Skip to content

Skip to table of contents

Pe E te Manatua?

Pe E te Manatua?

 Pe E te Manatua?

Pe na e fiafia i le faitauina o lomiga fou o Le Olomatamata? Seʻi taumafai pe mafai ona e taliina fesili nei:

• O le ā se luʻi sili ona faigatā ua fesagaʻi ma nisi o Kerisiano faatoʻā uma ona faaipoipo, ma o le ā e ao ona la taumafai e fai?

Ua iloa e nisi Kerisiano e lē tele ni mea e tutusa ai laʻua ma lana paaga. O le iloaina e lē o se vaifofō lelei le tatalaina o le faaipoipoga e aunoa ma se māfuaaga faale-Tusi Paia, e ao ona la taumafai malosi e faatumau pea le la faaipoipoga.—4/15, itulau e 17.

• O ā luʻi e ono fesagaʻi ma se Kerisiano o loo tausia i le fale mo tagata matutua?

Atonu e lē masani o ia i le faapotopotoga o loo iai i le vaipanoa lea e iai le fale mo tagata matutua lea e nofo ai. O le toʻatele o tagata o loo tausia ai, atonu e eseese uma a latou tapuaʻiga ma taumafai e faaaafia o ia i a latou mea faalelotu. E ao i tauaiga Kerisiano ma sui o le faapotopotoga i lenā vaipanoa ona manatu i nei luʻi, ma taumafai e avatu le fesoasoani ma le tausiga.—4/15, itulau e 25-27.

• O ā auala e fā e fesoasoani i paaga faaipoipo ina ia foʻia ai faafitauli?

Ia faatulaga se taimi e talanoa ai le faafitauli. (Fai. 3:1, 7) Faaali saʻo ou manatu, ae ia fai i se auala faaaloalo. (Efe. 4:25) Ia faalogo ma amanaʻia manaʻoga o lau paaga. (Mata. 7:12) Ia malilie i le faaiʻuga ua fai, ma ia galulue faatasi e tusa ma lenā faaiʻuga. (Fai. 4:9, 10)—5/1, itulau e 10-12.

• O ā Komiti o loo galulue ai sui o le Vaega Pule?

Komiti Sooupu; Komiti o le ʻAufaigaluega; Komiti Lomitusi; Komiti o le Auaunaga; Komiti Tau Aʻoaʻoga; Komiti o Tusitusiga.—5/15, itulau e 29.

• E faapefea ona tatou iloa sa aofia le lalolagi atoa i le Lolo i aso o Noa?

Na talitonu Iesu sa iai le Lolo ma sa aofia ai le lalolagi atoa. O loo faavae mai lapataʻiga a le Tusi Paia i le moni o le aofia ai o le lalolagi atoa i le Lolo.—6/1, itulau e 8.

• Pe sa faasino atu amioga o loo faamatalaina i le Roma 1:24-32 i tagata Iutaia po o tagata o Nuu Ese?

E mafai ona fetaui lenei faamatalaga i ituaiga uma e lua, ae sa faasino tuusaʻo atu Paulo i tagata Isaraelu anamua ia sa lē taulau ona savavali i le Tulafono. Sa latou iloa lelei tulafono amiotonu a le Atua, ae latou te leʻi ola e tusa ai ma na tulafono.—6/15, itulau e 29.

• O fea o iai Tel Arad, ma aiseā e tāua ai lenei aai?

O lenei aai maupuʻepuʻe i Isaraelu o loo faailogaina ai le aai anamua o Arata, i le itu i sisifo o le Sami Mate. Sa maua e tagata eli palapala i lenei maupuʻepuʻe faaputuga pito sili ona telē o ipu omea lea na faaaogā mo tusitusiga. Na maua ai ni igoa o loo maua i le Tusi Paia, ma o loo faaalia mai ai le suafa totino o le Atua sa faaaogā i le tele o faamaumauga.—7/1, itulau e 23-24.

• E faapefea i le faia o le mea tatou te mafai ona fai ona faateleina ai lo tatou olioli?

Afai tatou te taumafai e faataunuu sini e lē o gafatia e o tatou tulaga o loo iai, o le a tatou lagona le popole vale. Ae e ao pea ona aua neʻi o tatou faatuutuu iā i tatou lava, i le avea lea o o tatou tulaga, e fai ma faamolemolega e faaitiitia ai mea e tatau ona tatou faia i le auaunaga.—7/15, itulau e 29.

• O ā mea e ono taofia ai mātua e talanoa atu i le fanau talavou?

O ni toʻatugā e pei o le fefe po o le matamuli o le talavou, o lona faanaunauga fia tutoʻatasi, ma le lagona e aua le faalavelave atu se isi iā te ia. E ono taumafai mātua e fetalanoaaʻi ma le fanau talavou i taimi paganoa, ma taumafai e malamalama e lē gata i a latou tala o fai mai, ae ia iloa foʻi o latou lagona o loo faaali mai.—8/1, itulau e 10-11.