Ia Tumau i le Faamaoni ma se Loto e Tasi

“Ou te savali i le mea moni mai iā te oe; ia e faia ina ia tasi loʻu loto e mataʻu i lou suafa.”—SALA. 86:11.

1, 2. (a) E tusa ai o le Salamo 86:2, 11, o le ā o le a fesoasoani iā i tatou e tumau ai i le faamaoni iā Ieova a o fetaiaʻi ma tofotofoga po o faaosoosoga? (e) O fea le taimi e atiaʻe ai le faamaoni ma le loto atoa?

AISEĀ e ala ai ona mulimuli ane lolo atu nisi Kerisiano i le manaʻo tele i mea faitino, ae sa tumau i le faamaoni i le tele o tausaga e ui sa faafalepuipuiina ma sauāina? O le tali o lenei fesili e fesootaʻi atu i o tatou loto—o lo tatou tagata moni i totonu. Ua faafesootaʻi e le Salamo e 86 le faamaoni i se loto e tasi; o lona uiga o se loto atoa, e lē vaeluaina. Na tatalo le faisalamo o Tavita: “Ia e leoleoina loʻu agaga, auā ua amio Atua lava aʻu; o oe na, loʻu Atua e, ia e faaola mai i lau auauna o lē ua faatuatua iā te oe.” Sa tatalo foʻi Tavita e faapea: “Ieova e, ia e faasino mai iā te aʻu ou ala, ou te savali i le mea moni mai iā te oe; ia e faia ina ia tasi loʻu loto e mataʻu i lou suafa.”—Sala. 86:2, 11.

² Seʻi vaganā ua tatou lē faatuatuaina ma o tatou loto atoa Ieova, o le a faigofie lava la ona faavaivaia lo tatou faamaoni i le Atua moni, ona o isi mea e tatou te popole ai ma faiā faaletagata. O faanaunauga manatu faapito ua pei o ni maina e tatao i le auala o loo tatou savavali ai. E ui lava atonu tatou te tumau ma le faamaoni iā Ieova i lalo o tulaga faigatā, ae e mafai lava ona tatou aafia i mailei a Satani. E tāua tele la ona tatou atiaʻe i le taimi nei le faamaoni ma le loto atoa iā Ieova, a o leʻi oo mai tofotofoga po o faaosoosoga iā i tatou! Ua faapea mai le Tusi Paia: “Ia sili ona leoleoina o lou loto i le leoleoina o mea uma.”  (Faata. 4:23) E mafai ona tatou aʻoaʻoina ni lesona tāua e tusa ai o lenei mea, mai le mea na tupu i se perofeta mai Iuta, o lē na auina atu e Ieova iā Ierepoamo, le tupu o Isaraelu.

‘Ou te Avatu iā te Oe se Mea Alofa’

3. Na faapefea ona tali atu Ierepoamo i le feʻau faafaamasinoga sa taʻu atu e le perofeta a le Atua?

³ Seʻi faaāta i lou mafaufau le mea lenei na tupu. Faatoʻā uma lava ona faailoa atu e le tagata o le Atua se feʻau malosi i le tupu o Ierepoamo, o lē na faatulagaina le tapuaʻiga e fai i tamaʻi povi i le malo i mātū o ituaiga e sefulu o Isaraelu. Ua matuā ita tele le tupu. Ua ia faatonu atu i ona tauleleʻa e puʻe mai le avefeʻau. Peitaʻi ua faatasi Ieova ma lana auauna. Ona faavavega lea ona gase pe ua pē le lima o le tupu lea sa aapa atu i le ita tele, ma ua māvae foʻi le fata faitaulaga sa faaaogā mo le tapuaʻiga sesē. Ua faafuaseʻi ona suia uiga o Ierepoamo. Ua ia ōle atu i le tagata o le Atua: “Ia e ʻaiʻoi atu i luma o Ieova lou Atua, ma e tatalo atu mo aʻu, ina ia toe lelei loʻu lima.” Ua tatalo le perofeta, ona mālōlō ai lea o le lima o le tupu.—1 Tu. 13:1-6.

4. (a) Aiseā e mautinoa ai sa avea le ofo a le tupu o se tofotofoga i le faamaoni o le perofeta? (e) O le ā le tali atu a le perofeta?

⁴ Ona faapea atu lea o Ierepoamo i le tagata o le Atua moni: “Seʻi ta ō ma aʻu i loʻu fale, e te mālōlō ai, ou te avatu foʻi iā te oe se mea alofa.” (1 Tu. 13:7) O le ā nei o le a fai e le perofeta? Pe tatau ona ia talia le agaga talimālō o le tupu, ina ua uma ona faaoo atu iā te ia se feʻau o le faasalaga? (Sala. 119:113) Ia pe tatau ona ia teena le valaaulia a le tupu, e ui lava e foliga mai ua salamō le tupu? E mautinoa o Ierepoamo o se tagata e tamaoaiga, ma e na te mafai ona avatu ni meaalofa taugatā i ana uō. Pe afai o loo i le loto o le perofeta a le Atua se faanaunauga lilo mo mea faitino, e ono foliga mai la ua avea le ofo a le tupu o se tofotofoga e faigatā tele. Peitaʻi, ua faatonu atu e Ieova le perofeta: “Aua e te ʻai i mea e ʻai, aua neʻi e inu foʻi i le vai, aua foʻi le toe foʻi mai i le ala e te alu atu ai.” Ona tali atu lea o le perofeta i se tali maumaututū ma manino: “Afai e te foaʻi mai iā te aʻu le vaeluagalemu o mea o i lou fale, ta te lē ō faatasi ma oe; ou te lē ʻai ni mea e ʻai, ou te lē inu vai foʻi i lenei mea.” Ona tuua lea e le perofeta o Peteli ae alu atu i le tasi ala. (1 Tu. 13:8-10) O le ā se lesona ua tatou aʻoaʻoina mai le filifiliga a le perofeta, e tusa ai o le faamaoni ma le loto atoa?—Roma 15:4.

“Ia Tatou Lotomalilie”

5. E faapefea ona avea le manaʻo tele i mea faitino o se luʻi i le faamaoni?

⁵ Atonu e foliga mai e lē o se luʻi i le faamaoni le manaʻo tele i mea faitino, peitaʻi o le mea moni lenā. Pe tatou te faatuatua i le folafolaga a Ieova e na te saunia mea tatou te manaʻomia moni? (Mata. 6:33; Epe. 13:5) Nai lo le tauivi i so o se auala e maua ai nisi o mea faitino lea o le a aumaia ai se olaga sologa lelei, ae tatou te lē o gafatia ona faatau i le taimi nei, pe mafai ona tatou ola e aunoa ma na mea? (Faitau le Filipi 4:11-13.) Po ua faaosoosoina i tatou e lē faia o tatou faaeaga faatiokarate, ina ia saʻilia ai mea e tatou te mananaʻo ai i aso nei? Po o faamuamua i o tatou olaga le auaunaga faamaoni iā Ieova? O a tatou tali i nei fesili o le a faalagolago tele i le pe faamata, o tatou auauna ma le loto atoa i le Atua pe leai. Na tusi le aposetolo o Paulo: “E tele mea e maua mai le faamaoni i le Atua ma le lotomalie. Auā tatou te leʻi aumaia lava se mea i le lalolagi, ma e lē mafai foʻi ona tatou aveese ai o se mea. O lea, afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.”—1 Timo. 6:6-8.

6. O ā “meaalofa” e ono ofo mai iā i tatou, ma o le ā o le a fesoasoani iā i tatou e filifili ai pe talia na meaalofa?

⁶ O se faaaʻoaʻoga, atonu ua ofo mai e lo tatou pule se avanoa faigaluega e telē le totogi faapea ma isi faamanuiaga. Ia pe atonu foʻi ua tatou iloa e lelei ni taui tau tupe e mafai ona tatou maua, pe afai tatou te siitia atu i se isi atunuu po o se isi vaipanoa e saʻili ai se galuega. I le amataga, atonu o avanoa faapena e foliga mai o se faamanuiaga mai iā Ieova. Peitaʻi, a o leʻi faia sa tatou faaiʻuga e tusa ai o na tulaga, pe lē tatau ona tatou iloilo o tatou uunaʻiga? O le fesili tāua e tatau ona tatou iloiloina, “O le a faapefea ona aafia ai la ma faiā ma Ieova i laʻu filifiliga?”

7. Aiseā e tāua ai ona liaʻi ese faanaunauga manaʻo tele i mea faitino?

⁷ O loo faaauau pea ona faaauiluma e le faiga  o mea a Satani le manaʻo tele i mea faitino. (Faitau le 1 Ioane 2:15, 16.) O le sini o le Tiapolo ia faaleagaina o tatou loto. O lea la, e manaʻomia ona tatou mataalia ina ia iloa ma liaʻi ese faanaunauga manaʻo tele i mea faitino o loo i o tatou loto. (Faaa. 3:15-17) E leʻi faigatā iā Iesu ona ia teena le ofo a Satani e pule i malo uma o le lalolagi. (Mata. 4:8-10) Na ia lapataʻi mai e faapea: “Ia outou mataala pea ma leoleo iā te outou i le matapeʻapeʻa, auā e tusa lava pe tele mea a se tagata, ae e lē maua ai e ia le ola.” (Luka 12:15) O le a fesoasoani iā i tatou le faamaoni, e faalagolago atu ai iā Ieova nai lo le faalagolago iā i tatou lava.

Ua “Pepelo o Ia” e se Perofeta Toeaina

8. Sa faapefea ona tofotofoina le faamaoni o le perofeta a le Atua?

⁸ Sa ono sologa lelei mea mo le perofeta a le Atua pe ana faapea e faaauau pea lana malaga i lona aiga. Peitaʻi, e leʻi umi ae ia fesagaʻi ma se isi foʻi tofotofoga. Ua taʻua i le Tusi Paia: “Sa nofo i Peteli le tasi perofeta ua toeaina; na ō atu ona atalii, ma talatala atu iā te ia” mea uma na tutupu i lenā aso. Ina ua faalogo atu i tala na faamatala mai, ona fai atu lea o le toeaina i ona atalii e faanofoa le asini mo ia, ina ia mafai ona ia tuliloa atu le perofeta a le Atua. E leʻi umi ae ia maua atu le perofeta o mālōlō i lalo o se laau tele ma faapea atu: “Ta te ō ma aʻu i loʻu fale, seʻi e tausami sina mea.” Ina ua teena e le tagata o le Atua moni le valaaulia, ona tali atu lea o le toeaina: “O aʻu foʻi o le perofeta e pei o oe; ua fai mai foʻi le agelu iā te aʻu i le afioga a Ieova, ua faapea mai, ‘Inā e toe faafoʻi mai ia iā te ia faatasi ma oe i lou fale, ina ia ʻai o ia i mea e ʻai, ma inu i le vai.’” Ae ua faapea mai le Tusi Paia: “A ua tala pepelo o ia iā te ia.”—1 Tu. 13:11-18.

9. O le ā ua taʻua i le Tusi Paia e faatatau i tagata faalotolotolua, ma o ai e latou te faaleagaina?

⁹ E tatou te lē iloa po o ā uunaʻiga sa iai i le perofeta toeaina, ae ua pepelo o ia. Atonu i le taimi muamua sa avea le perofeta toeaina ma perofeta faamaoni a Ieova. Peitaʻi, i le taimi lea, ua taufaaʻoleʻole o ia. O loo matuā taʻusalaina i le Tusi Paia lenā uiga. (Faitau le Faataoto 3:32.) O tagata e taufaaʻoleʻole, e lē gata e latou te faaleagaina i latou lava i le itu faaleagaga, ae e masani foʻi ona lamatia ai isi.

Ua “La Toe Foʻi Atu” ma le Perofeta Toeaina

10. Na faapefea ona tali atu le perofeta a le Atua i le valaaulia a le perofeta ua toeaina, ma o le ā le iʻuga?

¹⁰ Sa tatau ona iloa atu e le perofeta mai Iuta, le togafiti a le perofeta matua. Sa tatau ona ia fesili ifo e faapea, ‘Aiseā o le a auina atu ai e Ieova se agelu i se isi tagata, ma ni faatonuga fou mo aʻu?’ Sa tatau ona talosaga atu le perofeta iā Ieova ina ia faamanino mai le faatonuga, peitaʻi e lē o faaalia mai i le Tusi Paia lona faia faapea. Nai lo lea, ua ‘la toe foʻi atu ma le perofeta ua toeaina, ua ia ʻai foʻi i mea e ʻai i lona fale, ma inu  vai.’ Sa tigā le finagalo o Ieova. Ina ua toe foʻi atu i Iuta le perofeta lea na faasesēina, na maua o ia e se leona ma faaumatia ai o ia. Pagā se iʻuga mataʻutia i lana galuega faaperofeta!—1 Tu. 13:19-25. *

11. O le ā se faaaʻoaʻoga lelei na faataatia e Akia?

¹¹ Ae i le isi itu, sa tumau ma le faamaoni le perofeta o Akia seʻia oo ina toeaina, o lē na auina atu e faauu Ierepoamo e fai ma tupu. Ina ua toeaina Akia ma ua tauaso, sa auina atu e Ierepoamo lana avā e fesili atu iā Akia e faatatau i le tulaga o le la tama ua maʻi. Na valoia ma le lototele e Akia o le a oti le atalii o Ierepoamo. (1 Tu. 14:1-18) O se tasi o faamanuiaga mai le tele o faamanuiaga na maua e Akia, o le faaeaga lea o le faia o sona sao i le Afioga faagaeeina a le Atua. E faapefea? Sa mulimuli ane faaaogā e le ositaulaga o Esera ana tusitusiga, e fai ma faavae o ana faamatalaga.—2 No. 9:29.

12-14. (a) O le ā se lesona tatou te aʻoaʻoina mai le mea na tupu na aafia ai le perofeta talavou? (e) Faamatala mai ni faataʻitaʻiga o le manaʻomia ona tatalo ma iloilo ma le faaeteete fautuaga a le Tusi Paia e aumai e toeaina.

¹² E lē o taʻua i le Tusi Paia pe aiseā na leʻi saʻili ai le perofeta talavou iā Ieova, a o leʻi taliu e aai ma inu faatasi ma le perofeta ua toeaina. Pe ona na taʻu atu e le perofeta matua iā te ia le mea sa ia manaʻo e faalogo i ai? O le ā se lesona mo i tatou? E manaʻomia ona tatou talitonu maumaututū i le tonu o faatulagaga a Ieova. Ma e ao ona tatou naunau e mulimuli i na faatulagaga, e tusa lava po o le ā le tulaga e oo i ai.

¹³ O nisi e faalogo i mea e latou te mananaʻo e faalogo i ai pe a avatu se fautuaga. O se faaaʻoaʻoga, atonu ua ofo atu i se tagata talaʻi se galuega e ono faaitiitia ai le taimi e faatasi ai ma lona aiga, ma taimi e alu i galuega e fesootaʻi atu i le auaunaga i le Atua. E ono fesili atu o ia i se toeaina mo se fautuaga. Atonu e faatomua e le toeaina ana faamatalaga e ala i le faailoa atu, e lē o ia e taʻuina atu i le uso le auala e tausia ai lona aiga. Ia ona iloilo lea e le toeaina ma le uso aafiaga faaleagaga o le taliaina o le galuega na ofo atu iā te ia. Po o le a manatua e le uso na o manatu na taʻua muamua e le toeaina, po o le a ia iloiloina ma le faaeteete fautuaga na sosoo atu ai? E mautinoa e manaʻomia e le uso ona iloilo po o fea le mea e sili ona aogā mo ia i le itu faaleagaga.

¹⁴ Seʻi manatu i le isi tulaga lenei e ono tupu. Atonu ua talanoa atu se tuafafine i se toeaina pe tatau ona la teteʻa ma lana tane lē talitonu. E lē taumatea o le a faamatala atu e le toeaina e faapea, o ia lava e faia le faaiʻuga pe teteʻa pe leai. Ona ia toe iloiloina lea o fautuaga a le Tusi Paia e  faatatau i le mataupu. (1 Kori. 7:10-16) Po o le a faia e le tuafafine se iloiloga e tusa ai ma mea ua taʻu atu e le toeaina? Ia po ua tonu lana filifiliga e tuua lana tane? I le faia o lana faaiʻuga, o se faiga atamai mo ia ona iloilo faatasi ma le tatalo fautuaga a le Tusi Paia.

Ia Faamaulalo

15. O le ā tatou te aʻoaʻoina mai le mea sesē a le perofeta a le Atua?

¹⁵ O le ā se isi mea tatou te aʻoaʻoina mai le mea sesē a le perofeta mai Iuta? Ua faapea mai le Faataoto 3:5: “Ia e faatuatua iā Ieova ma lou loto atoa; ae aua le faalagolago i lou lava atamai.” Nai lo le faaauau pea ona faalagolago iā Ieova e pei ona sa ia faia i le taimi ua mavae, ae i le taimi lea, sa faalagolago le perofeta mai Iuta i lana lava faaiʻuga. O lana mea sesē na iʻu ina oti ai ma aafia ai lona igoa lelei ma le Atua. Ua faamamafa mai ai i lenei mea na tupu iā te ia, le tāua o le faamaulalo ma auauna ma le faamaoni iā Ieova!

16, 17. O le ā o le a fesoasoani iā i tatou e tumau ai i le faamaoni iā Ieova?

¹⁶ E faigofie ona taʻitaʻisesēina i tatou e faanaunauga manatu faapito o o tatou loto. “E sili le faaʻoleʻole o le loto i mea uma, ma ua matuā leaga lava.” (Iere. 17:9) Ina ia tumau ma le faamaoni iā Ieova, e ao ona faaauau ona tatou galulue malosi e tō ese le tagata tuai, ma ona faanaunauga e tupu ai le faamaualuga ma faalagolago ai le tagata iā te ia lava. Ma e tatau ona tatou oofu i le tagata fou, “na faia e tusa ma le finagalo o le Atua, i le amiotonu moni ma le faamaoni.”—Faitau le Efeso 4:22-24.

¹⁷ Ua faapea mai le Faataoto 11:2: ‘E i ai le poto i ē faamaulalo.’ O le faalagolago ma le faamaulalo iā Ieova, o le a fesoasoani iā i tatou e ʻalofia ai le faia o ni agasala matuiā. O se faataʻitaʻiga, e faigofie ona faasesēina a tatou faaiʻuga ona o le lotovaivai. (Faata. 24:10) E tatou te ono fiu i le auai i nisi o vala o le auaunaga paia, ma amata ona manatu e faapea ua lava lo tatou sao sa fai mo le tele o tausaga, ma manatu ai atonu o le taimi lenei mo isi e latou te tauave ai le avega. Ia pe tatou te mafaufau foʻi e ola i se olaga e “masani” ai tagata. Peitaʻi, o le a puipuia o tatou loto pe afai tatou te “faamalolosi ma finafinau,” ma “ia tele pea mea e fai i le galuega a le Alii.”—Luka 13:24; 1 Kori. 15:58.

18. O le ā e mafai ona tatou fai, pe afai ua tatou lē iloa po o le ā le filifiliga o le a fai?

¹⁸ O nisi taimi, e tatou te manaʻomia ai ona fai ni filifiliga faigatā, ma atonu e lē o manino mai le mea saʻo e ao ona fai. Po o le a faaosoosoina ea i tatou e fai le mea ua tatou manatu e sili, i la tatou lava auala? O so o se taimi lava e tatou te iai i ni tulaga faapena, o se mea atamai ona ōle atu iā Ieova e fesoasoani mai iā i tatou. Ua faapea mai le Iakopo 1:5, “Pe afai ua leai se poto i se tasi o outou, inā ōle atu pea ia i le Atua, auā o ia na te foaʻi tele mai.” O le a foaʻi mai e lo tatou Tamā o i le lagi le agaga paia e tatou te manaʻomia, ina ia mafai ai ona tatou faia ni faaiʻuga atamai.—Faitau le Luka 11:9, 13.

Ia Maumauaʻi e Tumau i le Faamaoni

19, 20. O le ā e ao ona tatou naunau e fai?

¹⁹ O tausaga fesouaʻiina ina ua mavae le fulitua o Solomona mai le tapuaʻiga moni, sa matuā tofotofoina ai le faamaoni o auauna a le Atua. E moni e toʻatele i latou sa faagutugutulua a lē o se tasi auala po o se isi auala. Ae ui i lea, sa tumau pea ona faamaoni nisi iā Ieova.

²⁰ O aso taʻitasi e tatou te fesagaʻi ai ma faaiʻuga ma filifiliga e tofotofoina ai lo tatou faamaoni. E mafai foʻi la ona tatou faamaonia atu lo tatou faamaoni. Seʻi o tatou tutumau i le faamaoni iā Ieova, a o tasi o tatou loto, ma talitonu atoatoa, o le a faaauau pea ona ia faamanuia i ona tagata faamaoni.—2 Samu. 22:26.

[Faaopoopoga i lalo]

O le ā Lau Tali?

• Aiseā e ao ai ona tatou taumafai e liaʻi ese mai i o tatou loto, tuʻinanauga matapeʻapeʻa i mea faitino?

• O le ā o le a fesoasoani iā i tatou e tumau ai i le faamaoni iā Ieova?

• E mafai faapefea ona fesoasoani iā i tatou le faamaulalo, e tumau ai i le faamaoni i le Atua?

[Fesili mo le Suʻesuʻega]

[Ata i le itulau 9]

Po o iai sou faafitauli i le teteeina o faaosoosoga?

[Ata i le itulau 10]

Po o le a e iloilo faatasi ma le tatalo fautuaga a le Tusi Paia?