auai i faiga faapolotiki po o feeseeseaʻiga a le lautele. (Ioane 17:16) E lē gata i lea, e latou te lē mulimuli i amioga ma uiga leaga o lenei lalolagi.—Faitau le Iakopo 1:27; 4:4.

5. O le ā le faailoga autū o le faa-Kerisiano moni?

E matilatila Kerisiano moni, i lo latou fealofani. Ua aʻoaʻoina i latou mai le Afioga a le Atua ina ia faaaloalo i tagata eseese. E ui ina masani ona lagolago malosi e lotu pepelo faigātaua, ae e lē faia faapea e tagata tapuaʻi moni. (Mika 4:1-4) Nai lo lea, e latou te fiafia e faaaogā o latou taimi ma tupe e fesoasoani ma faalaeiau ai i isi.—Faitau le Ioane 13:34, 35; 1 Ioane 4:20, 21.

O lē fea lotu e faavae a latou aʻoaʻoga i le Afioga a le Atua, faamamaluina le suafa o le Atua, ma talaʻia le Malo o le Atua, e na o lea le faamoemoe o tagata? O lē fea lotu e fealofani ona tagata ma e lē lagolagoina faigātaua? E toʻatele e manatu, e faapena Molimau a Ieova.—1 Ioane 3:10-12.

Mo nisi faamatalaga, tagaʻi i le mataupu e 15 o lenei tusi, O ā Aʻoaʻoga Moni a le Tusi Paia?, ua lomia e Molimau a Ieova.

[Ata i le itulau 16]

“Ua latou taʻutino atu i luma o tagata ua latou iloa le Atua, ae peitaʻi, ua latou faafitia o ia e ala i a latou galuega.”—Tito 1:16